Jeremías 20:1-18

  • Pasjurqa Jeremiasta maqan (1-6)

  • Jeremiasqa willallanpuni (7-13)

    • Diospa nisqasnenqa nina jina kʼajarin (9)

    • Jehovaqa mana atipay atina wapu soldado (11)

  • Jeremiaspa quejan (14-18)

20  Imerpa wawan Pasjurqa sacerdote karqa, chantapis Jehová Diospa wasinmanta kuraj encargado karqa. Payqa Jeremiaspa tukuy willasqanta uyarisharqa.  Chantá Pasjurqa profeta Jeremiasta maqaytawan cepoman* japʼiykuchimorqa.+ Chay cepoqa kasharqa Jehová Diospa wasinpi, Benjamín nisqa Pata Punkupi.  Qʼayantintaj Pasjurqa Jeremiasta cepomanta kacharicherqa. Jeremiastaj Pasjurman nerqa: “Jehová Diosqa sutiykita cambiasunki. Kunanqa manaña Pasjurchu sutiyki kanqa, manaqa Tukuynejpi Mancharina.*+  Jehová Diosqa kayta nisunki: ‘Qantaqa mancharinaman tukuchisqayki, qan kikiyki mancharikunaykipaj, jinallataj tukuy amigosniykipis. Paykunataqa enemigosninku espadawan wañurachenqanku, qantaj chayta ñawisniykiwan rikunki.+ Noqaqa tukuynin Judá nacionta Babiloniaj reyninman jaywaykusaj. Chay reytaj paykunata Babiloniaman presosta apakaponqa, espadawantaj wañurachenqa.+  Kay llajtaj enemigosninman jaywaykusaj kay llajtaj qhapaj kapuyninta, tukuy kapuyninta, valorniyoj tukuy imasninta, jinallataj Judamanta reyespa tukuy qhapaj kapuynintapis.+ Enemigosninkoqa paykunaj kapuyninkuta qhechonqanku, tukuy valorniyoj imasninkuta a la fuerzalla japʼikapuytawan Babiloniaman apakaponqanku.+  Qantajrí Pasjur, wasiykipi tiyakojkunawan khuska preso apasqa kanki. Qanqa Babiloniaman apasqa kanki, chaypi wañunki, chaypitaj pʼampasonqanku, qanta, tukuy amigosniykitawan. Chayqa ajina kanqa llulleriosta paykunaman willasqaykirayku’,+ nispa”.   Jehová Diosníy, qanqa chʼaukiyaykuwanki,* noqataj creeykuyki. Qanqa kallpayoj kaspa atipaykuwanki.+ Kunanqa diantinta asipayawanku. Tukuy runas burlakuwanku.+   Noqaqa sapa parlarispa qhaparinay tiyan, ninaytaj tiyan: “Maqanakuy kanqa. Judá nación thuñisqa kanqa”, nispa. Jehová Diospa nisqanta willasqayrayku runasqa insultawanku, diantintaj burlakuwanku.+   Chantá nerqani: “Manaña paymanta parlasajchu,niña sutinpi parlasajchu”,+ nispa. Jinapis paypa nisqasnenqa sonqoypi nina jina kʼajarerqa, tullusniy ukhupipis kʼajarishanman jina karqa. Sonqoyta ñitʼiykukuyta munashaspapis mana aterqanichu. Manañapuni chʼinlla kayta aterqanichu.+ 10  Noqaqa uyarerqani contrayta parlashasqankuta. Tukuy imapis mancharinapaj jina karqa.+ Runasqa nisharqanku: “Payta chʼataykuychej.* Jaku payta chʼataykamunachej”, nispa. Allin rinawanta niwajkunaqa pantanallayta suyasharqanku,+ kayta nispa: “Ichapis payqa mana yuyaychakuspalla imatapis ruwanqa,chaywanqa payta atipasunchej, paymantataj vengakusunchej”, nispa. 11  Chaywanpis Jehová Diosqa noqawan kasharqa mana atipay atina wapu soldado jina.+ Chayrayku japʼiwayta munajkunaqa urmanqanku, nitaj atipanqankuchu.+ Pʼenqaypi rikhurenqanku, munayninkuta mana ruwayta atisqankurayku. Pʼenqaypi rikhurisqankoqa wiñaypaj kanqa, nitaj jaykʼajpis qonqasqachu kanqa.+ 12  Angelesta kamachej Jehová Diosníy, qanqa cheqan runaj sonqonta sumajta qhawaykunki. Qanqa sumajta qhawaykunki runaj yuyasqanta, sonqontapis.+ Diosníy, saqeway ari paykunamanta vengakusqaykita rikojta.+ Noqaqa qanpa makiykiman quejayta saqeni.+ 13  Jehová Diosman takiychej. Jehová Diosta alabaychej. Paymin wajcha runastaqa sajra runaspa makisninkumanta kacharichin. 14  Maldecisqa kachun nacekusqay pʼunchayqa. Ama bendecisqachu kachun mamay nacechikuwasqan pʼunchayqa.+ 15  Maldecisqa kachun pichus tatayta kusichejqa. Pichus kay willayta kusisqa tatayman willamojqa: “Wawayki nacekun. Qharisitu”, nispa willamojqa. 16  Chay runaqa kachun Jehová Diospa chinkachisqan llajtas jina, mana khuyarispa chinkachisqan llajtas jina. Tutamantaqa runaspa qhaparisqankuta uyarichun, chaupi pʼunchaytataj guerraman yaykunapaj qhaparisqankuta uyarichun. 17  ¿Imajtintaj mamaypa wijsanpi mana wañorqanichuri? Mamaypa wijsanqa sepulturay kanman karqa. Mamayqa wiñaypaj onqoj kanman karqa.+ 18  ¿Imallapajtaj mamaypa wijsanmanta llojsimorqani kay jinata sufrinaypaj, kay jina llakiypi kanaypaj,pʼenqaypitaj tukukunaypajri?+

Sutʼinchaykunasnin

Glosariopi cepo nisqata leeriy.
Chayri “Magor-Mesabib”.
Chayri “engañaykuwanki”.
Chayri “juchachaykuychej”.