Ir al contenido

Ir al índice

 31 YACHAQANA

‘Ama saykʼunachu’

‘Ama saykʼunachu’

“Chayrayku mana saykʼunchejchu” (2 COR. 4:16).

128 TAKIY Tukukuykama sinchʼita sayay

¿IMATÁ KAYPI YACHAKUSUN? *

1. ¿Imatataj ruwananchej tiyan premiota japʼinanchejpaj?

CRISTIANOSQA atipanakupi correjkuna jina kanchej, premionchejtaj wiñay kausay kashan. Kunanllaraj chayri unayña cristianos kaspapis, maymanchus chayananchej kashan, chayman chayanakama correnallanchejpuni tiyan. Apóstol Pablo Filiposmanta cristianosman imatachus yuyaychasqanqa, premiota japʼinakama correnapaj yanapawasun. Pablo cartanta filipensesman apachishajtin, wakin cristianosqa Jehovata unaytaña yupaychasharqanku. Allinta ruwashajtinkupis, Pabloqa mana saykʼuspa correnallankutapuni nerqa. Munarqataj ‘tʼinkata japʼinankukama’, pay jina kallpachakunallankutapuni (Fili. 3:14).

2. ¿Imajtintaj Pablo Filiposmanta hermanosta kallpachaspa sumajtapuni ruwarqa?

2 Runasqa Filipos llajtapi kaj congregacionman qallariymantapacha churanakorqanku. Chayrayku apóstol Pabloqa, chay hermanosta kallpachaspa sumajtapuni ruwarqa. 50 wata chaynejta, Pablowan Silaswanqa Macedoniaman yanaparikoj rinankupaj wajyarisqa karqanku (Hech. 16:9). Chay lugarmanta ujnin llajtaman chayaytawan, Lidia sutiyoj warmiman predicarqanku. “Jehová Diostaj paypa sonqonta kicharerqa” sumaj willaykunata japʼikunanpaj (Hech. 16:14). Chantá Lidiaqa “wasinmanta kajkunawan khuska” bautizakorqa. Jinapis Diabloqa chay rato ashkha problemasta rikhuricherqa. Filipos llajtamanta runasqa, Pablotawan Silastawan kamachejkunaman qhatatarqanku, llajtankuta chʼajwachisqankuta nispataj tumparqanku. Chayrayku kamachejkunaqa, Pablotawan Silastawan manchayta seqʼoykucherqanku, carcelmantaj wisqʼaykucherqanku. Chantá chay llajtamanta ripunankuta nerqanku (Hech. 16:16-40). Jinapis paykunaqa, Jehová Diosta yupaychallarqankupuni. Chay mosoj congregacionmanta hermanosqa, aguantasqankuta rikuspa mayta kallpachakorqanku. Chayrayku paykunapis aguantallarqankutaj.

3. 1) ¿Imatataj Pablo yacharqa? 2) ¿Ima tapuykunamantaj kay yachaqanapi kutichisun?

 3 Pabloqa wañupunankama Jehovata mana saykʼuspa sirviyta munarqa (2 Cor. 4:16). Chaypajtaj premiota japʼinanpi yuyayninta churanan kasqanta yacharqa. ¿Imatataj Pablomanta yachakusunman? ¿Imaynatá kay tiempomanta hermanospa kausayninku, llakiypi kajtinchejpis aguantanapaj yanapawasunman? ¿Imaynatá wiñay kausayta suyakuy, Jehovata mana saykʼuspa sirvinallapajpuni yanapawasunman? Kay yachaqanapi chay tapuykunaman kutichisun.

¿IMATATAJ PABLOMANTA YACHAKUSUNMAN?

4. ¿Imatataj Pablo ruwarqa presochasqa kaspapis?

4 Filiposmanta cristianosman cartanta qhelqashajtin, Pabloqa Romapi kasharqa. Wasinpi presochasqa kasqanraykutaj, mana predicaj llojsiyta aterqachu. Jinapis payta visitarejkunaman Diospa Gobiernonmanta willarqa, karupi kaj congregacionesmantaj cartasta qhelqarqa. Kay tiempopipis, ashkha cristianos viejitosña kasqankurayku chayri onqosqas kasqankurayku, mana wasinkumanta llojsiyta atinkuchu. Jinapis paykunata watukoj rejkunaman predicanku. Chantapis cartasta qhelqanku, pikunatachus predicaspa wasisninkupi mana tarinchejchu, chaykunapaj.

