Josué 24:1-33

  • Josué israelitasta yuyarichin kausayninkumanta (1-13)

  • Josué israelitasman nin Jehová Diostapuni sirvinankuta (14-24)

    • “Noqawan familiaywantajrí, Jehová Diostapuni sirvikusqayku” (15)

  • Josué uj tratota israelitaswan ruwan (25-28)

  • Josué wañupun, chantá pʼampanku (29-31)

  • Josejpa tullusninta Sichempi pʼampanku (32)

  • Eleazar wañupun, chantá pʼampanku (33)

24  Chantá Josueqa tukuy Israel ayllusta* Sichempi* tantacherqa. Chaymanqa wajyacherqa Israelmanta kurajkunata, kamachejkunata, juecesta, cargoyoj kajkunata ima.+ Ajinata paykunaqa Diospa* ñaupaqenpi tantakorqanku.  Josuetaj tukuy israelitasman nerqa: “Kay jinata nin Israelpa Diosnin Jehovaqa: ‘Unay watasqa Mayu* chimpapi ñaupa tatasniykichej tiyakorqanku.+ Abrahanpatawan Nacorpatawan tatanku Tarepis chayllapitaj tiyakorqa. Chaypitaj paykunaqa waj dioskunata sirvej kanku.+  ”’Chantá noqaqa ñaupa tataykichej Abrahanta+ mayu chimpamanta pusamuspa, tukuynin Canaán jallpʼasta puricherqani. Chaypacha paytaqa ashkhaman miracherqani,+ wawan Isaacta qospa,+  Isaacmantaj Jacobtawan Esautawan+ qospa. Esaumanqa qorqani Seír orqota chaypi tiyakunanpaj.+ Jacobtaj Egiptoman wawasninwan riporqa.+  Chaypi kashajtinkutaj Moisesta Aarontawan kacharqani.+ Chaypachaqa Egiptoman castigosta apacherqani.+ Qankunatataj Egiptomanta orqhomorqaykichej.  Tatasniykichejta Egiptomanta orqhomusqaytawan,+ paykuna mar kantuman chayamusqankutawan, egipciosqa Puka mar qochakama paykunata qhatiykamorqanku, maqanakuna carretaswan, caballospi purej soldadoswan ima.+  Paykunaqa Jehová Diosman qhaparikorqanku.+ Paytaj laqhayaykucherqa egipcioswan qankunawan kasharqankichej chay chaupita. Chantá egipciospa patankuman mar yakusta kachaykuspa paykunata pʼampaykorqa.+ Imatachus Egiptopi ruwasqaytaqa kikin ñawisniykichejwan rikorqankichej.+ Chaymanta qhepamantaj ashkha watasta chʼin jallpʼaspi purerqankichej.+  ”’Chantá noqaqa amorreospa jallpʼankuman pusamorqaykichej, pikunachus Jordán mayu chimpapi* tiyakorqanku chaykunaj jallpʼankuman. Paykunataj qankunawan maqanakorqanku.+ Noqatajrí paykunata makisniykichejman jaywaykorqani jallpʼasninkuta japʼikapunaykichejpaj. Noqaqa rikushajtiykichej paykunata chinkarparicherqani.+  Chantaqa Ziporpa wawan Moabmanta rey Balacñataj israelitaswan maqanakorqa. Payqa Beorpa wawan Balaamta wajyachimorqa maldecisunaykichejpaj.+ 10  Noqatajrí mana Balaamta uyarerqanichu.+ Astawanpis kutin kutita paywan bendecicherqaykichej.+ Ajinata makisninmanta librarqaykichej.+ 11  ”’Chaymanta qankunaqa Jordán mayuta chimpamuspa,+ Jericoman+ chayamorqankichej. Jericomanta kamachejkunataj* qankunawan maqanakorqanku, jinallataj amorreospis, perizitaspis, cananeospis, hititaspis, guirgaseospis, heveospis, chantá jebuseospis. Noqaqa paykunatapis makisniykichejman jaywaykullarqanitaj.+ 12  Niraj chayamushajtiykichej mayta paykunata manchaykucherqani, chayrayku paykunaqa ñaupaqeykichejmanta ayqekorqanku,+ amorreospa iskaynin reyesninku jina. Chaytaqa mana espadaykichejwanchu ruwarqankichej, nitaj flechana arcoykichejwanchu.*+ 13  Noqa qorqaykichej mana trabajoykichejwanchu japʼisqaykichej jallpʼasta, mana ruwasqaykichej llajtasta ima.+ Kunantaj chaypi tiyakushankichej. Chantapis mana plantasqaykichej uva sachʼasmanta, olivo sachʼasmanta mikhushankichej’,+ nispa. 14  ”Kunanqa Jehová Diostapuni manchachikuychej, chʼuwa sonqowan payta sirviychej, ni jaykʼaj saqerparispa.+ Chinkachiychej ñaupa tatasniykichej sirverqanku chay dioskunata, mayqenkunatachus mayu chimpapi, Egiptopi ima sirverqanku chaykunata.+ Qankunaqa Jehová Diostapuni sirviychej. 15  Sichus Jehová Diosta mana sirviyta munankichejchu chayqa, kunanpacha ajllakuychej pitachus sirvinaykichejta:+ Ñaupa tatasniykichej mayu chimpapi sirverqanku chay dioskunatachus+ chayri tiyakushankichej chay jallpʼaspi tiyakorqanku chay amorreospa diosesninkutachus.