Ir al contenido

Ir al índice

1 yachachiy: Diosninchik ruwayta qallarin

1 yachachiy: Diosninchik ruwayta qallarin

TUKUY allinkunaqa Diosninchikmanta jamun. Intita p’unchaypi k’anchananpaq ruwan. Killata, ch’askakunata ima, tutapi k’anchanankupaq ruwan. Jallp’atataq runa tiyakunanpaq ruwan.

Chaywanpis mana Intitachu nitaq Killatachu ñawpaqta ruwarqa, ¿imatataq ñawpaqta ruwarqari? Diosqa, payman rikch’akuq espiritukunata ñawpaqta ruwarqa. Paykunatapis Diostajina mana rikuyta atisunmanchu. Bibliaqa paykunata angelkuna nispa sutichan. Diosninchik angelkunata janaqpachapi tiyakunankupaq ruwarqa.

Qallariypiqa Diosninchik juk may munasqa angelta ruwarqa. Payqa Diospa kuraq churin karqa. Tatanwan llamk’arqa. Diosninchikta tukuy imata ruwayta yanaparqa. Kay churiqa Intita, Killata, ch’askasta, Jallp’ata ima ruwayta yanaparqa.

Qallariypi, ¿imaynataq Jallp’a karqari? Qallariypiqa mana pipis Jallp’api tiyakuyta atinmanchu karqa. Jallp’aqa yakuwan p’ampasqa karqa. Diosninchiktaq Jallp’api runa tiyakunanta munarqa. Chayrayku Diosninchik ñuqanchikpaq Jallp’ata wakichiyta qallarirqa. ¿Imatataq ruwarqa?

Qallarinapaqqa Jallp’api mana k’anchay karqachu, chayrayku Diosninchik Intiwan Jallp’ata k’anchachirqa, jinamanta p’unchay, tutapis kananpaq. Chaymanta Diosninchik mama quchamanta ch’aki jallp’ata rikhurichirqa.

Kay dibujitupi rikunchikjina, qallariypiqa mana imapis Jallp’api karqachu. Mana t’ikitas, sach’as nitaq animalkunapis karqachu. Mama quchapipis mana challwakuna karqachu. Runakuna, animalkuna ima, Jallp’api allinta tiyakunankupaqqa Diosninchik maytaraq llamk’anan karqa.

Jeremías 10:12; Colosenses 1:16; Proverbios 8:22; Génesis 1:1-10

Mana kasanapaqjina Jallp’a


Tapuykuna

  • ¿Maymanta kutuy allin kaq jamun? ¿Diospa ruwasqanmanta parlariwaqchu?
  • ¿Imatataq Diosninchik ñawpaqta ruwarqa?
  • ¿Imaraykutaq ñawpaq kaq ángel may munasqa karqa?
  • Imaynachus qallariypi Jallp’a kasqanta sut’inchay (Dibujituta qhawariy).
  • ¿Imaynatá Diosninchik animalespaq runaspaq ima, Jallp’ata wakichiyta qallarirqa?

Wak tapuykuna

  • Jeremías 10:12 ñawiriy.

    ¿Ima Diospa k’acha kaynintataq ruwasqanpi rikunchik? (Isa. 40:26; Rom. 11:33.)

  • Colosenses 1:16 ñawiriy.

    ¿Imatá Jesús tukuy ima ruwakuchkaptin Tatanta yanaparqa? Chayta yachaspa, ¿imaynatá payta qhawananchik tiyan?

  • Génesis 1:1-10 ñawiriy.

    ¿Imaynatá Jallp’a rikhurirqa? (Gén. 1:1.)

    ¿Imatataq ñawpaq kaq p’unchaypi ruwakun? (Gén. 1:3-5.)

    ¿Imatataq iskay kaq p’unchaypi ruwakun? (Gén. 1:7, 8.)