5. Filipenses 3:12-14 nisqanman jina, ¿imatataj Pablo ruwarqa tʼinkata japʼinanpaj?

5 Pablotaqa ni ñaupa juchasninpis, ni allin imasta ruwasqanpis pantacherqachu. Chayrayku payqa nerqa, jamoj imasta japʼinanpaj, “ñaupaj imasta” qonqanan kasqanta. Arí, Pabloqa tʼinkata japʼinankama ñaupajllamanpuni rinan karqa (Filipenses 3:12-14 leey). Jinapis ichá wakin imas payta pantachiyta atinman karqa. Ñaupaj kaj, Pabloqa Diosta tukuy sonqo yupaychaj judío karqa, judiospa yachachiyninkutataj mayta rejsicherqa. Jinapis payqa chaykunata “qʼopata jina” qhawarqa (Fili. 3:3-8). Iskay kaj, Pablotaqa cristianosta qhatiykachasqanmanta sonqon juchacharqa. Jinapis payqa mana chay llakiyninwan atipachikorqachu. Kinsa kaj, Pablotaqa Diosmanta willasqanrayku, carcelpi wisqʼarqanku, maqarqanku, rumiswan chʼanqarqanku, jatun qocha chaupipi tuytorqa, wakin kutistaj mana mikhunayoj, pisi ropayojtaj karqa. Chay jinata sufrispapis Pabloqa Diospaj sumajta llankʼarqa. Jinapis payqa mana yuyarqachu, Jehová Diospaj tukuy imataña ruwasqanta (2 Cor. 11:23-27). Pabloqa Jehovapaj ashkhataña llankʼaspapis, payta sirvinallanpuni kasqanta yacharqa. Noqanchejpis kikillantataj ruwananchej tiyan.

6. ¿Imastá Pablomanta yachakusunman?

6 Rikunchej jina, Pabloqa “ñaupaj imasta” qonqayman churarqa. ¿Imatá Pablomanta yachakusunman? Ichapis ñaupa juchasninchejrayku, sonqonchej juchachawanchej. Ajinapi rikukushanchej chayqa, Jesús juchasninchejrayku wañusqanmanta astawan yachakuna, chaypitaj tʼukurina. Chantapis Jehovamanta yanapata mañakuna perdonninta japʼikunapaj. Ajinamanta Jehová perdonawanchej chay juchasmanta, niña sonqonchej juchachawasunchu. ¿Imatawan Pablomanta yachakusunman? Wakin hermanosqa Diospaj astawan llankʼanankupaj, sumaj pagasqa trabajosta saqerqanku. Chayta ruwarqanchej chayqa, imachus kapuwasunman karqa chaypi, manaña piensananchejchu tiyan. Ajinamanta “ñaupaj imasta” qonqasun (Núm. 11:4-6; Ecl. 7:10). ‘Ñaupaj imasqa’ kallanmantaj, Jehová Diosta sirvispa imastachus ruwasqanchej, ima pruebastachus atipasqanchej ima. Jehová Dios imaynatachus ñaupajpi yanapawasqanchejta yuyareyqa, payman astawan qayllaykunapaj yanapawanchej. Jinapis mana yuyananchejchu tiyan  Jehová Diospaj tukuy imataña ruwasqanchejta (1 Cor. 15:58).

Wiñay kausayta japʼinapaj correshaspaqa, ama musphaykachanachu, premionchejpitaj yuyana (7 parrafota qhawariy).

7. Kay 1 Corintios 9:24-27 nisqanman jina, ¿imastataj ruwananchej tiyan wiñay kausayta japʼinapaj? Uj kikinchaywan sutʼinchay.

