JOSEQA 17 watayuq karqa Egiptoman apachkaptinku. Chaypiqa Potifar nisqa runaman ranqhaykurqanku. Potifarqa Egiptomanta reypaq llamk’aq, Faraón nisqapaq.

José carcelpi kachkan

Joseqa Potifarpaq sumaqta llamk’aq. Chayrayku Potifarqa, Joseta wasinpi kamachinanpaq churarqa. Jina kaptinqa, ¿imaraykutaq José wisq’asqa kachkan? Potifarpa warminrayku.

José runayaspa k’achitu waynaman tukun, Potifarpa warmintaq Josewan puñuykuyta munarqa. Joseqa chay ruway mana allin kasqanta yacharqa, chayrayku mana chay warmiwan puñuykuyta munarqachu. Chay warmiqa mayta phiñakurqa. Chayrayku qusanman llullakuspa nirqa: ‘¡Chay Joseqa ñuqawan puñuykuyta munarqa!’, nispa. Potifarqa warminta uyarispa mayta Josewan phiñakurqa. Chayrayku Joseta wisq’aykuchirqa.

Carcelta qhawaq runaqa, José chiqan runa kasqanta rikun. Chayrayku Joseta presosta qhawananpaq churan. Chaypacha Faraonqa coperonwan, t’antata ruwaqninwan ima phiñakuspa wisq’aykuchillarqataq. Juk ch’isi paykuna musquykukurqanku, manataq musquyninku niyta munasqanta yacharqankuchu. Q’ayantin José paykunata nirqa: ‘Willawaychik musqukusqaykichikta’, nispa. Josetaq Diospa yanapayninwan imachus musquyninku kasqanta willarqa.

José coperota nirqa: ‘Kimsa p’unchaymantawan carcelmanta lluqsinki, juktawan Faraonman vinota jaywanki’. Chayrayku José nirqa: ‘Lluqsiptiyki, ñuqamanta Faraonman willariy, jinamanta ñuqapis lluqsipunaypaq’, nispa. T’antata ruwaqmanri nirqa: ‘Kimsa p’unchaymanta Faraón umaykita qhuluchisunqa’, nispa.

Kimsa p’unchayninman José nisqanqa junt’akurqa. Faraonqa t’antata ruwaqta wañuchirqa. Coperotataq carcelmanta kacharichiytawan llamk’ayninta kutichipurqa. ¡Coperoqa Josemanta qunqapurqa! Mana Faraonman Josemanta parlarqachu. Joseqa wisq’asqallapuni qhipakurqa.

Génesis 39:1-23; 40:1-23.



Tapuykuna

  • ¿Machkha watayuqtaq José Egiptoman chayan, imatataq chaypi ruwarqa?
  • ¿Imaraykutaq José wisq’achikun?
  • ¿Ima ruwaytataq Joseman wisq’asqa kachkaptin qurqanku?
  • ¿Imatataq José t’antata ruwaqpaq, coperopaq ima ruwarqa?
  • ¿Imatá copero carcelmanta lluqsiytawan qunqarqa?

Wak tapuykuna

  • Génesis 39:1-23 ñawiriy.

    Josep tiemponpi manapis khuchichakuymanta ley kaptinpis, ¿imaraykutaq José Potifarpa warminmanta ayqirqari? (Gén. 2:24; 20:3; 39:9.)

  • Génesis 40:1-23 ñawiriy.

    ¿Imatataq copero musqurqa, imatataq Jehová Joseniqta payman willarqa? (Gén. 40:9-13.)

    ¿Imatataq t’anta ruwaq musqurqa, imatataq niyta munarqa? (Gén. 40:16-19.)

    ¿Imaynatá kunan Diospa llaqtan Josejina ruwallantaq? (Gén. 40:8; Sal. 36:9; Juan 17:17; Hech. 17:2, 3.)

    ¿Imatataq Génesis 40:20 diachakuymanta yachachiwanchik? (Ecl. 7:1; Mar. 6:21-28.)