Mateo 27:1-66
27 Sutʼiyamojtintaj, tukuy kuraj sacerdoteswan kurajkunawan tantakuspa, Jesusta wañuchinankupaj yachachinakorqanku.+
2 Chantá Jesustaqa wataykuytawan kamachej Pilatoman jaywaykamorqanku.+
3 Japʼichej Judasqa, Jesusta wañunanpaj juchachasqankuta rikuspa, sonqonta nanachikorqa. Chantá kuraj sacerdotesman, kurajkunamanwan rerqa chay 30 qolqesta* kutichipunanpaj.+
4 Nerqataj: “Juchallikuni mana juchayoj runata qankunaman jaywaykuspa”, nispa. Paykunataj nerqanku: “¿Ima ruwanayku tiyan noqaykuri? ¡Qanña imanakuypis!”, nispa.
5 Chantá Judasqa templopi chay qolqesta wijchʼuytawan llojsispa sipikamorqa.+
6 Kuraj sacerdotestaj chay qolqeta oqharispa nerqanku: “Kay qolqetaqa mana churasunmanchu temploj qolqe churananmanqa, runata wañuchinapaj qolqe* kasqanrayku”, nispa.
7 Chantá paykunapura parlanakuspa, chay qolqewan ranterqanku manka llutʼaj jallpʼanta, chaypi forasterosta pʼampanankupaj.
8 Chayrayku chay jallpʼaqa kunankama Yawar Jallpʼa+ sutikun.
9 Ajinapi profeta Jeremiaspa kay nisqan juntʼakorqa: “Kinsa chunka qolqesta oqharerqanku. Chay preciotaqa wakin israelitas payman churarqanku.
10 Chay qolqewantaj manka llutʼaj jallpʼanta ranterqanku, Jehová* Dios kamachiwasqanman jina”,+ nispa.
11 Jesusqa Pilatoj ñaupaqenpi sayasharqa, Pilatotaj payta taporqa: “¿Qanchu judiospa reynin kanki?”, nispa. Jesustaj kuticherqa: “Arí, qanllataj chayta ninki”,+ nispa.
12 Kuraj sacerdotes, kurajkunawan Jesusta tumpaykushajtinku, payqa mana imatapis kutichikorqachu.+
13 Chayrayku Pilatoqa taporqa: “¿Manachu uyarinki imaymanasta contraykita parlashasqankuta?”, nispa.
14 Jesustaj mana uj simillatapis kutichikorqachu, chayrayku Pilatoqa mayta tʼukorqa.
15 Pilatoqa sapa fiestapi uj presota kacharichiyta yachaj, pitachus runas munaj kanku chayta.+
16 Chaypachataj uj rejsisqa sajra runa, Barrabás sutiyoj presochasqa kasharqa.
17 Pilatoqa tantasqa kasharqanku chay runasta taporqa: “¿Mayqentataj kacharichinayta munankichej? ¿Barrabastachu, Cristo nisqa Jesustachu?”, nispa.
18 Pilatoqa repararqa envidiakuspalla Jesusta payman jaywaykusqankuta.
19 Warminpis Pilato juzgana tiyananpi tiyashajtin willachimorqa: “Ama ni ima ruwanayki kachunchu chay cheqan runawanqa. Mancharisqa kashani, kunan chʼisi mayta mosqoykuchiwan”, nispa.
20 Kuraj sacerdotestaj kurajkunawan khuska, runasta yachaykuchisqanku ninankupaj: “Barrabasta kacharichiy,+ Jesustataj wañuchiy”,+ nispa.
21 Pilatotaj ujtawan runasta taporqa: “¿Mayqentataj kacharichinayta munankichej?”, nispa. Paykunataj kuticherqanku: “Barrabasta”, nispa.
22 Pilatotaj nerqa: “Chanta, ¿imanasajtaj Cristo nisqa Jesuswanri?”, nispa. Tukuyninkutaj nerqanku: “¡Kʼaspipi* wañuchisqa kachun!”,+ nispa.
23 Pilato nillarqataj: “¿Imarayku? ¿Ima sajratataj ruwarqa?”, nispa. Paykunataj aswan sinchʼita qhaparerqanku: “¡Kʼaspipi wañuchisqa kachun!”,+ nispa.
