Ir al contenido

Ir al índice

 TAPANMANTA | ANGELESMANTA, ¿IMATÁ BIBLIA NIN?

¿Imaynatá ángeles yanapashawanchej?

¿Imaynatá ángeles yanapashawanchej?

Kasukoj angelesqa runasta yanapaytapuni munanku, mana saykʼuspataj Diospa munayninta ruwashanku. Jehová Dios kay jallpʼata ruwashajtin, angelesqa uj kunkalla takisharqanku, maytataj kusikorqanku (Job 38:4, 7). Watas pasasqanman jina, angelesqa imachus aswan qhepaman jallpʼanchejwan kananmanta profeciasta mayta entiendeyta munarqanku (1 Pedro 1:11, 12).

Diospa munaynin ruwakunanpaj, Biblia nisqanman jina ángeles wakin kutis Diospa kamachisninta jarkʼarqanku (Salmo 34:7).

  • Jehová Sodoma, Gomorra llajtasta chinkachishajtin, angelesqa cheqan runa Lotta, familiantawan chay llajtamanta ayqekunankupaj yanaparqanku (Génesis 19:1, 2, 15-26).

  • Babiloniapi kinsa hebreo jovenesta nina laurashaj hornoman wijchʼuykojtinku, Jehová Diosqa “angelninta kachamorqa” chay kinsa jovenesta librananpaj (Daniel 3:19-28).

  • Profeta Danielqa tutantinta manchay yarqhasqa leonespa tʼoqonpi karqa, leonestaj mana imanarqankuchu. Pay nerqa “Diosniymin angelninta kachamorqa, paytaj leonespa siminkuta wisqʼaykurarqa”, nispa (Daniel 6:16, 22).

Unaymantapachaña angelesqa kasukoj runasta yanapashanku.

ANGELESQA ÑAUPAJ CRISTIANOSTA YANAPARQANKU

Apostolespa tiemponkupipis, angelesqa Diospa munaynin juntʼakunanpaj cristianosta yanaparqanku. Chaykunatataj kunan qhawarina:

  • Uj ángel carcelpa punkusninta kicharerqa, apostolestataj chaymanta orqhomorqa, nerqataj templopi predicamunallankutapuni (Hechos 5:17-21).

  • Uj ángel Felipeta nerqa Jerusalenmanta Gazaman uraykamoj ñanman rinanta, Jerusalenpi Diosta yupaychasqanmanta kutipoj etíope runaman predicananpaj (Hechos 8:26-33).

  • Diosqa mana judío kajkuna cristianosman tukunankuta munarqa, chay kutipitaj uj ángel mosqoypi jina Cornelioman rikhurerqa, nerqataj apóstol Pedrota wasinman wajyarikunanta (Hechos 10:3-5).

  • Apóstol Pedro carcelpi wisqʼasqa kashajtin, uj ángel payman rikhurerqa, carcelmantataj orqhorqa (Hechos 12:1-11).

 ¿IMAYNATÁ ÁNGELES YANAPASHAWANCHEJ?

Ñaupa tiempopi runasta angelesnejta Dios yanapasqanqa sutʼi rikukorqa, kay tiempopitaj mana ni imapis rikuchinchu milagronejta angelesninwan yanapashawasqanchejta. Chaywanpis Jesús nerqa: “Diospa Gobiernonmanta sumaj willaykunapis jallpʼantinpi willakonqa tukuy laya runas yachanankupaj, chaypachamá tukukoyqa jamonqa”, nispa (Mateo 24:14). Kay tiempopeqa ángeles Diosmanta willayta ñaupajman apashanku.

Angelesqa yanapakushanku sumaj willaykuna jallpʼantinpi willakunanpaj.

Apocalipsis libroqa nin ángeles mayta runasta yanapanankuta, Jehová Diosmanta yachakunankupaj, imatachus runaspaj Dios munasqanmanta ima. Apóstol Juan nerqa: “Waj angelta rikullarqanitaj cielo chaupita phawashajta, payqa wiñay wiñaypaj sumaj willaykunata jallpʼapi tiyakojkunaman willasharqa, tukuy nacionesman, tukuy ayllusman, tukuy laya parlayniyojkunaman, tukuy laya runasmanpis. Chay angeltaj jatunmanta nisharqa: ‘Diosta manchachikuychej, jatunchaychejtaj, imaraykuchus paypa juicio horanqa chayamunña. Chayrayku yupaychaychej Pichus cielota, jallpʼata, jatun qochata, yaku juturistawan ruwarqa, chayta’”, nispa (Apocalipsis 14:6, 7). Kay tiempopi ashkha runaspa kausayninku rikuchin, jallpʼantinpi Diosmanta willakunanpaj ángeles yanapashasqankuta. Chantapis angelesqa mayta kusikunku, uj runa juchasninmanta pesachikuspa Jehová Diosman kutirikojtin (Lucas 15:10).

¿Imatá ruwanqanku ángeles predicación manaña kajtin? Angelesqa Jesucristowan khuska maqanakonqanku, pichus Reyespa Reynin. Chaytaj kanqa “Tukuy Atiyniyoj Diospa jatun pʼunchayninpi”, nisunman Armagedón nisqa guerrapi (Apocalipsis 16:14-16; 19:14-16). Angelesqa Jehovaj pʼunchayninpi “Señorninchej Jesusmanta sumaj willaykunata mana” kasukoj runasta chinkachenqanku (2 Tesalonicenses 1:7, 8).

Angelesqa sapa ujninchejta munakuwanchej, Diosta sirviyta munajkunaj allinninkutataj munanku. Yachakunchej jina Diosqa ashkha kutispi kay jallpʼapi kamachisninta angelesnejta kallpacharqa, jarkʼarqataj (Hebreos 1:14).

Jallpʼantinpi Diosmanta sumaj willaykuna willakushan. Chay willakusqanta, ¿japʼikusunchu manachu? Sapa ujninchej chaypi tʼukurinanchej tiyan. Jehovaj testigosnenqa tukuy sonqo yanapasonqanku angelespa yanapayninta japʼinaykipaj.