KAY qunqurisqa runaqa Esteban sutikun. Jesuspa junt’a sunqu discipulon karqa. ¿Payta imanachkankutaq? Kay runasqa jatuchaq rumiswan payman chuqaykuchkanku. ¿Imaraykutaq Estebanta chiqninku kayjinata ruwanankupaq? Chayta qhawarina.

Estebanta rumiwan ch’anqachkanku

Estebanqa Diospa atiyninwan sumaq milagrosta ruwaq. Chantapis runaman chiqa kaqta yachachiq, chayrayku runaqa mayta phiñakurqa. Diosqa Estebanman allin yuyata qullarqataq, jinamanta pay chay runakuna llullakuspa yachisqankuta rikuchirqa. Paykunataq astawan phiñakuspa, Estebanta jap’iytawan, wak runaswan llullakuspa payta tumparqanku.

Kuraq kaq sacerdote tapurqa: ‘¿Chiqatachu kaykuna parlachkanku?’, nispa. Estebanqa Bibliamanta sumaqta kutichirqa. Tukuchananpaqtaq, saqra runa unaymantapacha Diospa profetasninta chiqnisqankuta nirqa. Chantapis: ‘Qankunaqa jinallataq kankichik. Diospa kamachin, Jesusta wañuchirqankichik, manataq Diospa leyninta kasukunkichikchu’, nispa nillarqataq.

¡Kayta uyarispa, sacerdotesqa mayta phiñakurqanku! Rabiamanta kirusninkuta k’arurachirqanku. Chayllapi Esteban umanta uqharispa nirqa: ‘¡Qhawaychik! Cielopi Jesusta, Diospa pañanpi sayachkaqta rikuni’, nispa. Paykuna mana uyarinankupaq ninrisninkuta jap’ikurqanku. Estebanta maqaykuytawan, qhatataspa llaqtamanta urqhurqanku.

Chaypiqa punchusninkuta urqhukuspa wayna Sauloman jaywarqanku. ¿Saulota rikunkichu? Chayllapi Estebanta ch’anqayta qallarirqanku. Payqa rikunkijina, qunqurikuspa Diosmata mañakurqa: ‘Jehová, ama kay saqra ruwayrayku jasut’iychu’, nispa. Payqa wakinkuna sacerdoteswan ch’awkiyachikusqankuta yacharqa. Chaymanta Esteban wañupurqa.

Pillapis ñak’arichisuptin, ¿kikillantataqchu mañakuwaq, chayri Dios jasut’inantachu munawaq? Esteban, Jesuswan mana chayta mañakurqankuchu. Paykunaqa saqra runawanpis k’acha karqanku. Paykunajina kananchik tiyan.

Hechos 6:8-15; 7:1-60.



Tapuykuna

  • ¿Pitaq Esteban karqa, ima ruwananpaqtaq Dios yanaparqa?
  • ¿Imatataq Esteban sacerdotes phiñakunankupaq nirqa?
  • Llaqtap jawanman qhatataytawan, ¿Estebanta imanarqankutaq?
  • ¿Pitaq punchus chayniqpi chay wayna?
  • ¿Imatataq Esteban manaraq wañuchkaptin Jehovamanta mañakurqa?
  • Pipis ñak’arichiwaptinchik, ¿imaynata Estebanjina ruwasunman?

Wak tapuykuna

  • Hechos 6:8-15 ñawiriy.

    ¿Ima llullakuspataq religionta kamachiqkuna Jehovamanta sut’inchaqkunata ch’inyachiyta munarqanku? (Hech. 6:9, 11, 13.)

  • Hechos 7:1-60 ñawiriy.

    ¿Imataq Estebanta yanaparqa mana manchachikuspa Diosmanta parlananpaq, imatataq chaymanta yachakunchik? (Hech. 7:51-53; Rom. 15:4; 2 Tim. 3:14-17; 1 Ped. 3:15.)

    ¿Imaynata mana uyariyta munaqkunata qhawananchik tiyan? (Hech. 7:58-60; Mat. 5:44; Luc. 23:33, 34.)