¡KAYJINA llakiyta ruwasqankuta qhawariy! Jesusta wañuchichkanku. Juk kurkupi warkhunku. Makisninman, chakisninmanpis clavoswan takaykunku. ¿Imaraykutaq jinata wañuchirqanku?

Jesús wañupuchkan

Jesusta chiqnisqankurayku. ¿Pikunataq Jesusta chiqnikunku? Jukninqa Kuraq Supay, Satanás. Pay Adanta Evatawan Jehovata mana kasukunankupaq pantachirqa. Chayrayku, Supayllataq juchayuq enemigosnin Jesusta wañuchinankupaq.

Manaraq Jesusta kurkuman warkhuchkaspa, llakiyta ñak’arichirqanku. ¿Getsemaní huertamanta, Jesusta apakapusqankuta yuyarinkichu? ¿Pikunataq chaykuna karqanku? Paykuna sacerdotes karqanku. Qhawarinachik imatachus Jesuswan ruwarqanku.

Sacerdotes Jesusta apakapuchkaptinku, apostolkuna mancharikuspa ayqirqanku. Jesustataq chay saqra runakunawan sapitanta saqirqanku. Chaywanpis, Pedrowan Juanwan chayniqllapi qhipakuspa, karitullamanta imatachus Jesuswan ruwasqankuta qhawarqanku.

Sacerdotesqa Jesusta machu Anaspaman aparqanku. Payqa ñawpaqta kuraq sacerdote karqa. Mana unaytachu chaypi qhipakurqanku. Chaymanta, Caifaspa wasinmanñataq Jesusta aparqanku. Pay kuraq sacerdote karqa. Chaypiqa achkha sacerdotes kachkarqanku.

Caifaspa wasinpi juiciota ruwanapaq, runasta Jesusmanta llullakuspa parlanankupaq apamurqanku. Chay sacerdotesqa nirqanku: ‘Jesusta wañuchinanchik tiyan’, nispa. Chantataq Jesusta uyanpi thuqaykurqanku, saqmarqanku ima.

Pedro chaykama jawapi kachkarqa. Chay tuta chiri kasqanrayku, runaqa ninata jap’ichirqa. Chaypi q’uñikuchkaptinku, juk sirvienta Pedrota rikuspa nirqa: ‘Kay runapis Jesuswan kachkarqa’, nispa.

‘¡Mana, mana ñuqa paywan kachkarqanichu!’, nispa Pedro kutichirqa.

Runaqa Pedrota Jesuswan kachkasqanta kimsa kutita nirqanku. Pedrotaq chay kimsa kutipi, mana kachkarqanichu, nirqa. Kimsa kaq kutipi kutichichkaptin, Jesús tikrakuytawan Pedrota qhawarqa. Pedro llullakusqanmanta mayta llakikurqa, ripuspataq sunqu nanayta waqakurqa.

Viernes paqarin inti lluqsiptinkama, sacerdotesqa Jesusta jatun qutuchakuy wasinman aparqanku, chay wasiqa Sanedrín sutichakuq. Chaypiqa, imatachus Jesuswan ruwanankuta parlaytawan, Judeata kamachiq Poncio Pilatoman pusarqanku.

Pilatoman nirqanku: ‘Kayqa juk saqra runa. Wañunan tiyan’ nispa. Pilatotaq, Jesusta tapuytawan nirqa: ‘Ñuqa rikusqaymanjinaqa, kay runaqa mana ima saqratapis ruwanchu’, nispa. Chanta Pilatoqa Jesusta, Herodes Antipasman, Galileata kamachiqman pusanankuta nirqa, payqa Jerusalenpi kachkarqa. Herodespis Jesús mana imatapis ruwasqanta rikuspa, Pilatoman kutichipullarqataq.

