Números 16:1-50

  • Corewan, Datanwan, Abiramwan ima oqharikunku (1-19)

  • Oqharikojkuna castigasqa kanku (20-50)

16  Uj levita karqa Coré+ sutiyoj, payqa ujchaykukorqa Datanwan, Abiramwan, Onwan ima. Coreqa Levijpa mirayninmanta karqa. Levijpa wawanqa+ karqa Cohat,+ Cohatpa wawantaj karqa Izhar,+ Izharpa wawantaj karqa Coré. Datanwan, Abiramwan, Onwan imaqa karqanku Rubenpa+ mirayninmanta. Datanwan Abiramwantaj karqanku Eliabpa wawasnin,+ Ontaj Pelezpa wawan karqa.  Paykunaqa Moisespa contranta oqharikorqanku 250 israelitaswan khuska. Chay runasqa karqanku Israelmanta kamachejkuna, israelitas ukhupi ajllasqa kajkuna, may rejsisqa runastaj.  Paykunaqa tukuyninku tantaykukorqanku.+ Moisesman, Aaronman ima rispataj nimorqanku: “Kaykamalla qankunawanqa. Tukuynin israelitasqa Diospaj tʼaqasqa kanku,+ Jehová Diostaj paykuna ukhupi kashan.+ ¿Imaraykutaj qankuna Jehová Diospa wawasnin israelitaspa patanpi churakushankichejri?”, nispa.  Moisesqa chayta uyariytawan qonqoriykukuspa pampakama kʼumuykukorqa.  Chaymantataj Coreman, Coré parte kajkunaman ima nerqa: “Qʼaya paqarin Jehová Diosqa nenqa pichus paypata kasqanta,+ pichus paypaj tʼaqasqa kasqanta, pitajchus payman qayllaykunanta.+ Pitachus pay ajllakonqa,+ chaymin payman qayllaykonqa.  Qankunataj kayta qʼaya ruwaychej: Corepis, Coré parte kajkunapis+ brasa apaykachanasta+ apakamuychej.  Chaykunamantaj ninata, inciensotawan churankichej Jehová Diospa ñaupaqenpi. Pitachus Jehová Dios ajllanqa chaymin paypaj tʼaqasqa kanqa.+ Levitas,+ qankunaqa anchañataj kankichej”, nispa.  Chaymantataj Moisesqa Coreman nerqa: “Ama jina kaspa, uyariwaychej levitas.  Israelpa Diosnin Jehovaqa qankunata ajllakusunkichej tukuy israelitas ukhumanta,+ paymantaj qayllaykojta saqesunkichej. Payqa churasunkichej yupaychana toldonpi sirvinaykichejpaj, israelitastapis sirvinaykichejpaj.+ ¿Qankunapajqa pisichu chayqa? 10  Coré, ¿qanpajqa pisichu qantawan hermanosniyki levitastawan payman qayllaykojta saqesusqaykichejqa? ¿Kunanqa sacerdotesñatajchu kayta munashankichej?+ 11  Qanwan, qan parte kajkunawanqa Jehová Diospa contranpi tantasqa kashankichej. ¿Pitaj Aarón kasqa paypa contranta thutunaykichejpajri?”,+ nispa. 12  Chantá Moisesqa wajyachimorqa Eliabpa wawasnin Datanta, Abiramtawan.+ Paykunataj nimorqanku: “Mana jamusqaykuchu. 13  ¿Qanpajqa pisichu kasqa lechewan miskʼiwan jinantin tiyan chay jallpʼamanta orqhomuwasqaykoqa kay chʼin jallpʼapi wañuchinawaykupaj?+ ¿Kunanqa tukuy imapichu autoridadniyku kayta munanki?* 14  Qanqa manaraj pusaykuwaykuchu lechewan miskʼiwan jinantin tiyan chay jallpʼamanqa,+ nitaj jallpʼasta, ni uva huertastapis qowaykuchu herenciayku kananpaj. ¿Chay runas ciego runas jina qhatisunankutachu munanki?* Mana jamusqaykuchu”, nispa. 15  Chayta uyarispa Moisesqa maytapuni phiñakorqa, Jehová Diosmantaj nerqa: “Ama chʼaki mikhuy ofrendankuta japʼikuychu. Noqaqa paykunamanta ni uj burrollankutapis qhechunichu, nitaj ima sajratapis ruwanichu ni mayqenninkuta”,+ nispa. 16  Chantá Moisesqa Coreman nerqa: “Qʼaya Jehová Diospa ñaupaqenman qayllaykuy, qan parte kajkunawan khuska, qanpis, paykunapis, Aaronpis. 