EDÉN huertamanta jawapi may phutiy kawsay qallarirqa. Adán Evawan mikhunankupaq sinchita llamk’ananku karqa. Misk’i puquyniyuq sach’as wiñananmantaqa, khichkas, qhipus ima, wiñarqanku. Adán Evawan mana Diosta kasukusqankurayku, paymanta karunchakusqankurayku, chayjina kawsayta tarikurqanku.

Adan, wawanwan sinch’ita llamk’achkan

Astawanraq, Adanwan Evawan wañuyta qallarirqanku. Yuyariy, Diosninchikqa, ‘mana mikhunamanta sach’ap puquyninta mikhunkichik chayqa wañunkichik’, nispa nirqa. Chayrayku mikhusqankumantapacha wañuyta qallarirqanku. ¡Diosta wasanchaspaqa, wampu runajina ruwarqanku!

Chay sumaq huertamanta wikch’uchikuytawan, Adán Evawan wawayuq karqanku. Chayrayku wawasninkupis machuyaspa wañunallankutaq karqa.

Adán Evawan Jehovatachus kasukunkuman karqa, may kusisqa wawasninkuwan wiñaypaq kawsankuman karqa. Mana machuyankumanchu karqa, mana unqunkumanchu karqa, nitaq wañunkumanchu karqa.

Diosninchikqa tukuy runa wiñaypaq kusisqa kawsakunanta munan. Paytaq chay munasqan junt’akunanpaq parlanña. Mana Jallp’allachu k’achitu kanqa, manaqa runapis manaña unqunqachu. Chantapis, tukuy puraqmanta munanakunqanku, Dioswantaq sumaqta masinchakunqanku.

Eva wawasninwan

Evaqa Diosta wasanchasqanrayku manaña Diospa munasqa masin karqachu. Chayrayku nanaywan wawatapis nacechikurqa. Chiqamanta nisunman, mana Diosta kasukusqankurayku mayta ñak’arirqanku. ¿Jina kasqantachu niwaq?

Adán Evawan mirayta qallarirqanku. Kuraq wawanta Caín nispa suticharqanku, qhipan wawantataq Abel nispa suticharqanku. ¿Paykunamanta yachayta munawaqchu?

Génesis 3:16-23; 4:1, 2; Apocalipsis 21:3, 4.



Tapuykuna

  • ¿Imaynatá Edén huertamanta wikch’uchikuytawan Adán Evawan kawsarqanku?
  • ¿Adán Evawan imanakuyta qallarirqanku, imaraykutaq?
  • ¿Imaraykutaq wawasninpis machuyananku karqa?
  • Adanwan Evawan kasukunkuman karqa chayqa, ¿imaynatá paykuna wawasninwan ima kawsankuman karqa?
  • ¿Imaynatataq Eva juchallikusqanmanta ñak’arirqa?
  • ¿Imataq iskaynin ñawpa kaq churisnin sutichakurqanku?
  • ¿Pikunataq kay dibujitumanta wawas kanku?

Wak tapuykuna

  • Génesis 3:16-23; 4:1, 2 ñawiriy.

    Juchallikusqanrayku, ¿imatataq Adán mikhunanpaq ruwanan karqa? (Gén. 3:17-19; Rom. 8:20, 22.)

    ¿Imaraykutaq Eva suti allin karqa, imatá “kawsaq” niyta munan? (Gén. 3:20.)

    ¿Imaynatá Adanwan Evawan juchallikuptinkupis, Jehová paykunamanta khuyakurqa? (Gén. 3:7, 21.)

  • Apocalipsis 21:3, 4 ñawiriy.

    ¿Mayqin ‘ñawpa kaq imastaq’ chinkananta munawaq?