¿DIBUJITUPI rikhuriq warmita riqsinkichu? Rebeca sutikun. Pimanchus chimpaykuchkan chay qhariqa Isaac sutikun. Rebecaqa Isaacwan casarakunqa. ¿Imaynataq chay?

Isaacpa tatanqa, juk k’acha warmita wawanpaq munarqa. Mana Canaanmanta warmiwan casarakunanta munarqachu, imaraykuchus chay runakunaqa lantista yupaychaq kanku. Chayrayku Abrahamqa kamachinta waqyaspa nirqa: ‘Harán llaqtayman riy. Aylluy ukhumanta churiy Isaacpaq juk warmita mask’amuy’, nispa.

Abrahampa kamachinqa 10 camellosta wakichikuytawan karu llaqtaman rirqa. Abrahampa unay llaqtanman chayachkaspa, juk pukyupi samarirqa. Ch’isiyachkaptinña llaqtamanta warmikuna chay pukyumanta yakuta urqhuq rirqanku. Chayrayku Abrahampa kamachinqa Diosmanta mañakuspa nirqa: Ima warmicha ñuqapaq, camellosniypaq ima, yukuta urqhunqa chayqa, chaymin Isaacpa warmin kanqa, nispa.

Rebeca, Isaacta riksichkan

Chayllapi Rebeca yakuta urqhunanpaq rikhurimun. Abrahampa kamachin yakuta mañarikuptintaq yakuta jaywarqa, chaymantataq ch’akisqa camellosninpaqpis yakuta urqhupullarqataq. Maytacha chayta ruwaspa sayk’uykurqa, imaraykuchus ch’akisqa camellosqa achkha yakuta ukyanku.

Rebeca yakuta urqhuyta tukuchkaptin Abrahampa kamachinqa tatanpa sutinta tapurirqa. Chantapis, wasiykipi qhipakuyta atiymanchu, nispa nirqa. Rebecataq nirqa: ‘Ñuqaqa Betuelpa ususin kani, wasiykupi puñukuyta atinkichik’, nispa. Abrahampa kamachin Betuel Nacorpa wawan kasqanta yacharqa, Nacortaq Abrahampa waqin karqa. Chayrayku Abrahampa ayllunta tarisqanrayku qunqurikuspa Jehovata pachis nirqa.

Chay ch’isi Abrahampa kamachinqa Betuelta, Rebecap turanta Labanta ima, imapaqchus jamusqanta willarqa. Iskayninkuqa, Rebeca Isaacwan casarakuq riyta atisqanta nirqanku. ¿Rebeca Isaacwan casarakuyta munarqachu? Ari, paypis casarakusaq, nispa nirqa. Chayrayku q’ayantinpacha camellosninpi Canaanman rirqanku.

Abrahampa wasinman chayachkaptinku laqhayaykurqaña. Rebecataq juk qharita purichkaqta rikuspa qayllaykurqa. Chay qhariqa Isaac karqa, Rebecata rikuspataq kusikurqa. Isaacqa, maman 3 watallaraq wañupusqanmanta kasqanrayku phutisqa kachkarqa. Isaacqa Rebecata riqsiytawan mayta munakurqa. Watiqmantataq kusirikuyta qallarirqa.

Génesis 24:1-67.



Tapuykuna

  • ¿Pikunataq dibujitupi kay qhari kay warmi kanku?
  • ¿Imatataq Abraham churinpaq warmita taripunanpaq ruwarqa, imaraykutaq?
  • ¿Imaynatá Dios Abrahampa kamachin mañakusqanman kutichirqa?
  • ¿Imatataq Rebeca Isaacwan casarakuy niptinku kutichirqa?
  • ¿Imaptintaq Isaac watiqmanta kusirikurqa?

Wak tapuykuna

  • Génesis 24:1-67 ñawiriy.

    ¿Rebecap ima k’acha kaynintataq Abrahampa kamachin rikurqa? (Gén. 24:17-20; Pro. 31:17, 31.)

    Abraham Isaac casarakunanpaq ruwasqan, ¿imatataq yachachiwanchik? (Gén. 24:37, 38; 1 Cor. 7:39; 2 Cor. 6:14.)

    ¿Imaraykutaq Isaacjina t’ukurinanchikpaq, tiempochakunanchik tiyan? (Gén. 24:63; Sal. 77:12; Fili. 4:8.)