7 Jesús nerqa: “Mayta kallpachakuychej”, nispa. Pablotaj chayta sumajta entienderqa (Luc. 13:23, 24). Cristoqa wañupunankama Jehová Diosta sirverqa. Pablotaj pay jina ruwananpaj kallpachakunan kasqanta yacharqa. Chayrayku cristianosta atipanakupi correjkunawan kikincharqa (1 Corintios 9:24-27 leey). Atipanakupi correjkunaqa, maymanchus chayananku tiyan chaypi yuyanku, nitaj imapis pantachinanta saqenkuchu. Llajta ukhupi atipanakupi correjkunaqa, ichapis tiendas chaynejta chayri waj lugaresnejta pasanku. Jinapis mana chaykunatarajchu qhawaj churakunku. Imaraykuchus yuyayninkoqa, premiota japʼinankupi kashan. Noqanchejpis wiñay kausayta japʼinapaj, mana imapis pantachinawanchejta saqenachu tiyan. Yuyayninchejta premiopi churasun, Pablo jinataj kallpachakusun chayqa, premionchejta japʼisunpuni.

LLAKIYPI KASPAPIS AGUANTANA

8. ¿Imastaj Diosta yupaychaypi saykʼuchiwasunman?

8 Imatachus suyasqanchej mana chay rato juntʼakojtin, kallpanchej pisiyajtin, pruebaspi unayta kajtinchej ima, Diosta yupaychaypi saykʼupusunman. Diospa wakin kamachisninpis ajinapi rikukorqanku. Jinapis Jehová Diosta sirvillarqankupuni. Chayrayku imatachus paykuna ruwasqankuta yachakuna (Fili. 3:17).

9. Imatachus suyasqanchej mana chay rato juntʼakojtin, ¿imataj noqanchejwan kanman?

9 Imatachus suyasqanchej mana chay rato juntʼakojtin. Mayta munanchej Jehová Dios imastachus qonawanchejta nisqan juntʼakunanta. Profeta Habacucpa tiemponpi, Jehová Diosqa Judamanta sajra kausayta chinkachinanta nerqa. Habacuctaj chayta mayta suyakusharqa. Jinapis Jehová Dios payta nerqa: “Qheparejmanña rijchʼasunki chaypis suyarillay”, nispa (Hab. 2:3). Imatachus suyasqanchej mana chay rato juntʼakojtenqa, Jehová Diosta niña ñaupajta jinachu sirvisunman, llakisqataj qhepakusunman (Pro. 13:12). Kay  1914 wata chaynejpi, ajinapi wakin hermanosninchej rikukorqanku. Chay wataqa ashkha cristianos cieloman ripunankuta yuyarqanku. Jinapis mana yuyasqankuman jinachu karqa. Imatachus wakin hermanos ruwasqankuta qhawarina.

Royalwan señoranwanqa imatachus suyakusqanku 1914 watapi mana juntʼakojtinpis, wañupunankukama Jehová Diosta tukuy sonqo sirverqanku (10 parrafota qhawariy).

10. ¿Imatataj uj qhariwarmi ruwarqa imatachus suyasqanku mana juntʼakojtin?

10 Imatachus uj qhariwarmi ruwasqankumanta parlarina. Hermano Royal Spatzqa 1908 watapi, 20 watasniyoj bautizakorqa. Payqa tʼinkanta tumpamantawan japʼinanta yacharqa. Chayrayku 1911 watapi, hermana Pearlta nerqa: “Yachankiña imachus 1914 watapi kananta. Casarakusun chayqa, apurata casarakuna”, nispa. Paykunaqa 1914 watapi cieloman mana ripuspapis, Jehová Diosta sirvillarqankupuni. Paykunaqa mana tʼinkankuta japʼiyllapichu yuyasharqanku, manaqa Jehová Diosta tukuy sonqo sirviypi. Paykunaqa wañupunankukama Jehovata yupaychayta munarqanku. Chaytapunitaj ruwarqanku. Noqanchejpis mayta suyashanchej, Jehová Dios paylla sumaj Kamachej kasqanta rikuchinanta, sutinta jatunchananta, nisqasninta juntʼananta ima. Chaytaj paypa ajllasqan tiempopi juntʼakonqa. Chay tiempo chayamunankama, Jehová Diospaj tukuy atisqanchejta llankʼanallapuni. Imastachus suyasqanchej mana chay rato juntʼakojtintaj, ama llakikunachu. Astawanpis Jehová Diosta tukuy sonqo sirvinallapuni.

Hermano Arthur Secordqa machituña kaspapis Jehovapaj tukuy atisqanta llankʼayta munarqa (11 parrafota qhawariy).

11, 12. Kallpanchej pisiyajtinpis, ¿Jehovata sirvillasunmanpunichu? Hermano Arthurmanta parlariy.

