Ir al contenido

Ir al índice

38 yachachiy: Chunka iskayniyuq watiqaqkuna

38 yachachiy: Chunka iskayniyuq watiqaqkuna
Watiqaq israelitas fruta liqrarisqa

QHAWARIY kay runakuna jap’ichkasqankuta. Qhawariy chay uvasta, iskay qhari juk k’aspipi jap’inanku tiyan. Higota, granadata ima qhawarillaytaq. ¿Maymanta kay sumaq puquykunata apamurqanku? Canaán jallp’amanta. Yuyarinkichu Abraham, Isaac, Jacob ima, Canaanpi tiyakusqankuta. Jacobqa juk yarqhay kasqanrayku familiantin Egiptoman ripurqa. Kunantaq 216 watanman, Moisés israelitasta Canaaman kutichirqa. Israelitasqa Cades ch’aki jallp’api chachkarqanku.

Canaán jallp’apiqa saqra runas tiyakurqanku. Chayrayku Moisesqa 12 runata watiqaqta kacharqa: ‘Achkhachus atiyniyuqchus kasqankuta qhawamuychik. Jallp’apis tarpunapaq sumaqchus kasqanta qhawamuychik. Manataq puquykunata apamuyta qunqaychikchu’, nispa.

Watiqaqkuna Cadesman kutiytawan Moisesta nirqanku: ‘Chiqamanta chay llaqtaqa may sumaq kasqa’, nispa. Chayta rikuchinankupaqtaq puquykunata aparqanku. Chanta 10 watiqaqkunaqa nirqanku: ‘Chaypi tiyakuqkuna may jatuchaq, may kallpayuqtaq kanku. Llaqtanta qhichunayaptinchikqa, wañuchiwasunchik’, nispa.

Israelitas kayta uyarispaqa mancharikurqanku. ‘Allin kanman karqa Egiptopi wañunanchik, chayri ch’in pampapipis. Kunanqa maqanakuypi wañusunchik, chantapis warmisninchik, wawasninchik ima, jap’ichikunqanku. ¡Moisés kananmantaqa, juk kuraq runata akllanachik, Egiptoman kutipunapaq!’, nispa nirqanku.

Iskay watiqaqkunaqa Jehovapi suyakurqanku. Llaqtata thasnuchiyta munarqanku. Paykuna Josué, Caleb sutikunku, nirqankutaq: ‘Ama manchachikuychikchu. Jehová ñuqanchikwan kachkan. Atillasunchik atipayta’, nispa. Llaqtaqa mana uyarispa, Josueta Calebtawan wañuchinayarqanku.

Jehovaqa mayta phiñakurqa, chayrayku Moisesta nirqa: ‘Mana pipis 20 watamanta pataman, nitaq aswan watayuqpis Canaán llaqtaman yaykunqachu. Egiptopi, ch’aki pampapipis milagrosta ruwasqayta rikurqanku, chaywanpis manaraq ñuqapi suyakunkuchu. Chayrayku 40 watata kay ch’aki pampapi purinqanku qhipa kaq wañunankama. Josuella Calebwan Canaán jallp’aman yaykunqanku’, nispa.

Números 13:1-33; 14:1-38.



Tapuykuna

  • ¿Imatataq chay uvakunamanta niwaq? ¿Maymantá apamunku?
  • ¿Imaraykutaq Moisés 12 runata Canaán llaqtaman watiqaq kachan?
  • ¿Imatataq 10 watiqaqkuna kutimuytawan ninku?
  • ¿Imaynatá 2 watiqaqkuna Jehovapi suyasqankuta rikuchinku, ima sutikunku?
  • ¿Imaraykutaq Jehová phiñakun, imatataq Moisesman nin?

Wak tapuykuna

  • Números 13:1-33 ñawiriy.

    ¿Pikunatataq chay jallp’ata watiqanankupaq akllarqanku, imatataq paykuna ruwananku karqa? (Núm. 13:2, 3, 18-20.)

    ¿Imaraykutaq Josué Calebwan mana chay 10 runajinachu yuyarqanku, imatataq chay yachachiwanchik? (Núm. 13:28-30; Mat. 17:20; 2 Cor. 5:7.)

  • Números 14:1-38 ñawiriy.

    ¿Bibliamanta ima k’amiriykunatataq kasukunanchik tiyan, mana Diospa churasqan runap wasanmanta parlanapaq? (Núm. 14:2, 3, 27; Mat. 25:40, 45; 1 Cor. 10:10.)

    Números 14:24 nisqan, ¿imaynatá Jehová ñuqanchikmanta interesakusqanta yachachiwanchik? (1 Rey. 19:18; Pro. 15:3.)