1 Reyes 19:1-21
19 Chantá Achabqa*+ Jezabelman+ willarqa imastachus Elías ruwasqanta, Baalpa tukuynin profetasnintapis espadawan wañuchisqanta.+
2 Jezabeltaj uj runata kacharqa Eliasta nimunanpaj: “Diosesneyqa sinchʼita castigawachunku, manachus qʼaya kay horasta chay profetasta jina wañuchisqayki chayqa”, nispa.
3 Eliastaj manchayta mancharikuspa sayariytawan ayqekorqa mana wañuchinankupaj.+ Payqa Beer-Sebaman+ chayarqa, chaytaj Judá japʼiyña karqa,+ chaypitaj kamachinta saqeporqa.
4 Chantá Eliasqa chʼin jallpʼasninta riporqa uj día puriyta. Uj retama sachʼaman chayaspataj, chay sachʼa urapi tiyarikorqa. Payqa wañuyllataña munaspa* kay jinata mañakorqa: “Imapajña kausasaj. Kunanqa Jehová Diosníy, wañuchikapullawayña ari.+ Ñaupa tatasniymanta nisqaqa mana aswan sumajchu kani”, nispa.
5 Chantá Eliasqa retama sachʼa urapi siriykuspa* puñurparerqa. Chayllapi uj ángel payta llojchirispa+ nerqa: “Sayarispa mikhuy”,+ nispa.
6 Eliastaj qhawarispa rikorqa uman chaynejpi, uj muyu tʼantata rupha rumis patapi, uj yuru yakutawan. Paytaj mikhorqa ujyarqataj, chantá watejmanta siriykuspa puñurpallarqataj.
7 Jehová Diospa angelnintaj ujtawan jamorqa, Eliasta llojchirispataj nillarqataj: “Sayarispa mikhuy, manachayqa mana kallpayki kanqachu, karuta rinayki kashan”, nispa.
8 Eliastaj sayarispa mikhorqa ujyarqataj. Chay mikhusqan kallpawantaj 40 pʼunchayta, 40 tutatawan purerqa Horeb orqoman chayanankama, chayqa karqa cheqa Diospa* orqon.+
9 Chantá Eliasqa uj cuevaman yaykuspa+ chaypi chay chʼisi quedakorqa. Jehová Diostaj payta nimorqa: “Elías, ¿imatá kaypi ruwashanki?”, nispa.
10 Eliastaj kuticherqa: “Noqaqa Jehová Diosta tukuy sonqoywanpuni sirvini, paymin angelespa kamachejnin.+ Israelmanta runasqa trato ruwasqaykita mana valechinkuchu,+ altaresniykitapis urmaykuchinku, profetasniykitapis espadawan wañurachinku,+ noqa sapallayña kausashani. Kunantaj noqatañataj wañuchiyta munashawanku”,+ nispa.
11 Diostaj nerqa: “Llojsispa orqo patapi sayamuy Jehová Diospa ñaupaqenpi”, nispa. Jehová Diostaj chaynejta pasasharqa,+ sinchʼi wayrataj orqosta phatachisharqa, qaqastapis urmachisharqa Jehová Diospa ñaupaqenpi.+ Jehová Diostajrí mana chay wayra ukhupichu kasharqa. Wayra pasajtintaj jallpʼañataj sinchʼita kharkaterqa,+ Jehová Diostajrí mana chay jallpʼa kharkatiypichu kasharqa.
12 Jallpʼa manaña kharkatejtintaj, ninañataj laurarerqa,+ Jehová Diostajrí mana chay laurashaj ninapichu kasharqa. Nina pasajtintaj uj kʼacha parlay uyarikamorqa, manchay llanitulla.+
13 Eliastaj chayta uyariytawankama uyanta maytʼuykukorqa profeta ropanwan,+ llojsimuspataj cuevaj punkunpi sayaykorqa. Chantá uj parlayta uyarerqa nimojta: “Elías, ¿imatá kaypi ruwashanki?”, nispa.
14 Eliastaj kuticherqa: “Noqaqa Jehová Diosta tukuy sonqoywanpuni sirvini, paymin angelespa kamachejnin. Israelmanta runasqa trato ruwasqaykita mana valechinkuchu,+ altaresniykitapis urmaykuchinku, profetasniykitapis espadawan wañurachinku, noqa sapallayña kausashani. Kunantaj noqatañataj wañuchiyta munashawanku”,+ nispa.
15 Jehová Diostaj Eliasta nerqa: “Kutispa Damasco chʼin jallpʼaman riy. Jaqayman chayaspataj Hazaelta+ churanki* Siriapi rey kananpaj.
16 Chantapis Nimsijpa allchhin Jehuta+ churanki Israelpi rey kananpaj. Abel-Meholamanta Safatpa wawan Eliseotapis* churallankitaj profeta kananpaj, qanpa cuentaykimanta.+
17 Hazaelpa espadanmanta+ ayqekojkunataqa Jehú wañuchenqa.+ Jehuj espadanmanta ayqekojkunatataj Eliseo wañuchenqa.+
18 Israelpeqa 7.000 runas kapuwanraj,+ paykunaqa mana Baalman qonqorikunkuchu,+ nitaj muchʼaykunkuchu”,+ nispa.
19 Eliastaj chaymanta ripuytawan Safatpa wawan Eliseota rikorqa yuntawan llankʼashajta. Chaypeqa 12 yuntas llankʼasharqanku Eliseotaj qhepa kaj yuntawan llankʼasharqa. Eliastaj Eliseoman qayllaykuspa profeta ropanwan+ choqaykorqa.
20 Eliseotaj yuntata saqerpariytawan Eliaspa qhepanta correspa nerqa: “Ama jina kaspa, saqellaway tataytawan mamaytawan muchʼaykamojta. Chantá qhepaykita jamusaj”, nispa. Eliastaj nerqa: “Rerqollay, mana jarkʼashaykichu”, nispa.
21 Eliseotaj rispa iskay torosta ñakʼarqa,* yugota aradotawan enqhaykuspataj chay toro aychasta chayacherqa. Chantá runasman jaywarerqa, runastaj mikhorqanku. Chantá Eliseoqa sayariytawan Eliaspa qhepanta riporqa, chaymanta jaqaymantaj Eliaspa kamachin karqa.+
Sutʼinchaykunasnin
^ Siriy: waj lugarespi ninku winkuy.
^ Glosariopi cheqa Dios nisqata leeriy.
^ Hebreo parlaypeqa nin, “aceitewan jichʼanki”.
^ Eliseo suteqa niyta munan Diosmin salvacionqa.
^ Ñakʼay: waj lugarespi ninku degollay, wañuchiy.