11 Kallpanchej pisiyajtin. Atipanakupi correjkunaqa, kallpayoj kananku tiyan. Jinapis wiñay kausayta japʼinapaj correnapajqa, mana kallpayojpunichu kananchej tiyan. Ashkha hermanosqa, kallpanku pisiyajtinpis Jehová Diosta tukuy atisqankuta sirvishallankupuni (2 Cor. 4:16). Hermano Arthur Secordmanta parlarina. * Payqa 88 watasniyojña karqa, Betelpi 55 watasta sirviytawantaj onqoykorqa. Uj kuti, payta cuidaj enfermera munakuywan nerqa: “Hermanitóy, qanqa Jehová Diospaj ashkhataña llankʼanki”, nispa. Jinapis hermano Arthurqa, mana imastachus ruwasqanpichu yuyasharqa. Chayrayku payqa enfermerata qhawarispa nerqa: “Arí. Jinapis mana chaychu astawan valen, manaqa imatachus Jehová Diospaj ruwasunchej, chay astawan valen”, nispa.

12 Ichapis Jehová Diosta unaytaña sirvishanchej. Jinapis onqosqa kasqanchejrayku, manaña ñaupajta jinachu ruwashanchej. Ajina kajtenqa ama llakikunachu. Jehová Diosqa ‘mana qonqakunchu imastañachus paypaj ruwasqanchejta’ (Heb. 6:10). Chantapis  Jehová Diosta munakusqanchejtaqa, mana paypaj mashkhatachus llankʼasqanchejpichu rikuchinchej. Astawanpis chaytaqa rikuchinchej, kusisqallapuni kaspa, paypaj tukuy atisqanchejta llankʼaspa ima (Col. 3:23). Jehová Diosqa maykamachus ruwayta atisqanchejta yachan, atisqallanchejtataj mañawanchej (Mar. 12:43, 44).

Anatolywan Lidiyawantaj ashkha llakiykunapi rikukuspapis Diosta sirvillarqankupuni (13 parrafota qhawariy).

13. 1) ¿Ima llakiykunapitaj hermano Anatolywan señoranwan rikukorqanku? 2) ¿Imatá paykunaj kausayninkumanta yachakusunman?

13 Pruebaspi unayta kajtinchej. Wakin hermanosqa pruebaspi kaspa chayri qhatiykachasqa kaspa unayta aguantarqanku. Hermano Anatoly Melnikmanta parlarina. * Payqa Moldavia suyumanta. 12 watasniyoj kashajtin, autoridadesqa tatanta presochaspa carcelman aparqanku, chantá Siberia llajtaman aparqanku. Chaytaj wasinkumanta 7.000 kilometrospi jina kasharqa. Watanman jinataj, payta, mamanta, awelitosninta ima Siberiaman apallarqankutaj. Aswan qhepamantaj paykunaqa tantakuykunaman riyta aterqanku. Jinapis chayman chayanankupajqa, 30 kilometrosta jina manchay chiripi ritʼinta purinanku karqa. Aswan qhepaman, hermano Melnikqa kinsa watata carcelpi wisqʼasqa karqa. Chaypi kashajtintaj warmin Lidiyata, uj watayoj wawitantapis mana rikorqachu. Tukuy chay llakiykunapi watasta kaspapis, hermano Anatolywan familianwanqa Jehová Diosta sirvillarqankupuni. Kunantaj hermano Anatolyqa 82 watasniyojña, Asia Centralpi kaj sucursalpa comitenpitaj yanapakushan. Noqanchejpis hermano Anatoly jina, señoran jinataj, “mana saykʼuspa” Jehová Diosta tukuy sonqo sirvinallapuni (Gál. 6:9).

WIÑAY KAUSAYPI YUYANALLAPUNI

14. ¿Imatataj Pablo tʼinkanta japʼinanpaj ruwanan karqa?

14 Apóstol Pabloqa yacharqa, wañupunankama Diosta sirvinanta, tʼinkantataj japʼinanta. Ajllasqa cristiano kasqanrayku, paypa tʼinkanqa “cielopi kausay” karqa. Jinapis chayta japʼinanpajqa kallpachakunallanpuni karqa (Fili. 3:14). Pabloqa munarqa Filiposmanta cristianos yuyayninkuta tʼinkankupi churanankuta. Chayrayku uj kikinchaywan paykunata yanaparqa.