17  Sapa ujninku brasa apaykachanankuta apakamuchunku, chaymantaj inciensota churaykuchunku. Jinaspataj Jehová Diospa ñaupaqenman qayllaykuchunku brasa apaykachanasninkuwan. Qan parte kajkunaqa 250 brasa apaykachanasta apamonqanku. Chantá qanpis, Aaronpis brasa apaykachanaykichejta apakamullankichejtaj”, nispa. 18  Ajinapi sapa ujninku brasa apaykachanasninkuta apamorqanku. Chaymantaj ninata, inciensotawan churaykorqanku. Chantá Dioswan tinkukuna toldo punkupi sayarqanku Moiseswan Aaronwan khuska. 19  Coreqa pay parte kajkunata+ Dioswan tinkukuna toldo punkuman tantaykorqa. Tantaykusqantawantaj Jehovaj jatun kayninpa kʼanchaynin tukuy israelitasman rikhurimorqa.+ 20  Jehová Diostaj Moisesta, Aarontawan nerqa: 21  “Kay runasmanta karunchakuychej. Paykunataqa uj ñawi chʼirmiypi chinkarparichisaj”,+ nispa. 22  Chayta uyarispa paykunaqa qonqoriykukuspa pampakama kʼumuykukorqanku, nerqankutaj: “Diosníy, tukuy runasman kausayta qoj Dios,+ ¿uj runaj juchanraykuchu tukuy israelitaspaj phiñakunki?”,+ nispa. 23  Jehová Diostaj Moisesta nerqa: 24  “Tukuy israelitasman niy: ‘Karunchakuychej Corejpa, Datanpa, Abirampa toldo wasisninkumanta’,*+ nispa”. 25  Chantá Moisesqa sayarispa Israelmanta kurajkunawan+ khuska rerqa, maypichus Datanwan Abiramwan kasharqanku chayman. 26  Israelitasmantaj nerqa: “Ama jina kaspa, karunchakuychej kay sajra runaspa toldo wasisninkumanta, ama paykunaj imasninkuta llankhaychejchu, ama qankunapis paykunaj juchankurayku chinkachisqa kanaykichejpaj”, nispa. 27  Chayta uyarispa paykunaqa chay ratopacha karunchakorqanku Corejpa, Datanpa, chantá Abirampa toldo wasisninkumanta. Datanwan Abiramwantaj toldo wasisninkumanta llojsimuspa, toldonku punkupi sayaykorqanku, warmisninkuwan, wawasninkuwan, uña wawasninkuwan ima. 28  Chaymanta Moisesqa nerqa: “Kunanqa kaypi yachankichej kay tukuy imasta ruwanaypajqa Jehová Dios kachamuwasqanta, manataj noqallamantachu ruwasqayta: 29  Sichus kay runas, imaynatachus runas wañunallankuta wañunku ajinata wañonqanku, castigonkutaj tukuy runaspata jinalla kanqa chayqa, chaypi yachakonqa mana Jehová Dioschu kachamuwasqanta.+ 30  Sitajchus Jehová Dios mana jaykʼaj rikusqaykichejta ruwaspa jallpʼaj siminta kicharenqa, jallpʼataj paykunata tukuy imasninkutawan khuska oqoykonqa, kausashajtaj Sepulturaman* chinkaykonqanku chayqa, chaypi yachankichej Jehovata pisipaj qhawasqaykichejta”, nispa. 31  Moisés parlayta tukusqantawan, chay runaspa chakinku uramanta jallpʼa ujllata kicharikorqa.+ 32  Ajinamanta jallpʼaqa siminta kicharispa paykunata oqoykorqa, wasinkupi kajkunatawan, jinallataj Coré+ parte kajkunata, tukuy imasninkutawan. 33  Ajinata paykunaqa Sepulturaman* kausashaj chinkaykorqanku, paykuna parte kajkunawan khuska. Jallpʼataj wisqʼaykukorqa, ajinamanta israelitaspa chaupinkumanta chinkachisqa karqanku.+ 34  Paykunaj qhaparisqankuta uyarispa, chay qayllapi muyurisqa kasharqanku chay israelitasqa mancharikuspa ayqekorqanku: “Noqanchejtawan jallpʼaqa oqoykuwasunchej”, nispa. 35  Chantataj Jehová Diosqa ninata apachimorqa.+ Chay ninataj chay 250 runasta ruphaykuspa wañuracherqa, pikunachus inciensota jaywasharqanku chaykunata.