+ Noqawan familiaywantajrí, Jehová Diostapuni sirvikusqayku”. 16  Chantá israelitasqa kuticherqanku: “Noqaykoqa manapuni jaykʼajpis Jehová Diosta saqerpariykumanchu, nitaj waj dioskunatapis sirviykumanchu. 17  Imaraykuchus Jehová Diosninchejqa Egiptomanta orqhomuwarqanchej,+ jinallataj tatasninchejtapis, maypichus esclavos karqanchej chaymanta.+ Payqa ñaupaqenchejpi jatuchaj milagrosta ruwarqa,+ tukuy purisqanchej ñankunapitaj jarkʼawarqanchej, jinallataj tukuy llajtaspipis, maynintachus purerqanchej chaykunapi.+ 18  Jehová Diosqa qharqorqa tukuy runasta, jinallataj amorreostapis, pikunachus noqanchejmanta ñaupajta kay jallpʼaspi tiyakorqanku chaykunata. Chayrayku noqaykupis Jehová Diosta sirvisqayku, imaraykuchus paymin Diosniykoqa”, nispa. 19  Josuetaj israelitasta nerqa: “Qankunaqa mana Jehová Diosta sirviyta atiwajchejchu, payqa may santo Dios,+ munantaj payllata yupaychanata.+ Payqa mana perdonasonqachejchu contranpi oqharikusqaykichejta, nitaj juchasniykichejtapis.+ 20  Sichus Jehová Diosta saqerparispa waj dioskunata sirvinkichej chayqa, payqa qankunapaj allin imasta ruwaspañapis contraykichejpi kanqa, chinkarparichisonqachejtaj”,+ nispa. 21  Israelitastajrí Josueman nerqanku: “Mana chaytaqa ruwasqaykuchu, noqaykoqa Jehová Diostapuni sirvikusqayku”,+ nispa. 22  Chantá Josueqa paykunaman nillarqataj: “Qankunallataj testigos kankichej ‘Jehová Diostapuni sirvikusqayku’ nisqaykichejmanta”,+ nispa. Paykunataj kuticherqanku: “Arí, testigos kayku”, nispa. 23  Josueqa nillarqataj: “Ajina kajtenqa qankuna ukhupi kashanku chay waj dioskunata chinkachiychej. Tukuy sonqowantaj Israelpa Diosnin Jehovaman kutirikuychej”, nispa. 24  Israelitastaj Josueman nerqanku: “Noqaykoqa Jehová Diosniykuta sirvisqayku, niwasqaykutataj kasukusqayku”, nispa. 25  Josueqa chay pʼunchaypacha Sichempi uj tratota israelitaswan ruwarqa, chaypitaj qorqa uj kamachiyta, uj leytawan. 26  Chaytataj Josueqa qhelqarqa Diospa Leynin libropi.+ Chaymantataj uj jatun rumita oqharispa sayaykucherqa+ uj jatun sachʼa uraman, Jehová Diospa santo lugarnin qayllapi. 27  Josueqa israelitasman nillarqataj: “Kay rumeqa noqanchejpaj testigo jina kanqa, imatachus Jehová Dios niwasqanchejta uyarisqanrayku. Chantapis uj testigo jina kanqa contraykichejpi,+ ama Diosniykichejta wasanchanaykichejpaj”, nispa. 28  Chaymanta Josueqa israelitasta sapa ujninkuta jallpʼankuman kachaporqa.+ 29  Chay qhepata Jehová Diospa kamachin Josueqa wañuporqa, 110 watasniyoj kashaspa. Payqa Nunpa wawan karqa.+ 30  Paytaqa pʼamparqanku Timnat-Sérah+ jallpʼanpi. Chayqa kashan Efraín orqospi, Gaas orqoj norte ladonpi.* 31  Josué kausashajtin, Israelitasqa Jehová Diosta sirvispa kausakorqanku, jinallataj kurajkuna kausashajtinkupis. Chay kurajkunaqa yacharqanku imatachus Jehová Dios israelitaspaj ruwasqanta.+ 32  Israelitasqa Josej tullusninta+ Egiptomanta apamusqankuta, Sichempi pʼamparqanku, Jacobpa rantikusqan jallpʼapi. Chay jallpʼataqa rantikorqa Sichempa tatan Hamorpa wawasninmanta,+ 100 qolqeswan.+ Chay jallpʼatataj Josejpa wawasnin japʼerqanku.+ 33  Chantá Aaronpa wawan Eleazarpis wañupullarqataj.+ Paytaqa pʼamparqanku wawan Finehaspa+ lomanpi, mayqentachus Efraín orqospi payman qosqanku chaypi.

Sutʼinchaykunasnin

Uj aylloqa uj familiamanta miraj ashkha familias kanku.
Chayri “Siquempi”. Yanapa A2 nisqata leeriy.
Chayri “cheqa Diospa”. Glosariopi cheqa Dios nisqata leeriy.
Mayu nispaqa Éufrates mayumanta parlashan.
Mayu chimpapi nispaqa nishan inti llojsimuy ladopi kasqanta.
Ichá nillanmantaj “Jericó llajtapi jallpʼasmanta dueñostaj”.
Flechana arco: waj lugarespi ninku camba flecha.
Chayri “pata ladonpi”.