Ir al contenido

Ir al índice

94 yachachiy: Wawitasta munakun

94 yachachiy: Wawitasta munakun

JESÚS kay wawitata marq’arikusqanta, ¿rikunkichu? Payqa wawitasta manchayta munakuq. Chaypi qhawaqkunataq discipulosnin kanku. ¿Imatachus Jesús paykunaman nichkasqanta yachankichu?

Jesús apostolesninwan Capernaummanta kutimuchkarqanku. Apostolesqa ñanpi siminakurqanku. Chayrayku, Jesús kutimusqankutawan tapurqa: ‘¿Imamantataq ñanpi siminakuchkarqankichik?’, nispa. Jesusqa imamantachus siminakusqankuta yacharqa. Chaywanpis, paykunata tapurqa siminkumanta uyarinanpaq.

Jesús juk yuqallituwan

Apostolesqa, pichus aswan kuraq kasqanmanta siminakusqankurayku mana imatapis nirqankuchu. Wakinqa jatunchakuyta munarqanku. Kunanri, ¿imaynatá Jesús paykunata k’amirinman karqa?

Jesusqa juk wawitata waqyaspa, paykunap ñawpaqinman churarqa. Chanta, discipulosninman nirqa: ‘Kayta yachanaykichikta munani: Kay wawamanjina tukuychik. Manachayqa, Diospa Reinoman mana jayk’aq yaykunkichikchu. Aswan kuraqjina qhawasqaqa, kay wawamanjina tukunan tiyan’, nispa. ¿Imaraykutaq kayta nirqa?

Wawitasqa mana jatunchakunkuchu, nitaq sumaq runa kayta munankuchu. Chayrayku, apostolesqa wawajina kayta yachananku karqa. Jinamanta manaña pichus aswan kuraq kasqanmanta, siminakunankupaq nitaq maqanakunankupaq.

Wak kutipis Jesús wawitasta munakusqanta rikuchillarqataq. Juk p’unchay runasqa, wawitasninkuta Jesusta qhawanankupaq pusamurqanku. Apostolesqa wawitasta jark’achkarqanku, Jesustaq nirqa: ‘Wawas ñuqaman jamunankuta saqiychik, amataq paykunata jark’aychikchu, imaraykuchus Diospa Reinonqa, paykunajina kaqkunapaq’, nispa. Chaymanta, wawitasta marq’arikuspa bendecirqa. Jesús wawitasta munakusqanta yachaspa mayta kusikunchik, ¿ichari?

Mateo 18:1-4; 19:13-15; Marcos 9:33-37; 10:13-16.



Tapuykuna

  • ¿Imaraykutaq apostolkuna siminakurqanku Capernaumman kutichkaspa?
  • ¿Imaraykutaq Jesús juk wawitata waqyaspa apostolespa ñawpaqinman churarqa?
  • ¿Imapitaq apóstoles wawajina kananku karqa?
  • Chaymanta, ¿imaynatá Jesús wawasta munakusqanta rikuchirqa?

Wak tapuykuna

  • Mateo 18:1-4 ñawiriy.

    ¿Imaraykutaq Jesús rikch’anachiywan yachachirqa? (Mat. 13:34, 36; Mar. 4:33, 34.)

  • Mateo 19:13-15 ñawiriy.

    Dios t’inkanta qunawanchikpaq, ¿imapitaq ñuqanchikpis wawakunaman rikch’akunanchik tiyan? (Sal. 25:9; 138:6; 1 Cor. 14:20.)

  • Marcos 9:33-37 ñawiriy.

    ¿Imatataq Jesús jatunchakuymanta discipulosninman yachachirqa? (Mar. 9:35; Mat. 20:25, 26; Gál. 6:3; Fili. 2:5-8.)

  • Marcos 10:13-16 ñawiriy.

    ¿Runakuna Jesusman qayllaykuqchu kanku? ¿Imatataq chaymanta kuraqkuna yachakunkuman? (Mar. 6:30-34; Fili. 2:1-4; 1 Tim. 4:12.)