Ir al contenido

Ir al índice

 20 YACHAQANA

¿Imastataj ruwanku Diospa Llajtanta Kamachejkuna?

¿Imastataj ruwanku Diospa Llajtanta Kamachejkuna?

Ñaupa tiempopi Diospa llajtanta kamachejkuna

Diospa llajtanta kamachejkunaj cartankuta leeshanku

Ñaupa tiempopi, Jerusalenmanta “apostoleswan ancianoswan ima”, uj junta directiva jina karqanku. Paykunaqa tukuy congregacionespa sutinpi imatapis ajllaj kanku (Hechos 15:2). Uj yuyayllaman chayanankupajtaj, Diospa Palabranta estudiaj kanku, Diospa atiyninwantaj yanapachikoj kanku (Hechos 15:25). Kay tiempopipis kikillantataj ruwakun. Chay junta directivataqa, Diospa Llajtanta Kamachejkuna sutiwan rejsikun.

Diosqa paykunanejta munayninta ruwan. Diospa Llajtanta Kamachejkunaqa Bibliata sumajta estudianku. Paykunaqa Diospa llajtanta ñaupajman apanankupaj sumaj wakichisqa kanku, imaynatachus Jehová Diosta yupaychaytataj yachachiwanchej. Paykunaqa jallpʼantinpi hermanos imastachus necesitasqankuta qhawarinankupaj sapa semana tantakunku. Apostolespa tiemponkupi jinataj, imatachus ruwananchejta niwanchej cartanejta, congregacionesta waturejkunanejta, waj hermanosnejta ima. Ajinamanta Diospa llajtan ujchasqa kananpaj, uj yuyayllataj imatapis ruwananpaj yanapanku (Hechos 16:4, 5). Chantapis Bibliamanta yachachiykunata wakichinku, Diospa Gobiernonmanta willayta ñaupajman apanku, ñaupajman apaj hermanosta churakusqanta ima qhawarinku.

Diospa atiyninwan yanapachikunku. Diospa Llajtanta Kamachejkunaqa, Tukuyta Kamachej Jehová Diospa yanapayninta, Jesuspa yanapayninta ima maskʼanku. Jesustaj congregacionpa Uman (1 Corintios 11:3; Efesios 5:23). Paykunaqa mana yuyakunkuchu Diospa llajtanpi kajkunaj patronesninku kasqankuta. Astawanpis, ajllasqa hermanosninku jinallataj ‘Corderoj qhepanta rishanku mayllamanpis rejtin’ (Apocalipsis 14:4). Diospa Llajtanta Kamachejkunaqa Jehová Diosmanta paykunapaj mañapusqanchejmanta mayta agradecekunku.

  • Ñaupa tiempomanta cristianosta, ¿pikunataj kamachej kanku?

  • Diospa Llajtanta Kamachejkuna, ¿imaynatá Jehová Diospa yanapayninta maskʼanku?