Estados Unidos

Galaad Escuela (Patterson, New York)

Panamá

Jehovaj testigosnenqa, unaymantapachaña imaymana escuelasta wakichinku. Jinamantataj Diospa Reinonmanta willaypi tukuy tiemponkuta churajkunata, ruwanankuta “allinta juntʼa[nankupaj]” yanapanku (2 Timoteo 4:5).

Precursorespaj Escuela. Kay escuelamanqa, uj watataña precursor regular kajkunata wajyarikun. Ruwakuntaj 6 pʼunchayta wasinkumanta qaylla Tantakuna Wasipi. Kay escuelaqa precursoresta yanapan: 1) Jehová Diosman astawan qayllaykunankupaj, 2) aswan sumaj willajkuna kanankupaj, 3) chay sumaj ruwaypi kanallankupajpunitaj.

Reinomanta Willajkunapaj Escuela. Kay escuelamanqa, unaytaña precursores kajkunata 2 killapaj wajyarikun, pikunachus wasinkuta saqespa mayllamanpis willaj rinapaj wakichisqa kanku chaykunata. Chay hermanosqa may Sumaj Willaj Jesucristo jina ruwanku. Ninkutaj: “Kaypi kani, noqata kachaway ari”, nispa (Isaías 6:8; Juan 7:29). Karusman ripuspaqa, ichapis pisi imasllawan kausayman yachakunanku kanqa. Ichá yachakunallankutaj kanqa, waj laya ususman, chiriman, sinchʼi qʼoniman, waj jina mikhunasman ima. Wakin kutistaj, mosoj qalluta yachakunanku kanqa. Kay escuelamanqa, 23 watasniyojmanta 65 watasniyojkama casarasqas, mana casarasqa hermanas, hermanos riyta atinku. Chay escuelataj, Diospa llajtanpi ruwanankuta sumajta juntʼanankupaj yanapan. Chantapis Jehovapaj, llajtanpajwan astawan ruwanankupaj chay hermanosta wakichin.

Galaad Escuela. “Galaad” palabraqa, hebreo parlaypi “rumi qotu señal” niyta munan. Kay escuela 1943 watapi qallarisqanmantapacha, 8.000 kuraj misioneros “tukuy kay pachapi runasman” Diosmanta willanankupaj kachasqas kanku (Hechos 13:47). Chay ruwakusqantaj mana qhasipajchu karqa. Ñaupaj misioneros Peruman chayashajtinku, ni uj qotuchakuyllapis karqachu, kunantaj 1.000 kurajña tiyan. Japonman chayashajtinkutaj, ni 10 testigospis chay suyupi karqachu, kunanrí 200.000 kurajña kan. Chay escuelaman rejkunaqa, Diospa Palabranta phishqa killasta sumajta ukhunchanku. Chaymantaj wajyarikun: precursores especialesta, misionerosta, sucursalespi llankʼajkunata, superintendentes kajkunatapis. Chaypi yachakusqankutaj, Diosmanta Jallpʼantinpi willakunallanpajpuni sumajta yanapanankupaj wakichin.

  • ¿Imapajtaj wakichikun Precursorespaj Escuela?

  • ¿Pikunatataj Reinomanta Willajkunapaj Escuelaman wajyarikun?