Ir al contenido

Ir al índice

¿Imaraykutaj viejoyanchej wañunchejtaj?

¿Imaraykutaj viejoyanchej wañunchejtaj?

DIOSQA mana munarqachu runas wañunankuta. Diosqa Adanta Evatawan mana juchayojta ruwarqa. Paykunaqa cuerponkupi, yuyayninkupipis mana pantayniyoj karqanku. Kunankamapis kausashallankumanpuni karqa. Imajtinchus Jehová Diosqa paykunaman nerqa Edén huertapi kaj uj sachʼamanta mana mikhunankuta.

Dios nerqa: “Chay sachʼaj poqoynintachus mikhunki chayqa, wañunki”, nispa (Génesis 2:17). Adán viejoyaspa, wañunanpaj ruwasqa kanman karqa chayqa, Diospa nisqanqa qhasilla kanman karqa. Adanqa yacharqa chay sachʼamanta mikhojtin wañunanta.

DIOSQA MANA MUNARQACHU RUNAS WAÑUNANKUTA

Adanwan Evawanqa kausanankupaj mana chay sachʼamantapunichu mikhunanku karqa. Imajtinchus Edén huertapeqa imaymana poqoyniyoj sachʼas karqa (Génesis 2:9). Mana chay sachʼaj poqoyninta mikhuykuspaqa, Diosta kasukunkuman karqa. Kasukuspataj rikuchinkuman karqa, Dioslla derechoyoj kasqanta imatachus ruwanankuta ninanpaj.

¿IMARAYKUTAJ ADANWAN EVAWAN WAÑORQANKU?

Imaraykuchus Adanwan Evawan wañusqankuta yachanapajqa, qhawarina imatachus Satanás Edén huertapi Evaman nisqanta. Chayraykutaj kunankama ñakʼarishanchej. Satanasqa uj katarinejta Evaman llullakorqa. Bibliaqa nin: “Katareqa may jina yuyaysapa karqa, Tata Diospa tukuy monte animalesta ruwasqasninmanta nisqaqa. Chantá payqa warmita taporqa: Huertapi kaj tukuynin sachʼaspa poqoyninta ama mikhunkichejchu, nispachu Diosqa nisunkichej?”, nispa (Génesis 3:1).

Chantá Eva nerqa: “Atiyku mikhuyta tukuynin sachʼaspa poqoyninta. Huerta chawpipi kaj sachʼallamanta Diosqa niwayku amapuni mikhunaykuta, ni llojchirinallaykutapis. Chaymantachus mikhunkichej chayqa, wañunkichej, niwayku”, nispa. Kataritajrí Evaman nerqa: “Mana wañunkichejchu. Dios allinta yachan, chay sachʼaj poqoyninta mikhuspa, sumaj yachayniyojman tukunaykichejta. Ajinamanta chaywan qankunaqa Dios jina kankichej, yachankichejtaj imachus allin kajta, mana allin kajtapis”, nispa. Ajinamantataj Satanasqa nisharqa Jehová Dios llulla kasqanta, allin imasmantataj paykunata jarkʼashasqanta (Génesis 3:2-5).

Evaqa Satanasta creeykorqa. Chantá sachʼata qhawarispa, mikhunapaj jina moqʼey kasqanta repararqa, ujnin poqoyninta pʼitispataj mikhuykorqa. Imachus chaymanta pasasqanmantataj Biblia nin: “Qosanmampis jaywarqa, paypis mikhuykullarqataj”, nispa (Génesis 3:6).

Diosqa Adanman nerqa: “Chay sachʼaj poqoynintachus mikhunki chayqa, wañunki”, nispa (GÉNESIS 2:17).

Diosqa maytapunichá llakikorqa munasqa wawasnin mana kasusqankumanta. Chayrayku Jehová Diosqa Adanman nerqa: “Jumpʼi suruyta llankʼanki mikhunaykipaj, ñutʼu jallpʼaman tukunaykikama, imaraykuchus jallpʼamanta ruwasqa kanki. Jallpʼa kanki, jallpʼallamantaj kutinki”, nispa (Génesis  3:17-19). Ajinapunitaj karqa. “Adanqa kawsarqa tukuynimpi jisqʼon pachaj kinsa chunkayoj watasta. Chay chhika watasniyoj wañuporqa” (Génesis 5:5). Adanqa wañuspa mana cielomanchu nitaj waj lugarmanchu riporqa. Jehová Diosqa Adanta ñutʼu jallpʼamanta ruwarqa. Chaymantaraj Adanqa kausayta qallarerqa. Adanqa wañupuspa watejmanta jallpʼaman tukuporqa. Chayqa may llakiypuni karqa.

¿IMARAYKUTAJ JUCHASAPAS KANCHEJ?

Adanwan Evawanqa Diosta mana kasukusqankurayku manaña cheqan runaschu karqanku, niñataj wiñaypaj kausayta aterqankuchu. Chay kutimantapachataj pantaj runasman, juchasapasmantaj tukorqanku. Chaywanpis mana paykunallachu ajina llakiypi rikukorqanku, juchankutaqa wawasninkumanpis herenciata jina saqerqanku. Romanos 5:12 nin: “Uj runanejta jucha kay mundoman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku”, nispa.

Bibliaqa nin wañuy tukuy llajtasta qhataykusqanta, tukuy nacionestataj uj manta jina qhataykusqanta (Isaías 25:7). Chay mantaqa tukuy runasta qhataykun, nisunman venenoyoj qʼoshñi jina tukuynejman chayan. Chay qʼoshñimantataj ni pi ayqeyta atinchu. Arí ‘Adannejta tukuy runas wañushanku’ (1 Corintios 15:22). Chayrayku noqanchejpis apóstol Pablo jina tapukunchej: “¿Pitaj wañuyman pusaj cuerpoymanta kacharichiwanqari?”, nispa. ¿Pitaj wañuymanta kacharichiwasunman? (Romanos 7:24).