Ir al contenido

Ir al índice

88 yachachiy: Juan Jesusta bautizan

88 yachachiy: Juan Jesusta bautizan

¿URPITA chay runap umanman uraykamuchkaqta rikukichu? Chay runaqa Jesús. Payqa 30 watayuqña. Paywan kaqtaq Juan sutikun. Juk chhikanta paymanta yachanchikña. ¿Yuyarinkichu? Mariaqa Elizabetta waturikuq riptin, Elizabetpa wisanpi wawitaqa kusiymanta phinkirirqa. Chay wawitaqa Juan karqa. Kunanri, ¿imatataq paykuna ruwachkanku?

Jesús bautizakuchkan

Juan Jordán mayupi Jesusta yakuman p’ulltiykurqa. Ajinatataq bautizakunan tiyan. Yakuman runata chinkaykuchiytawan, urqhuna tiyan. Juanqa ajinata bautizaq. Chayrayku, Juan Bautista nispa suticharqanku. Chaywanpis, ¿imaraykutaq Jesusta bautizarqa?

Juan Jesusta bautizarqa, Jesús mañakusqanrayku. Juanqa juchasninkumanta pesachikuqkunallata bautizachkarqa. ¿Jesús mayk’aqllapis juchallikurqachu? Mana, mana jayk’aq juchallikurqachu. Payqa janaqpachamanta Diospa churin karqa. Jina kaptinqa, ¿imaraykutaq Jesús Bautizachikurqa? Kunan chayta yachasunchik.

Jesús manaraq Juanman richkaspa, carpintero karqa. Juk carpinteroqa k’ullumanta tukuy imata ruwan. Payqa tiyanasta, camasta, ima ruwaq. Mariap qusan Joseqa carpintero karqa, pay Jesusta yachachirqa. Chaywanpis, Diosqa mana carpintero kananpaqchu churinta Jallp’aman kachamurqa. Manaqa paypa munayninta ruwananpaq kachamun. Kunantaq chayta qallarinan karqa. Chayrayku, Jesusqa Tatanpa munayninta junt’ayta munaspa, Juanwan bautizachikurqa. ¿Chayta ruwaspa Diosta kusichirqachu?

Ari, Jesús yakumanta lluqsichkaptin, Dios janaqpachamanta parlamurqa: ‘Kaymin ancha munasqa churiyqa. Paywan sunqu junt’asqa kani’, nispa. Chantapis janaqpacha kicharikuytawan juk urpijina Jesuspa umanman uraykamurqa. Chayqa Diospa santo espiritun karqa.

Jesusqa mayta t’ukunan karqa. Chayrayku, 40 p’unchayta ch’in pampaman ripurqa. Chaypitaq, Supay rikhurirqa kimsa kutita Jesusta urmachiyta munaspa. Jesustaq mana urmarqachu.

Chaymanta Jesús kutimuspa, wakin runawan riqsinakurqa, paykunataq Jesusta qhatiyta qallarirqanku. Wakinkuna ajina sutikurqanku, Andrés, Pedro (Simón sutikullantaq), Felipe, Natanael (Bartolome sutikullantaq). Kay runaswan Galileaman ripurqa. Chaypi, Natanaelpa llaqtanpi Canapi qhipakurqanku. Chaypitaq, juk casarakuypi yakuta vinoman tukuchirqa. Chayqa Jesuspa ñawpa kaq milagron karqa.

Mateo 3:13-17; 4:1-11; 13:55; Marcos 6:3; Juan 1:29-51; 2:1-12.



Tapuykuna

  • ¿Pikunataq chay iskay runa kanku?
  • ¿Imaynatá pipis bautizakunan tiyan?
  • ¿Pikunatataq Juan bautizachkarqa?
  • ¿Imaraykutaq Jesús Juanwan bautizachikurqa?
  • ¿Imatataq Dios rikuchirqa Jesús bautizakusqan allin kasqanta?
  • Jesús 40 p’unchayta ch’in pampapi kachkaptin, ¿pitaq rikhurirqa?
  • ¿Pikunataq ñawpaqta Jesusta qhatirqanku, ima milagrotataq ñawpaqta ruwarqa?

Wak tapuykuna

  • Mateo 3:13-17 ñawiriy.

    ¿Imaynatá Jesús discipulosnin bautizakunankuta yachachirqa? (Sal. 40:7, 8; Mat. 28:19, 20; Luc. 3:21, 22.)

  • Mateo 4:1-11 ñawiriy.

    Jesús Diospa qillqasqanta allinta apaykachasqan, ¿imaynatá Bibliamanta astawan yachakuyta yanapawanchik? (Mat. 4:5-7; 2 Ped. 3:17, 18; 1 Juan 4:1.)

  • Juan 1:29-51 ñawiriy.

    ¿Pimantaq Juan Bautista discipulosninta kachapurqa, imaynata payjina ruwasunman? (Juan 1:29, 35, 36; 3:30; Mat. 23:10.)

  • Juan 2:1-12 ñawiriy.

    Jehová allin kaqta runamanta mana jark’asqanta, ¿imaynatá Jesuspa ñawpa milagropi rikunchik? (Juan 2:9, 10; Sal. 84:11; Sant. 1:17.)