¡KAY wayna imayna llakisqachus kasqanta qhawariy! José sutikun. Wawqisnin Egiptoman richkaqkunaman ranqharpanku. Joseqa Egiptopi runap kamachin kanqa. ¿Imarayku wawqisnin chayta ruwarqanku? Payta chiqnisqankurayku.

Joseta hermanosnin vendechkanku

Jacobqa Joseta anchata munakuq. Chaytataq may k’achita p’achata ruwapuspa rikuchirqa. Tatanku Joseta mayta munakusqanta rikuspa, 10 wawqisnin Joseta chiqniyta qallarirqanku. Chantapis Josewan qhawanakullarqankutaq.

Joseqa iskay kutita musqukurpa, chaypitaq wawqisnin paypa ñawpaqinpi qunqurikusqankuta rikusqa. Chayta José wawqisninman willarirqa, chayrayku paykunaqa astawan Josewan phiñakurqanku.

Juk p’unchay Josep kuraq wawqisnin ovejasta michichkaptinku, Jacobqa wawqisninta watukamunanpaq Joseta kacharqa. Wawqisnin chayamuqta rikuspa nirqanku: ‘¡Jaku, payta wañuchinachik!’, nispa. Kuraq wawqin Rubentaq nin: ‘¡Ama wañuchinachu!’, nispa. Chayrayku, mana wañuchirqankuchu manaqa, juk ch’aki pukyuman wikch’uykurqanku. Chaymanta, chukuspa imatachus Josewan ruwanankuta rimayta qallarinku.

Chayllapi juk ismaelitas chay niqta purichkarqanku. Judataq nirqa: ‘Jaku ismaelitasman payta vendeykuna’, nispa. Chaytataq ruwarqanku, Joseta 20 phisu phatallapi ranqharpanku. Chaytaqa mana sunquyuq runajina ruwanku.

¿Imatataq tatankuman ninkuman karqa? Juk cabrata wañuchispa Josep p’achasninta yawarpi chhapuykurqanku. Chaytataq tatanku Jacobman aparqanku, nirqankutaq: ‘Kayta tariyku; qam allinta riqsiy, wawaykip p’achanchus manachus, chayta, nispa’.

Jacob chayta rikuytawan nin: ‘Ima saqra animalchari wawaytaqa mithaspa, mikhuykun’, nispa. Chaytapuni Josep wawqisnin tatan yuyananta munarqanku. Jacob mayta llakikuspa unayta waqan. Joseqa mana wañurqachu. Qhawarina imachus paymanta karqa.

Génesis 37:1-35



Tapuykuna

  • ¿Imaraykutaq wawqisnin Joseta chiqninku, imatataq paykuna ruwarqanku?
  • ¿Imatataq wawqisnin Josewan ruwayta munanku, chaywanpis imatataq Rubén nirqa?
  • ¿Imatataq paykuna ruwarqanku ismaelitakunawan tinkuspa?
  • ¿Imatataq Josep waqisnin ruwanku, tatan José wañusqanta ninanpaq?

Wak tapuykuna

  • Génesis 37:1-35 ñawiriy.

    ¿Imaynatá cristianokuna Josejina ruwankuman qutuchakuykunapi pipis mana allinta ruwaptin? (Gén. 37:2; Lev. 5:1; 1 Cor. 1:11.)

    ¿Imaraykutaq wawqisnin Joseta wasancharqanku? (Gén. 37:11, 18; Pro. 27:4; Sant. 3:14-16.)

    ¿Imatataq Jacob nanachikusqanrayku mana p’inqakusqa ruwan? (Gén. 37:35.)