24 Pilatoqa, runas astawan chʼajwasqankuta rikuspa ni imata ruwayta aterqañachu. Chayrayku runaspa ñaupaqenpi makisninta yakuwan mayllakuspa nerqa: “Kay runaj wañuyninmantaqa* mana juchayojchu kasaj. Qankuna juchayoj kankichej”, nispa.
25 Chay runastaj kuticherqanku: “Chay runaj wañuyninmantaqa* noqayku wawasniykuwan juchayoj kasqayku”,+ nispa.
26 Ajinapi Pilatoqa Barrabasta kachariporqa, Jesustataj soldadosman jaywaykorqa, seqʼoytawan+ rakhu kʼaspipi wañuchinankupaj.+
27 Chaymanta Pilatoj soldadosnenqa Jesusta aparqanku kamachina wasiman, tukuynin soldadosta tantamuspataj Jesusta muyuykorqanku.+
28 Ropanta lluchʼuspataj, puka ropata churaykorqanku.+
29 Chantá khishkamanta coronata simpʼaspa umanman churaykorqanku, paña makinwantaj caña huecata japʼicherqanku. Ñaupaqenman qonqoriykukuspataj burlakorqanku: “Jallalla judiospa reynin”, nispa.
30 Chantá thoqaykorqanku,+ caña huecata qhechuytawantaj chaywan umanpi wajtarqanku.
31 Paymanta burlakuyta tukuytawantaj puka ropata lluchʼuspa, ropasninta churaykapullarqankutaj. Chaymantataj pusarqanku rakhu kʼaspiman clavamunankupaj.+
32 Llajtamanta llojsishaspataj tinkorqanku Cirene llajtayoj Simón sutiyoj runawan. Paytataj munajta mana munajta Jesuspa ñakʼarina kʼaspinta* apacherqanku.+
33 Chantá Gólgota nisqa cheqaman chayarqanku, nisunman Tʼojlu Cheqaman.+
34 Chaypitaj Jesusman jaywarqanku jaya qhoraswan chajrusqa vinota.+ Paytaj llamiriytawan mana ujyayta munarqachu.
35 Jesusta rakhu kʼaspiman clavaykuytawantaj, soldadosqa suerteta* choqarqanku ropasninta partinakunankupaj.+
36 Chaypi tiyaykuspataj Jesusta qhawasharqanku.
37 Uman patanejmantaj, imamantachus juchachasqankuta qhelqasqata churarqanku: “Kayqa Jesús, judiospa reynin”,+ nispa.
38 Paytawan khuskataj iskay suwastawan rakhu kʼaspisman warkhorqanku, ujninta pañanman, ujnintataj lloqʼenman.+
39 Chaynejta pasajkunataj umankuta khiwirispa+ paypaj sajrata rimarqanku.+
40 Nerqankutaj: “¡Yú! Qan nerqanki templota urmachispa kinsa pʼunchaypi sayarichinaykita,+ kunanqa salvakuy á. Diospa wawan kaspaqa chay ñakʼarina kʼaspimanta uraykamuy”,+ nispa.
41 Kuraj sacerdotespis, leymanta yachachejkunawan, kurajkunawan khuska kikillantataj Jesusmanta burlakuspa nerqanku:+
42 “Wajkunataqa salvarqa, pay kikintataj mana salvakuyta atinchu. Israelpa reynin kaspaqa+ kunanpacha chay ñakʼarina kʼaspimanta uraykamuchun, paypitaj creesunchej.
43 Payqa Diospi atienekorqa, sichus Dios yanapayta munan chayqa librachun ari,+ ‘Diospa Wawan kani’+ nerqaqa”, nispa.
44 Ajinallatataj insultarqanku Jesuspa ladonpi rakhu kʼaspispi warkhusqa kasharqanku chay suwaspis.+
45 Chaupi pʼunchaymantapacha, las tres chaykama tukuy chay jallpʼa laqhayaykorqa.+
46 Las tres chaytataj Jesusqa sinchʼita qhaparerqa: “Éli, Éli, ¿láma sabakhtháni?”, nispa. Chayqa niyta munan: “Diosníy, Diosníy, ¿imaraykutaj saqerpariwankiri?”.+
47 Chay qayllapi sayashajkunamanta wakintaj, chayta uyarispa nerqanku: “Kay runaqa Eliasta wajyakushan”,+ nispa.
48 Paykunamanta ujnintaj correytawan esponjata oqharispa kʼallku vinoman chhapuykorqa, jinaspataj caña huecaman churaykuspa Jesusman jaywarqa ujyananpaj.+
49 Wakintaj nerqanku: “¡Saqey! Qhawanalla, ichapis Elías salvaj jamonqa”, nispa.
50 Jesusqa ujtawan sinchʼita qhapariytawan wañuporqa.+
51 Jinallapi temploj cortinanqa+ iskayman llikʼikorqa,+ patamanta urakama.+ Jallpʼataj kharkatiterqa, chhankaspis phatararqanku.