+ 36  Chantá Jehová Diosqa Moisesta nerqa: 37  “Sacerdote Aaronpa wawan Eleazarta niy, nina ukhumanta orqhomunanta brasa apaykachanasta,+ imaraykuchus chaykunaqa Diospaj tʼaqasqa kanku. Chantá nillaytaj nina brasasta karuman choqamunanta. 38  Juchallikusqankurayku wañorqanku chay runaspa brasa apaykachanasninkoqa Diospaj tʼaqasqa kanku, imaraykuchus chaykunataqa Jehová Diospa ñaupaqenman apamorqanku. Chayrayku chay brasa apaykachanasninkoqa sillpʼa latasman jina tukuchisqa kachunku, altarta forraykunapaj.+ Chaytaj israelitaspaj uj señal kanqa”,+ nispa. 39  Chantá sacerdote Eleazarqa, ninawan ruphasqa wañurarqanku chay runaspa brasa apaykachanasninkuta oqharerqa, cobremanta ruwasqa karqanku chaykunata. Chaykunatataj takaspa sillpʼayacherqa altarta forranapaj, 40  imaynatachus Jehová Dios Moisesman kamacherqa chayman jina. Chayqa karqa uj señal israelitas yuyarikunankupaj, Aaronpa mirayninmanta kajlla Jehová Diospa ñaupaqenpi inciensota qʼoshñichiyta atisqanta, manataj waj runaqa.+ Chantapis yuyarikunankupaj mana Coré jinachu kananku kasqanta, nitaj Coré parte kajkuna jinachu.+ 41  Qʼayantinpacha tukuy israelitasqa Moisespa contranta, Aaronpa contrantawan thutuyta qallarerqanku:+ “Qankuna wañurachinkichej Jehová Diospa israelita wawasninta”, nispa. 42  Israelitas tantaykukuspa Moisespa contranpi Aaronpa contranpiwan rimashajtinku, Dioswan tinkukuna toldo ladota qhawarerqanku, rikorqankutaj chay toldo patapi phuyuta. Chantá Jehovaj jatun kayninpa kʼanchaynin rikhuriyta qallarerqa.+ 43  Moiseswan Aaronwantaj Dioswan tinkukuna toldoj ñaupaqenman rerqanku.+ 44  Chaypitaj Jehová Diosqa Moisesman nerqa: 45  “Karunchakuychej kay israelitasmanta, paykunataqa uj ñawi chʼirmiypi chinkarparichisaj”,+ nispa. Chayta uyarispa paykunaqa qonqoriykukuspa pampakama kʼumuykukorqanku.+ 46  Chantá Moisesqa Aaronta nerqa: “Brasa apaykachanata apamuy. Chaymantaj churaykuy altarpi kashan chay nina brasasta,+ patanmantaj inciensota jichʼaykuy. Chayta oqhariykukuspataj usqhayta riy israelitas kashanku chayman, juchankumantataj perdonta tarimuy.+ Jehová Diosqa sinchʼi phiñasqa kashan. Wañuchej onqoyqa qallarinña”, nispa. 47  Aaronqa Moisés nisqanman jina brasa apaykachanata oqhariykukuytawan, usqhayllata correrqa israelitas kasharqanku chayman. Chayananpajqa israelitas ukhupi wañuchej onqoy qallarisqaña. Chantá Aaronqa brasa apaykachanaman inciensota jichʼaykorqa israelitaspa juchankumanta perdonta tarinanpaj. 48  Chaymantataj Aaronqa sayaykorqa wañusqaswan kausashajkunawan kasharqanku chay chaupipi. Ajinapitaj wañuchej onqoyqa sayaporqa. 49  Chay wañuchej onqoywan wañojkunaqa tukuyninku karqanku 14.700 runas. Corej juchanrayku wañojkunataj wajlla karqanku. 50  Aaronqa chay wañuchej onqoy sayajtinña, Moisés kasharqa chayman kuterqa, Dioswan tinkukuna toldo punkuman.

Sutʼinchaykunasnin

Chayri “¿Kunanqa munaynillaykitachu ruwachiyta munawayku?”
Hebreo parlaypeqa nin, “¿Chay runaspa ñawisninkutachu orqhonki?”
Chayri “carpa wasisninkumanta”.
Chayri “Seolman”. Glosariopi sepultura nisqata leeriy.
Chayri “Seolman”. Glosariopi sepultura nisqata leeriy.