15. ¿Imaraykutaj Pablo Roma llajtayoj kaymanta parlarqa?

15 Apóstol Pabloqa Filiposmanta cristianosman “cielopi llajtayoj” kasqankuta yuyaricherqa (Fili. 3:20). ¿Imaraykutaj chayta mana qonqanankuchu karqa? Chay tiempopi Roma  llajtayoj runasqa, * allinpaj qhawasqa karqanku, ashkha derechosniyojtaj karqanku. Ajllasqa cristianostajrí “cielopi llajtayoj” karqanku. Chaytaj Roma llajtayoj kaymanta nisqaqa, aswan sumaj karqa. Imajtinchus paykunaqa, aswan sumaj imasta japʼinanku karqa. Chayrayku Pabloqa Filiposmanta cristianosman nerqa: “Cristomanta sumaj willaykunata willajkuna jina kausaychej”, nispa. “Kausaychej” nispaqa, cielopi llajtayojkuna jina kausanankuta nisharqa (Fili. 1:27). Kay tiempomanta ajllasqa cristianospis, cielopi tʼinkankuta japʼinankupaj, mayta kallpachakushallankupuni. Paykunamantataj mayta yachakusunman.

16. Premionchej cielopi kausay chayri kay jallpʼapi wiñay kausay kajtinpis, ¿imatataj Filipenses 4:6, 7 nisqanman jina ruwanallanchejpuni tiyan?

16 Premionchej cielopi kausay chayri kay jallpʼapi wiñay kausay kajtinpis, chayta japʼinanchejkama kallpachakunallanchejpuni tiyan. Kausayninchejpi ima llakiykunata aguantaspapis, “ñaupaj imasta” qonqaspa ñaupajman rinallapuni. Amataj saqenachu imapis pantachinawanchejta (Fili. 3:16). Ichá imastachus suyakusqanchej manaraj juntʼakunchu, chayri kallpanchej pisiyapun. Manachayrí ashkha watastaña llakiykunata aguantashanchej chayri qhatiykachasqa kashanchej. Imayna kajtinpis ama imamantapis llakikunachu. Astawanpis Diospa yanapayninta tukuy sonqo mañakuna. Paytaj sonqo tiyaykuyta qowasunchej, mayqentachus runas mana entiendeyta atinkuchu, chayta (Filipenses 4:6, 7 leey).

17. ¿Imatataj qhepan yachaqanapi yachakusun?

17 Atipanakupi correjkunaqa, maymanchus chayananku kashan chayman chayashajtinku, astawan kallpachakunku. Noqanchejpis premionchejta japʼinanchejpajña kashanchej. Chayrayku premionchejta japʼinanchejkama tukuy atisqanchejta kallpachakunallapuni. ¿Imatataj ruwasunman mana saykʼuspa ñaupajman rinallapajpuni? Qhepan yachaqanapi yachakusun, imastachus kausayninchejpi ñaupajman churana kasqanta, imaynatachus “aswan allin” imasta reparanata ima (Fili. 1:9, 10).

79 TAKIY Yachakojkunata kallpachariy

^ párr. 5 Jehová Diosta unaytaña yupaychaspapis chayri manapis, payta astawan sumajta yupaychanapaj, wiñay tukusqa cristianos kanapaj ima kallpachakunallanchejpuni tiyan. Apóstol Pabloqa filipensesman qhelqasqan cartapi, cristianosta atipanakupi correjkunawan kikincharqa. Paykunamantaj ama saykʼunankuta nerqa. Chay cartaqa noqanchejtapis aguantanallapajpuni yanapawasun. Kay yachaqanaqa, Pabloj nisqanman jina ruwanapaj yanapawasun.

^ párr. 11 Hermanonchej Arthur Secordpa experienciantaqa, 1 de noviembre de 1965 watamanta La Atalaya revistaj 668-671 paginasninpi leeriy.

^ párr. 15 Filipos llajtaqa Romaj japʼiyninpi kasharqa. Chaypi tiyakoj runastaj, Roma llajtayojkuna jinallataj wakin derechosniyoj karqanku. Chayrayku Filiposmanta cristianosqa, Pabloj kikinchayninta sumajta entienderqanku.