Ir al contenido

Ir al índice

Salomón yachayniyuq rey

Salomón yachayniyuq rey

63 yachachiy

Salomón yachayniyuq rey

SALOMONQA waynamantapacha kamachiyta qallarirqa. Mayta Jehovata munakuq, David kʼamisqantataq kasukuq. Jehovaqa Salomonta allinpaq qhawaq, chayrayku juk chʼisi musquyninpi Salomonta nirqa: ‘Salomón, ¿imata qusunayta munanki?’, nispa.

Salomón kutichin: ‘Jehová Diosniy, ñuqaqa waynallaraq kani, manaraq imaynatachus kamachiyta yachanichu. Chayrayku, llaqtaykita allinta kamachinaypaq, jatun yachayta quway’, nispa.

Jehovaqa Salomón mañakusqanta allinpaq qhawan. Chayrayku nirqa: ‘Qam mana unay kawsayta, nitaq qhapaq kayta mañawankichu, manaqa jatun yachayta. Chayrayku mayqin runamantapis astawan jatun yachayta qusqayki. Astawanpis, mana mañakuwasqaykita ima qusqayki, qhapaqyayta, atiyta ima qusqayki’, nispa.

Juk pʼunchay iskay warmis maqanakuspa Salomonman jamunku. Jukninqa nin: ‘Kay warmiwan juk wasillapi tiyakuyku. Ñuqa juk wawitata nacechikurqani, paytaq iskay pʼunchayninman juk wawitata nacechikullantaq. Paypa wawitanqa juk chʼisi wañupun. Puñunaykamataq, payqa wawitayta apakapusqa, wañusqitataq puñunayman churaykamusqa. Rikchʼarispa, chay wañusqa wawitata rikuni, manataq wawitaychu kasqanta reparani’, nispa.

Chayta uyariytawan juknin warmi nin: ‘¡Mana! ¡Kawsaq wawitaqa ñuqapta, wañusqa wawataq paypata!’, nispa. Ñawpaq kaq warmitaq kutichin: ‘¡Mana! ¡Wañusqa kaqqa qampata, kawsaqri ñuqapta!’, nispa. Jinata siminakuchkaptinku, ¿imatataq Salomón ruwanman karqa?

Salomonqa juk espadata mañakuspa nirqa: ‘Chay wawata iskayman khuchuspa sapa jukman khusqankama qupuychik’, nispa.

‘¡Ama!, ama wawayta wañuchiychikchu. ¡Kay warmiman qupuychik!’ nispa wawap maman qhaparirqa. Juknin warmitaq nirqa: ‘Khuchuychik, ni paypaq ni ñuqapaq kanqachu’, nispa.

Salomontaq nirqa: ‘¡Ama wawata wañuchiychikchu! Ñawpa kaq warmiman qupuychik. Pay maman kasqanrayku’, nispa. Salomón chayta chʼuyacharqa, mamaqa wawanta munakusqanrayku mana wañuchinankuta saqinmanchu, wak warmipis uywananta saqinman. Runaqa, Salomón ruwasqanta uyarispa, may yachayniyuq reyninku kasqanmata mayta kusikurqanku.

Salomón kamachichkaptin, Diosqa llaqtanman tukuy imata qurqa. Cebadata, trigota, uvasta, higosta ima, may achkhata puquchirqa. Runaqa allinta pʼachallikuq, sumaq wasispitaq tiyakuq kanku. Tukuypaq tukuy ima karqa.

1 Reyes 3:3-28; 4:29-34.