Pilato Jesusta kacharipuyta munarqa. Jesusta chiqnikuqkunataq wak presochasqa suwa runa Barrabasta kacharinanta nirqanku. Khuskan p’unchayjinaña kaptin Pilato Jesusta jawaman pusaspa runaman nirqa: ‘¡Qhawaychik! ¡Kay reyniykichik!’, nispa. Kuraq kaq sacerdotestaq qhaparirqanku: ‘¡Wañuchiy!’, nispa. Jinamanta Barrabasta kacharichirqanku, Jesustataq wañuchinankupaq aparqanku.

Viernes khuskan p’unchay kachkaptin Jesusta juk kurkupi warkhurqanku. Mana dibujitupi rikukunchu, chaywanpis Jesuspa ladosninman iskay saqra juchachakuq runasta warkhullarqankutaq. Manaraq Jesús wañupuchkaptin, juknin jinata nirqa: ‘Reinoykipi kachkaspa, ñuqamanta yuyarikuwanki’, nispa. Jesustaq kutichirqa: ‘Chiqamantapuni niyki, qamqa ñuqawan Paraisopi kanki’, nispa.

¡May sumaq chay nisqan! ¿Ichari? ¿Ima paraisomanta Jesús parlachkarqa? ¿Maypitaq qallariypi Dios Paraisota ruwarqa? Ari, Jallp’api. Jesús janaqpachamanta kamachimuchkaptin, kay runata kawsarichimunqa, Jallp’api musuq paraisopi kusisqa tiyakunanpaq. ¿Manachu may sumaq chay kasqanta nisunman?

Mateo 26:57-75; 27:1-50; Lucas 22:54-71; 23:1-49; Juan 18:12-40; 19:1-30.



Tapuykuna

  • ¿Pitaq juchayuq Jesusta wañuchinankupaq?
  • ¿Imatataq apostolkuna ruwarqanku Jesusta apakapuchkaptinku?
  • ¿Imatataq kuraq sacerdote Caifaspa wasinpi ruwakurqa?
  • ¿Imaraykutaq Pedro waqaq ripurqa?
  • Watiqmanta Pilatoman Jesusta pusaykuptinku, ¿imatataq sacerdotekuna qhaparirqanku?
  • ¿Imatataq viernes khuskan p’unchayjinapi Jesuswan ruwarqanku, imatataq Jesús juk warkhusqa saqra runata nirqa?
  • ¿Maypitaq Jesús parlasqan paraíso kanqa?

Wak tapuykuna

  • Mateo 26:57-75 ñawiriy.

    Chay tantakuy wasipi tantakuqkuna, ¿imaynatá saqra sunquyuq kasqankuta rikuchirqanku? (Mat. 26:59, 67, 68.)

  • Mateo 27:1-50 ñawiriy.

    ¿Imaraykutaq Judas pesachikusqan mana sunqunmantapachachu kasqanta nisunman? (Mat. 27:3, 4; Mar. 3:29; 14:21; 2 Cor. 7:10, 11.)

  • Lucas 22:54-71 ñawiriy.

    Pedro Jesusta mana riqsisqan nisqanmanta, ¿imatataq yachakusunman? (Luc. 22:60-62; Mat. 26:31-35; 1 Cor. 10:12.)

  • Lucas 23:1-49 ñawiriy.

    ¿Imaynatá Jesús kutichirqa qhasimanta maqachkaptinku, imatataq chaymanta yachakunchik? (Luc. 23:33, 34; Rom. 12:17-19; 1 Ped. 2:23.)

  • Juan 18:12-40 ñawiriy.

    Pedro runata manchachikuspapis juk may sumaq apostolman tukurqa, ¿imatataq chay yachachiwanchik? (Juan 18:25-27; 1 Cor. 4:2; 1 Ped. 3:14, 15; 5:8, 9.)

  • Juan 19:1-30 ñawiriy.

    ¿Imatataq Jesús tukuy imayuq kanamanta yuyarqa? (Juan 2:1, 2, 9, 10; 19:23, 24; Mat. 6:31, 32; 8:20.)

    Jesús wañuchkaptin nisqanqa, Jehová Diospa kamachiyninrayku sayakusqanta rikuchirqa, ¿imaynamanta? (Juan 16:33; 19:30; 2 Ped. 3:14; 1 Juan 5:4.)