Ir al contenido

Ir al índice

Abrahampa jatun iñiynin

Abrahampa jatun iñiynin

 14 yachachiy

Abrahampa jatun iñiynin

¿ABRAHAM ruwachkasqanta rikunkichu? Makinpi cuchilluyuq churinta wañuchiyta munachkan. ¿Imaraykutaq? Manaraq kay tapuyman kutichichkaspa, imaynatachus Abraham Sarawan wawayuq kasqankuta qhawarina.

Diosqa, Abrahamta wawayuq kananta nirqa. Paykuna machusña kasqankurayku manaña wawayuq kayta atinkumanchu karqa. Chaywanpis Abrahampaqqa Diosninchik tukuy atiyniyuq karqa. ¿Imaynatá wawitayuq karqanku?

Dios parlasqanmanta watanmanraq. Abraham 100 watayuq, Sarataq 90 watayuq kachkaptin, wawitanku nacekurqa. Paytaqa Isaac nispa suticharqanku. ¡Diosqa parlasqanta juntʼarqa!

Isaac waynaña kachkaptin, Jehová Abrahampa iñiyninta rikuyta munarqa. ‘¡Abraham!’ nispa waqyarqa, Abrahamtaq: ‘¡Kaypi kachkani!’, nispa kutichirqa. Diostaq nirqa: ‘Munasqa kʼata churiykita Isaacta pusarikuy, payta wañuchispa qʼulachipuwanki, ima urqupichus ñuqa nisqayki, chaypi’, nispa.

¡Abrahamqa wawanta munakuq, chayrayku kay mañayta uyarispaqa, maytacha llakikurqa! Yuyariy, Diosqa Abrahamta nirqa, wawasniyki Canaán jallpʼapi tiyakunqanku, nispa. Isaac wañunman chayqa, ¿imaynatá wawasnin Canaanpi tiyakunkuman karqari? Abrahamqa mana yuyayta japʼiyta atispapis Diosta kasukurqa.

Urquman chayaytawan Abrahamqa Isaacta wataykuspa altarman churaykurqa. Cuchillonta uqharichkaptintaq. Chayllapi Diospa angelnin waqyan: ‘¡Abraham, Abraham!’, nispa. Abrahamtaq kutichin: ‘¡Kaypi kachkani!’, nispa.

Diostaq nirqa, ‘ama makiykita uqhariychu, nitaq wawaykita imanaychu. Yachaniña manchachikuwasqaykita, imaraykuchus mana juk kʼata wawaykitapis michʼakunkichu qunawaykipaq’, nispa.

¡Abrahamqa may jatun iñiyniyuq karqa! Payqa Dios tukuy atiyniyuq kasqanta yachasqanrayku, Isaacta kawsarichimunanta yuyarqa. Diosqa Abraham mana wawanta wañuchinanta munarqachu. Chayrayku Diosqa juk ovejitata sachʼapi chʼipaykuchispa nirqa: ‘chayta qʼulachiy, Isaacta qʼulachinaykimantaqa’, nispa.

Génesis 21:1-7; 22:1-18.