Ir al contenido

Ir al índice

93 yachachiy: Jesús runakunata mikhuchin

93 yachachiy: Jesús runakunata mikhuchin

MAY jatun llakiy karqa. Juan Bautistata wañuchirqanku. Herodias reypa warmin Juanta chiqnikuspa, reywan Juanpa umanta khuchuchirqa.

Jesús chayta uyarispa mayta llakikurqa. Chayrayku ch’inniqman sapitan ripurqa. Runataq qhipanta rillarqataq. Jesús chay runasta rikuspa, paykunata khuyakurqa. Chayrayku, Diospa Reinonmanta yachachirqa, unqusqakunatataq jampirqa.

Laqhaña kaptin, discipulosnin Jesusta nirqanku: ‘Kayniqpi ch’inpacha, ch’isiyaykuchkanñataq. Runasta kachapullayña, ranchospi mikhunata rantikamunankupaq’, nispa.

Jesús achkha runasman mikhuchichkan

Jesustaq nirqa: ‘Paykuna mana ripunqankuchu. Qamkuna paykunaman mikhunata quychik’ nispa. Felipeman kutirikuspa Jesús tapurqa: ‘¿Maypitaq kay chhika runaspaq mikhunata rantimusunmanri?’, nispa.

‘May chhika qullqiwancha mikhunata rantisunman kay runas mikhunankupaqqa’, nispa Felipe kutichirqa. Andrestaq nirqa: ‘Mikhunanchikta apaq yuqallituqa, phichqa t’antas, iskay challwallastawan jap’ichkan. Mana jayk’aq kayllawanqa runaman mikhuchisunmanchu’, nispa.

Jesús nirqa: ‘Runaman tiyakunankuta nimuychik’. Chaymanta Diosman pachista quspa. Mikhunata pisimanta pisi qurqa. Discipulosqa t’antata, challwatawan tukuyman jaywarqanku. Chay pachaqa 5.000 qharikuna karqanku. Warmistaq, wawastaq achkhallataq karqanku. Tukuytaq saqsanankukama mikhurqanku. ¡Discipulosqa 12 canastasta puchusqankumanta uqharimurqanku!

Chaymanta Jesús discipulosninman Galilea quchata juch’uy barcopi chimpanankutaq nirqa. Quchapi kachkaptinku locopara jich’aykakamurqa. Yakuqa wayrawan uqharikuspa, barcota kaymanta jaqayman apaykachachkarqa. Discipulosqa mayta mancharikunku. Chayllapi juk runata yaku patapi purispa, qayllaykuqta rikuytawan manchachikuspa qhaparirqanku.

Jesús nirqa: ‘Ama mancharikuychikchu, ñuqa kani’, nispa. Chayta uyarispapis, mana creerqankuchu. Pedrotaq nirqa: ‘Señor, qamchus kanki chayqa, kay yaku patata qamman jamunayta niway’. Jesusqa: ‘¡Jamuy!’, nispa kutichirqa. ¡Pedrotaq yaku patapi purirqa! Mancharikuspataq, yakuman chinkaykurqa, Jesustaq makinmanta jap’irqa.

Chaymanta Jesusqa watiqmanta achkha runata mikhuchillarqataq. Chay kutiqa 7 t’antawan juk chhika challwallawan, tukuyta saqsanankukama mikhuchillarqataq. ¡Jesús runata mikhuchisqanta qhawaspaqa kusikunchik! ¡Pay reyjina kamachimuptinqa mana imamantapis llakikunachu kanqa!

Mateo 14:1-32; 15:29-38; Juan 6:1-21.



Tapuykuna

  • ¿Imanarqankutaq Juan Bautistata, chayta uyarispa imaynataq Jesús kachkarqa?
  • ¿Imaynatá Jesús payta qhatiqkunata mikhuchirqa, machkha mikhunataq puchurqa?
  • ¿Imaraykutaq discipulosnin juk ch’isi mancharikurqanku, imatataq Pedro ruwarqa?
  • ¿Imaynatataq Jesús waranqa waranqa runata watiqmanta mikhuchirqa?
  • ¿Imaraykutaq may sumaq kanqa Jesús kay Jallp’ata kamachiptin?

Wak tapuykuna

  • Mateo 14:1-32 ñawiriy.

    Mateo 14:23-32 nisqanmanjina, ¿imayna runataq Pedro karqa?

    ¿Imaynatá Biblia yachachiwanchik Pedro allinta t’ukurispa imatapis ruwayta yachasqanta? (Mat. 14:27-30; Juan 18:10; 21:7; Hech. 2:14, 37-40; 1 Ped. 5:6, 10.)

  • Mateo 15:29-38 ñawiriy.

    ¿Imaynatá Jesús Diosninchik qusqanta mana usuchirqachu? (Mat. 15:37; Juan 6:12; Col. 3:15.)

  • Juan 6:1-21 ñawiriy.

    ¿Imaynatá cristianokuna Jesusjina kay pachata kamachiqkunata qhawasunman? (Juan 6:15; Mat. 22:21; Rom. 12:2; 13:1-4.)