52 Sepulturastaj kicharikorqanku, Diospa ashkha kamachisninpa ayasnintaj* rikhurirarqa.
53 Chay ayastaqa* ashkha runas rikorqanku (Jesús kausarimusqanmantaña, wakin runasqa sepulturas chaynejmanta jamuspa Jerusalenman* yaykorqanku).
54 Soldadospa capitannin, paywan Jesusta qhawasharqanku chaykunapis jallpʼa kharkatisqanta, chay waj imastawan rikuspa maytapuni mancharikorqanku, nerqankutaj: “Kay runaqa Diospa Wawanpuni kasqa”,+ nispa.
55 Chaypeqa ashkha warmis kasharqanku karullamanta qhawaspa. Paykunaqa Galileamantapacha Jesuswan khuska jamusqanku, payta yanapanankupaj.+
56 Chay warmis ukhupi kasharqanku María Magdalena, Santiagojta Josespatawan mamanku María, Zebedeoj wawasninpa mamanku ima.+
57 Tardeyaykuytaña chayamorqa uj qhapaj runa José sutiyoj, Arimatea llajtayoj, paypis Jesuspa discipulollantaj karqa.+
58 Payqa Pilatoman qayllaykuspa Jesuspa ayanta* mañakorqa.+ Pilatotaj kamacherqa qonankuta.+
59 Chantá Joseqa ayata* oqharispa, llimphu sumaj lino telawan maytʼuykorqa.+
60 Jinaspataj mosoj sepulturaman churaykorqa,+ mayqentachus chhankapi ruwachikusqa chayman. Chantá chay sepulturaj punkunman jatun rumita tanqaykuytawan riporqa.
61 Chay sepulturaj ñaupaqenpitaj tiyasqa qhepakorqanku María Magdalenawan chay ujnin Mariawan.+
62 Qʼayantin samarikuna pʼunchay*+ kashajtin, kuraj sacerdotesqa fariseoswan khuska Pilatoman rerqanku.
63 Nerqankutaj: “Señor, yuyarikuyku chay chʼauka runaqa* kausashaspallaraj nisqanta: ‘Kinsa pʼunchaymanta kausarinpusaj’,+ nispa.
64 Chayrayku kamachiy ari, kinsa kaj pʼunchaykama sepulturanta allinta qhawanankuta, ama discipulosnin jamuspa ayanta* suwanankupaj,+ ajinapi ama runasman ninankupaj: ‘¡Wañusqas ukhumanta kausarinpun!’, nispa. Chay llullakusqankutaj chay ñaupajmanta nisqaqa aswan mana allin kanman”, nispa.
65 Pilatotaj paykunata nerqa: “Soldadosta pusakuychej sepulturanta allinta qhawanankupaj”, nispa.
66 Paykunataj rispa chay sepulturata rumiwan sumajta kasaykucherqanku, soldadostataj qhawanankupaj churarqanku.
Sutʼinchaykunasnin
^ Chay qolqesqa qolqe metalmanta ruwasqa karqa.
^ Griego parlaypeqa nin, “yawarpa precion”.
^ Chayri “Postepi”.
^ Griego parlaypeqa nin, “yawarninmantaqa”.
^ Griego parlaypeqa nin, “yawarninmantaqa”.
^ Chayri “ñakʼarina postenta”. Glosariopi ñakʼarina kʼaspi nisqata leeriy.
^ Chayri “cuerposnintaj”.
^ Griego parlaypeqa nin, “santo llajtaman”.
^ Chayri “cuerpostaqa”.
^ Chayri “cuerponta”.
^ Chayri “cuerpota”.
^ Chayri “wakichikuna pʼunchaypa qʼayantin”.
^ Chayri “engañaj runaqa”.
^ Chayri “cuerponta”.
