1 Reyes 13:1-34

  • Betel altarpa contranta Dios willachin (1-10)

    • Altar partirpakun (5)

  • Diospa profetanqa mana kasukunchu (11-34)

13  Jeroboán chay altarpi+ jaywanata qʼoshñichinanpajña sayashajtin, Diospa kamachin+ Judamanta Betelman chayamorqa, paytaqa Jehová Dios kamachisqa Betelman jamunanta.  Chantá chay kamacheqa altarpa contranta parlarqa, Jehová Dios kamachisqanman jina, nerqataj: “Altar, altar, kayta Jehová Diosqa nin: ‘Davidpa mirayninmanta uj qhari wawa nacekonqa, Josías sutiyoj.+ Payqa pata lugarespi sirvinku chay sacerdotesta pataykipi ruphachenqa, pikunachus jaywanasta pataykipi qʼoshñichishanku chaykunata. Runa tullustapis pataykipi ruphachenqa’”,+ nispa.  Diospa kamachenqa chay pʼunchayllataj uj señalta qorqa, kayta nispa: “Jehová Diosqa kay señal kananta nin: Altarqa partikonqa, patanpi kaj ushphataj* qhallikonqa”,* nispa.  Rey Jeroboantaj Diospa* kamachin imatachus Betelpi altarpa contranta nisqanta uyariytawan, altarmanta makinta aysarispa nerqa: “Japʼiychej chay runata”,+ nispa. Diospa kamachinpa contranta aysarerqa chay makintaj chay ratopacha chʼakirparqa, nitaj kuyurichiyta aterqañachu.+  Chantá altarqa partirpakorqa, ushphataj chay altarmanta qhallikorqa, Diospa kamachin señalta qosqanman jina, Jehová Dios kamachisqanman jina.  Reytaj Diospa kamachinman nerqa: “Jehová Diosniykita rogapuway khuyakunawanta. Mañapuway ari, makiyta sanoyachinanta”,+ nispa. Diospa kamachintaj Jehová Diosman rogakorqa reyta khuyakunanta, reypa makintaj sanoyaporqa ñaupajta karqa ajinaman.  Reytaj Diospa kamachinta nerqa: “Jaku wasiyman mikhurikamunki, uj regalotapis qosqayki”, nispa.  Diospa kamachintaj reyta nerqa: “Khuskan wasiykita qowajtiykipis, manapuni qanwan risajchu, kay lugarpeqa ni tʼantatapis mikhusajchu, ni yakutapis ujyasajchu.  Jehová Diosqa kamachiwarqa: ‘Ama tʼantata mikhunkichu, nitaj yakutapis ujyankichu, amataj risqayki ñanta kutimunkichu’, nispa”. 10  Chayrayku payqa waj ñanta riporqa, manataj Betelman jamorqa chay ñantachu kutiporqa. 11  Chaypacha Betelpi uj machitu profeta tiyakorqa, wawasnintaj wasinman chayaspa willarqanku imastachus Diospa kamachin chay pʼunchay Betelpi ruwasqanta, imatachus reyman nisqantapis. Tatankuman chayta willajtinkutaj, 12  tatankoqa paykunata taporqa: “¿Mayqen ñantataj ripun?”, nispa. Wawasnintaj rikucherqanku mayqen ñantachus ripusqanta Judamanta jamorqa chay Diospa kamachin. 13  Chay machitutaj wawasninman nerqa: “Burrota caronapuwaychej”,* nispa. Wawasnintaj burrota caronaporqanku, chay machitutaj burroman montaykorqa. 14  Payqa Diospa kamachinpa qhepanta kachaykukorqa, tariparqataj jatun sachʼa urapi tiyakushajta. Taporqataj: “¿Qanchu Diospa kamachin kanki? ¿Qanchu Judamanta jamorqanki?”,+ nispa. Diospa kamachintaj kuticherqa: “Arí”, nispa. 15  Chay machitu profetataj nerqa: “Jaku wasiman tʼantata mikhurikamunki”, nispa. 16  Diospa kamachintaj nerqa: “Manapuni qanwan kutiymanchu, manapuni wasiykiman riymanchu, nitaj kay lugarpi qanwan khuska tʼantata mikhuymanchu, ni yakutapis ujyaymanchu. 17  Noqataqa Jehová Dios kamachiwan: ‘Chaypeqa ama tʼantata mikhunkichu, ni yakutapis ujyankichu. Amataj risqayki ñanta kutimunkichu’, nispa”. 18  Chay machitutaj nerqa: “Noqapis qan jina profetallataj kani. Jehová Diospa angelnintaj kamachiwan: ‘Wasiykiman kutichimunki tʼantata mikhunanpaj, yakutapis ujyananpaj’, nispa”. (Chaytaqa llullakuspa parlarqa). 