Ir al contenido

Ir al índice

96 yachachiy: Jesús unqusqasta jampin

96 yachachiy: Jesús unqusqasta jampin

JESÚS tukuyniqpi unqusqasta thañichirqa. Chay ruwasqan tukuyniqpi uyarikurqa. Chayrayku, runaqa cojosta, ciegosta, suchusta, wak unqusqastapis, Jesusman aparqanku thañichinanpaq.

Kimsa wata kuraqña Juan Jesusta bautizasqanmanta. Jesustaq apostolesninman, Jerusaleman rinanta, chaypitaq wañuchinankuta, kawsarimunanta ima nirqa. Chaykamataq unqusqasta jampichkallarqapuni.

Jesús juk unqusqa warmita thañichin

Juk kuti Jesusqa sábado p’unchaypi yachachichkarqa. Judiosqa sábado p’unchayta samarinankupaq t’aqarqanku. Dibujomanta warmiqa 18 watataña k’umpusqa kachkarqa, manataq chiqanyakuyta atirqachu. Jesústaq makinwan llukchiykuptin, ¡payqa thañikurqa!

Chay ruwasqanmanta sacerdotes phiñakurqanku. ‘Suqta p’unchay tiyan llamk’anapaqqa’, nispa runa ukhumanta sacerdote qhaparimurqa. ‘¡Chay p’unchay imamantapis thañichikunapaq, mana sábado p’unchaypiqa!’, nispa.

Chaywanpis Jesús jinata kutichirqa: ‘¡Saqra runas! Manachu qamkunaqa sábado p’unchaypi, burroykichikta phaskaramuwaqchik yakuta ukyananpaq. Chayrayku, ¿manachu kay 18 watastaña unqusqa kaq warmita thañichikunan karqa?’, nispa. Kay kutichiywanqa chay saqra runasta p’inqachirqa.

Chaymanta Jesús apostolesninwan Jerusalenman rirqa. Jericó llaqtap qayllanpi kachkaspa, iskay ciegoswan tinkurqa. Paykunaqa qhaparirqanku: ‘Jesús, yanapawayku’, nispa.

Jesús chay ciegosta waqyaspa, tapurqa: ‘¿Imata qamkunapaq ruwanayta munankichik?’, nispa. Paykunataq kutichirqanku: ‘Señor, ñawisniykuta kicharinawaykuta munayku’, nispa. Jesús ñawisninkuta llukchisqantawan, ¡rikuyta qallarirqanku! ¿Imarayku Jesús chay milagrosta ruwarqa? Runata munakusqanrayku, chantapis paypi iñiyniyuq kanankupaq ima. Jesús kamachimuptinqa, Jallp’api mana pipis unqunqachu.

Mateo 15:30, 31; Lucas 13:10-17; Mateo 20:29-34.



Tapuykuna

  • ¿Imatataq Jesús tukuy llaqtakunapi ruwarqa?
  • Bautizakusqanmanta kimsa watanman, ¿imatataq Jesús apostolesninman nirqa?
  • ¿Pikunataq dibujopi runakuna kanku, imaynatá Jesús chay warmita yanaparqa?
  • ¿Imaraykutaq Jesús kutichisqan religionmanta kuraqkunata p’inqachirqa?
  • Jesús apostolesninwan Jericoman chayachkaptin, ¿imatataq iskay ciegospaq ruwarqa?
  • ¿Imaraykutaq tukuy chaykunata ruwarqa?

Wak tapuykuna

  • Mateo 15:30, 31 ñawiriy.

    ¿Imaynatá Jesús rikuchiwanchik Diospa sumaq atiyninta, imaynata paraisopaq Jehová parlasqanta qhawayta yanapawanchik? (Sal. 37:29; Isa. 33:24.)

  • Lucas 13:10-17 ñawiriy.

    Jesús sábado p’unchaykunapi runata jampisqan, ¿imatataq Jesús kamachiptin runapaq ruwananta rikuchiwanchik? (Luc. 13:10-13; Sal. 46:9; Mat. 12:8; Col. 2:16, 17; Apo. 21:1-4.)

  • Mateo 20:29-34 ñawiriy.

    ¿Imaynatá Jesús runata yanapananpaq tiempochakurqa, imatataq chaymanta yachakunchik? (Deu. 15:7; Sant. 2:15, 16; 1 Juan 3:17.)