2 Crónicas 3:1-17

  • Salomonqa templota ruwayta qallarin (1-7)

  • Aswan Santo Lugar (8-14)

  • Iskaynin cobre pilares (15-17)

3  Chantá Salomonqa Jerusalenpi Jehová Diospa wasinta ruwayta qallarerqa,+ Moria orqo patapi,+ maypichus Jehová Diosqa tatan Davidman rikhurisqa chaypi,+ maynejpichus tatan David campocharqa jebuseo Ornanpa eranta*+ chaypi.  Salomonqa wasita ruwayta qallarerqa tawa watastaña kamachishaspa, iskay kaj killapi, iskay kaj pʼunchaypi.  Salomonqa cheqa Diospa* wasinta ruwananpaj cimientosta churarqa, chay cimientosqa largonman karqa 27 metrosniyoj, anchonmantaj 9 metrosniyoj,+ ñaupa medidaman jina.*  Wasej ñaupaqenpi torreqa wasi jinallataj anchonman 9 metrosniyoj karqa, altonmantaj 120 karqa.* Chay torrej ukhuntataj oro purowan forraykorqa.+  Chantá jatun wasej ukhunta enebro tablaswan tableaykorqa, patanmantaj aswan sumajnin orowan forraykorqa.+ Chantá kʼachanchaykorqa palmera dibujoswan+ cadenaswan+ ima.  Chantapis wasitaqa kʼachitu rumiswan+ kʼachanchaykorqa. Chay forrasqan oroqa+ Parvaimmanta karqa.  Orowan forraykorqa+ wasej ukhunta, vigasninta, punku patasninta, perqasninta, punkusnintapis. Perqasninpitaj querubinesta* llajllarqa.+  Chantá Aswan Santo Lugarta* tʼaqarqa.+ Chaytaj largonman 9 metros karqa* wasej anchon jinallataj, anchonpis 9 metrosllataj karqa. Aswan sumajnin orowantaj forraykorqa, 20.520 kilos* orowan.+  Sapa clavomanqa 570 gramos* oro yaykorqa. Terraza* cuartostapis orowan forraykorqa. 10  Chantá Aswan Santo Lugarpi* iskay querubinesta llajllarqa, orowantaj forraykorqa.+ 11  Iskaynin querubinespa kichasqa lijrasnenqa*+ miderqa 9 metros.* Ujnin querubinpa ujnin lijranqa miderqa iskay metros 20 centimetrosniyoj,* wasej perqanmantaj chayaj, ujnin lijranpis miderqa iskay metros 20 centimetrosniyojllataj,* chaytaj tinkoj chay ujnin querubinpa lijranwan. 12  Chay ujnin querubinpa ujnin lijranqa miderqa iskay metros 20 centimetrosniyoj,* wasej ujnin perqanmantaj chayaj, ujnin lijranpis miderqa iskay metros 20 centimetrosniyojllataj,* chaytaj tinkoj chay ujnin querubinpa lijranwan. 13  Chay iskay querubinespa kichasqa lijrasninkoqa miderqa 9 metros.* Chay querubinesqa sayasqa kasharqanku jatun cuarto qhawarisqa.* 14  Chantá cortinata ruwallarqataj+ azul hilowan, kulli* qʼaytuwan, puka hilowan, sumaj telawantaj. Chay cortinamantaj querubinesta bordaykorqa.+ 15  Chantá wasej ñaupaqenpi iskay pilaresta ruwarqa,+ chay pilarestaj sayayninman miderqa 15 metros khuskanniyoj.* Sapa pilarpa patanpitaj pʼuñus jina karqa, chay pʼuñustaj miderqa iskay metros 20 centimetrosniyoj.*+ 16  Chantá cadenasta ruwarqa collarta jina, chaytataj pilares pataman churaykorqa. Chantá ruwarqa 100 granadasta, chaykunatataj cadenasman warkhuykorqa. 17  Temploj ñaupaqenpi iskay pilaresta sayacherqa, ujta paña ladopi,* ujtataj lloqʼe ladopi.* Paña ladopi kajmanqa Jakín* sutita churarqa, lloqʼe ladopi kajmantaj Boaz* sutita churarqa.

Sutʼinchaykunasnin

Glosariopi era nisqata leeriy.
Glosariopi cheqa Dios nisqata leeriy.
Hebreo parlaypeqa nin, “largonman 60 codos, anchonmantaj 20 codos, ñaupa medidaman jina”. Uj codoqa 44,5 centímetros karqa. Wakintaj yuyanku “ñaupa medidaman jina” nispaqa aswan jatun codomanta parlashasqanta, chay jatun codotaj 51,8 centímetros karqa. Yanapa B14 nisqata leeriy.
Mana yachakunchu 120 codoschus karqa o waj medidachus karqa.
Glosariopi querubín nisqata leeriy.
Hebreo parlaypeqa nin, “Aswan Santo wasita”.
Hebreo parlaypeqa nin, “20 codos karqa”.
Hebreo parlaypeqa nin, “600 talentos”. Uj talentoqa pesarqa 34,2 kilos (1.101 onzas troy). Yanapa B14 nisqata leeriy.
Hebreo parlaypeqa nin, “50 siclos”. Uj sicloqa pesarqa 11,4 gramos (0,367 onzas troy). Yanapa B14 nisqata leeriy.
Chayri “Wasi pata”.
Hebreo parlaypeqa nin, “Aswan Santo wasipi”.
Lijra: waj lugarespi ninku ala.
Hebreo parlaypeqa nin, “20 codos”.
Hebreo parlaypeqa nin, “5 codos”.
Hebreo parlaypeqa nin, “5 codos”.
Hebreo parlaypeqa nin, “5 codos”.
Hebreo parlaypeqa nin, “5 codos”.
Jatun cuarto qhawarisqa nispaqa niyta munan Santo lugar qhawarisqa.
Hebreo parlaypeqa nin, “20 codos”.
Chayri “morado”.
Hebreo parlaypeqa nin, “35 codos”.
Hebreo parlaypeqa nin, “5 codos”.
Chayri “sur ladopi”.
Chayri “norte ladopi”.
Jakín suteqa niyta munan Diosqa sinchʼita sayachichun.
Boaz suteqa ichapis niyta munan kallpawan.