Samuel, Saul rey kananpaq aceitewan umanman surichichkan

SAMUEL kay runap umanman aceiteta suruchichkasqanta qhawariy. Kaytaqa pichus reyjina akllasqa kasqanta rikuchinapaq ruwaq kanku. Jehová Samuelta aceiteta Saulpa umanman suruchinanta kamachirqa. Kay acieteqa sumaq q’apayniyuq karqa.

Saulqa mana kamachiyta atinanta yuyarqa, ‘ñuqaqa Benjamín ayllumanta kani, aswan juch’uy ayllumanta. ¿Imaraykutaq rey kanki, nispa niwanki?’, nispa Samuelta nirqa. Jehová Saulta munakurqa mana jatunchakusqanrayku. Chayrayku rey kananpaq Saulta akllarqa.

Saulqa mana waqchachu, nitaq juch’uysituchu. Payqa juk qhapaq ayllumanta jamun, may k’achitu jatun runataq karqa. ¡Mayqin israelitamantapis juk umawanjina astawan jatun karqa! Saulqa sumaqta correq, may kallpayuqtaq karqa. Israelitasqa Diosninchik Saulta rey kananpaq akllasqanmanta kusikurqanku. Tukuytaq qhaparinku: ‘¡Jallalla, jallalla reyman!’, nispa.

Israelitaspa enemigosninqa kallpayuq kanku. Saúl rey kasqanmanta pisinman, amonitas paykunawan maqanakunankupaq wicharinku. Saulqa may chhika runasta tantaspa, amonitasta atiparqa. Llaqtaqa Saúl rey kasqanmanta kusikun.

Saulwan israelitaswan achkha maqanakuykunapi atiparqanku. Chantapis Saulpa juk sumaq churin kapurqa, Jonatán sutiyuq. Paypis israelitasta maqanakuypi atipanankupaq yanaparqa. Filisteosqa Israelpa aswan phiña enemigosnin kanku. Juk p’unchay israelitaswan may chhika filisteos maqanakuq wicharinku.

Samuelqa Jehovapaq uywata q’ulachiq jamunaykama suyawanki, nispa Saulta nirqa. Samuel mana usqhayta chayamuptin, Saulqa filisteos maqanakuyta qallarinankuta manchachikun, chayrayku ñawparpaspa pay kikin Jehovapaq q’ulachipun. Samuel chayaytawan mana kasukusqanrayku Saulta nirqa. Kunanqa: ‘Jehovaqa wak runata reytajina Israelman churanqa’, nispa.

Aswan qhipaman Saulqa manallataq kasukunchu. Samuel nirqa: ‘Chiqamanta aswan allin Jehovata kasunaqa, uywata wañuchisqa q’ulachinamanta nisqaqa. Mana Jehovata kasukusqaykirayku, payqa manaña Israelmanta reytajina jap’isunqachu’, nispa.

Kaymanta juk sumaq k’amiyta yachakusunman. Diostaqa tukuy imapi kasukunanchik tiyan. Chantapis Sauljina juk allin runaqa saqraman tukunman. ¡Mana jayk’aq chayman urmananchikchu tiyan! ¿Ichari?

1 Samuel, 9 t’aqamanta 11 t’aqakama; 13:5-14; 14:47-52; 15:1-35; 2 Samuel 1:23.



Tapuykuna

  • ¿Imatataq Samuel dibujopi ruwachkan, imaraykutaq?
  • ¿Imaraykutaq Jehová Saulta k’acha runatajina qhawan?
  • ¿Imataq Saulpa churin sutikun?
  • ¿Imaraykutaq Saúl mana Samuelta suyanchu uywata q’ulachinanpaq?
  • ¿Imatataq Saúl ruwasqanmanta yachakunchik?

Wak tapuykuna

  • 1 Samuel 9:15-21 chantapis 10:17-27 ñawiriy.

    ¿Imaynatá Saúl llamp’u sunqu kasqanrayku mana phiñakurqachu wak runakuna paymanta mana allinta parlaptinku? (1 Sam. 9:21; 10:21, 22, 27; Prov. 17:27.)

  • 1 Samuel 13:5-14 ñawiriy.

    ¿Imaynamantá Saúl Gilgalpi juchachakurqa? (1 Sam. 10:8; 13:8, 9, 13.)

  • 1 Samuel 15:1-35 ñawiriy.

    ¿Ima jatun juchapi Saúl urmarqa, Amalecmanta Agag reyninta mana wañuchispa? (1 Sam. 15:2, 3, 8, 9, 22.)

    ¿Imaynatá Saúl juchallikusqanmanta wakkunata tumparqa? (1 Sam. 15:24.)

    ¿Pipis k’amiwaptinchik imatataq yuyarinanchik tiyan? (1 Sam. 15:19-21; Sal. 141:5; Pro. 9:8, 9; 11:2.)