19  Ajinamanta Diospa kamachenqa chay machituwan khuska kutimorqa wasinpi tʼantata mikhunanpaj, yakutapis ujyananpaj. 20  Mesapiña tiyasqa kashajtinkutaj, Jehová Diosqa parlamorqa machitu profetaman. 21  Chayrayku chay machitu profetaqa Diospa kamachinman jatunmanta nerqa: “Jehová Diosqa kayta nin: ‘Qanqa Jehová Diospa kamachisqanta mana valechinkichu, nitaj kasukunkichu imatachus Jehová Diosniyki kamachisusqanta. 22  Qanqa kay lugarman kutimunki tʼantata mikhunaykipaj, yakuta ujyanaykipaj, Dios kayta kamachisojtinpis: “Ama tʼantata mikhunkichu, ni yakutapis ujyankichu”, nispa. Chayrayku wañusqa cuerpoykeqa mana ñaupa tatasniykej sepulturanpichu pʼampakonqa’,+ nispa”. 23  Chantá Diospa kamachenqa tʼantata mikhorqa, ujyarqataj. Machitu profetataj paypaj* burrota caronaporqa. 24  Chantá Diospa kamachenqa ñanninta riporqa, ñanpitaj uj leonwan tinkorqa, leontaj payta wañurpacherqa.+ Cuerponqa ñanpi wijchʼurayasharqa, burrotaj ladonpi sayasharqa, leonpis chay cuerpoj ladollanpitaj sayasharqa. 25  Chay ñanta purej runastaj rikorqanku chay wañusqa cuerpota ñanpi wijchʼurayashajta, rikullarqankutaj leonta chay wañusqa cuerpoj ladonpi sayashajta. Machitu profeta tiyakorqa chay llajtaman rispataj chay rikusqankuta willarqanku. 26  Machitu profetataj chay willasqankuta uyariytawan nerqa: “Chay runaqa Diospa kamachin, payqa Jehová Diospa kamachisqanta mana kasorqachu.+ Chayrayku Jehová Diosqa leonta kachan, leontaj payman phinkiykuspa wañurpachin, chaytaj ruwakun Jehová Dios payman nisqanman jina”,+ nispa. 27  Chantá chay machitu profetaqa wawasninta nerqa: “Burrota caronapuwaychej”, nispa. Wawasnintaj burrota caronaporqanku. 28  Chantá ñanta rispa chay wañusqa cuerpota tarerqa ñanpi wijchʼurayashajta. Burrowan leonwantaj chay cuerpoj ladonpi sayashasqanku. Leonqa mana chay wañusqa cuerpota mikhusqachu, ni burrotapis imanasqachu. 29  Chay machitu profetaqa Diospa kamachinpa cuerponta oqharispa burroman cargaykorqa, llajtanmantaj apakaporqa, chaypi waqapunankupaj, pʼampanankupajtaj. 30  Chantá machitu profetaqa sepulturanman chay wañusqata pʼampaykamorqa. Runastaj waqaspa nisharqanku: “Ay hermanóy, kay jinaman chayanaykiri”, nispa. 31  Pʼampaykamuytawantaj chay machitu profetaqa, wawasninman nerqa: “Wañojteyqa pʼampawankichej maypichus Diospa kamachin pʼampasqa kashan chayman. Tullusniytaqa churankichej tullusninpa ladonman.+ 32  Payqa Jehová Dios kamachisqanrayku parlarqa Betelpi kaj altarpa contranpi, parlallarqataj Samaria llajtaspa pata lugaresninpi tukuynin yupaychana wasispa contranpi.+ Chay parlasqantaj juntʼakonqapuni”,+ nispa. 33  Chay jina pasajtinpis Jeroboanqa manapuni chay mana allin ñanninmanta kutirikorqachu. Payqa sigue sacerdotesta churasharqa runas ukhullamanta ajllaspa chay pata lugarespi sirvinankupaj. Payqa piskunatachus munaj chaykunata sacerdotes kanankupaj churaj.+ Payqa nej: “Kaypis sacerdotellataj kachun pata lugarespi sirvinanpaj”,+ nispa. 34  Jeroboanpa mirayninmanta kajkunaqa chayta ruwaspa juchallikorqanku,+ chaynejta paykunaqa kay jallpʼa patamanta chinkachisqa karqanku.+

Sutʼinchaykunasnin

Chayri “wirarara ushpha”. Wirarara ushpha nishan imaraykuchus uywa wañuchisqasta qʼolachejtinku wira sutʼuykoj. Chayrayku ushphaqa wirarara karqa.
Qhalliy: waj lugarespi ninku qhallay.
Chayri “cheqa Diospa”. Glosariopi cheqa Dios nisqata leeriy.
Chayri “wakichipuwaychej”.
Hebreo parlaypeqa nin, “kutirichimorqa chay profetapaj”.