Hechos 5:1-42

  • Ananiaswan Safirawan (1-11)

  • Apostolesqa ashkha milagrosta ruwanku (12-16)

  • Apostolesta carcelman wisqʼaykunku, uj angeltaj paykunata orqhomun (17-21a)

  • Watejmanta Jatun Juntaman apostolesta apanku (21b-32)

    • ‘Diostapuni kasunayku tiyan runasta kasunaykumantaqa’ (29)

  • Gamalielpa yuyaychasqan (33-40)

  • Wasimanta wasi willanku (41, 42)

5  Chantá uj runa Ananías sutiyoj, warmin Safirawan jallpʼankuta venderqanku.  Ananiastaj warminpa yachananta wakin qolqeta pakaykorqa, apostolesmantaj wakillanta aparqa.  Pedrotaj payta nerqa: “Ananías, ¿imaraykutaj saqerqanki Satanás tanqasunanta Diospa atiyninta* pisipaj qhawaspa llullakunaykipajri? Qanqa jallpʼa vendesqayki qolqemanta wakinta pakaykunki.  Manaraj jallpʼaykita vendeshajtiyki, ¿manachu chay jallpʼaqa qanpata karqa? Vendesqaykitawanpis qolqeqa, ¿manachu makiykipi kasharqa? ¿Imaraykutaj sonqoykipi yuyarqanki kayta ruwaytari? Qanqa mana runasmanchu llullakunki, manachayqa Diosman”, nispa.  Ananiastaj Pedroj nisqanta uyariytawan wañusqa wijchʼukorqa. Chayta uyarejkunataj maytapuni manchachikorqanku.  Wakin jovenestaj sayariytawan telaswan maytʼuykorqanku, jawaman orqhospataj pʼampamorqanku.  Kinsa horasninman jinataj, Ananiaspa warminñataj yaykorqa, manataj yacharqachu imachus pasasqanta.  Pedrotaj Safirata taporqa: “Niway, ¿kay chhika qolqepichu jallpʼata venderqankichej?”, nispa. Paytaj nerqa: “Arí, chay chhikapi venderqayku”, nispa.  Chantá Pedro nerqa: “¿Imaraykutaj iskayniykichej yachachinakorqankichej Jehová* Diospa atiyninta* pruebaman churanaykichejpajri? Qosaykita pʼampamojkunaqa punkupiña kashanku, qantapis kikillantataj apasonqanku”, nispa. 10  Chay ratopachataj Safiraqa Pedroj ñaupaqenpi wañusqa wijchʼukorqa. Jovenestaj yaykumuspa wañusqata tariparqanku, jawaman orqhospataj qosanpa ladonman pʼampamorqanku. 11  Chayrayku congregacionmanta* kajkuna, jinallataj chay imasta uyarejkunapis maytapuni manchachikorqanku. 12  Apostolesqa runas ukhupi ashkha milagrosta, tʼukuna imastawan ruwashallarqankupuni, tukuyninkutaj Salomonpa Corredornin nisqapi tantakoj kanku. 13  Waj runasmantaqa mana pipis creejkunaman ujchakuyta munajchu kanku, chaywanpis tukuy runasqa creejkunata allin ñawiwan qhawaj kanku. 14  Señorpi creejkunataj astawan astawan yapakusharqanku ashkha qharis, jinallataj warmispis. 15  Runasqa onqosqasta orqhorqanku ancho ñankunaman, chaypitaj phulluspi sirisqasta* suyachej kanku, Pedro chaynejta pasashajtin mayqellanmanpis llanthun chayananpaj. 16  Jerusalenpa muyuynin llajtasmantapis ashkha runas jamoj kanku onqosqasta, supaykunaj ñakʼarichisqan runastawan apamuspa, tukuyninkutaj sanoyachisqa karqanku. 17  Chantá kuraj kaj sacerdote,* jinallataj tukuy paywan kajkunapis, pikunachus saduceospa yachachiyninta qhatejkuna karqanku, chaykunaqa sinchʼita phiñakuspa apostoleswan chhoqonakorqanku. 18  Apostolesta japʼispataj carcelman wisqʼaykucherqanku. 19  Chay tutataj, Jehová* Diospa angelnin carcelpa punkusninta kicharispa, paykunata orqhomorqa, nerqataj: 20  “Riychej temploman,* chaypitaj runasman parlamullaychejpuni, jamoj kausaymanta sumaj willaykunata”, nispa. 21  Chayta uyarispataj apostolesqa sutʼiyayta temploman yaykuspa yachachiyta qallarerqanku. Chaykamataj kuraj kaj sacerdote, paywan kajkuna ima wajyacherqanku Jatun Juntapi* kajkunata, israelitaspa tukuy kurajkunankutawan tantakamunankupaj. Guardiastataj carcelman kacharqanku, chay tantakuyman apostolesta apamunankupaj. 22  Guardiastaj carcelman chayaspa mana apostolesta tarerqankuchu. Kutimuspataj willarqanku: 23  “Carceltaqa sumaj wisqʼasqata taripayku, guardiastapis punkupi sayashajta, punkuta kicharispataj mana pitapis chay ukhupi tariykuchu”, nispa. 24  Chayta uyarispa templota qhawajkunaj kamachejninku, jinallataj kuraj sacerdotespis mayta tʼukorqanku imapichus chay imas tukunanmanta. 25  Uj runataj chayamuspa paykunaman willarqa: “Carcelman wisqʼacherqankichej chay runasqa templopi kashanku, runasmantaj yachachishanku”, nispa. 26  Templota qhawajkunaj kamachejninkutaj guardiasninwan rispa apostolesta allillanwan pusamorqanku, paykunaqa manchachikorqanku runas rumiswan chʼanqaykunankuta. 27  Apostolesta pusamuspataj Jatun Juntaj ñaupaqenpi sayaykucherqanku. Chantá kuraj kaj sacerdoteqa paykunata taporqa: 28  “¿Manachu kamacherqayku ama Jesuspa sutinpi yachachinaykichejta? ¿Imaraykutaj chanta yachachiyniykichejwan Jerusalenman juntʼaykuchinkichejri? ¿Imaraykutaj chay runaj wañuyninmanta juchachayta munawaykuri?”, nispa. 29  Pedrowan chay waj apostoleswantaj kuticherqanku: “Noqaykoqa Diostapuni kamachejniykuta jina kasunayku tiyan runasta kasunaykumantaqa. 30  Ñaupa tatasninchejpa Diosnenqa Jesusta kausaricherqa, pitachus qankuna wañucherqankichej kʼaspiman* warkhuspa, chayta. 31  Paytaqa Dios jatuncharqa paña ladonpi tiyaykunanpaj, churarqataj runasman Kausayta Qonanpaj, runastataj Salvananpaj. Diosqa chayta ruwarqa israelitas juchasninkumanta pesachikunankupaj, perdonasqataj kanankupaj. 32  Noqaykutaj chay imasmanta testigos kayku, jinallataj Diospa atiyninpis,* mayqentachus Dios qon, payta kamachejninkuta jina kasukojkunaman, chay”, nispa. 33  Chayta uyarispataj maytapuni phiñakorqanku, apostolestapis wañuchiyta munarqanku. 34  Chay Jatun Juntapeqa uj fariseo* runa kasharqa, Gamaliel sutiyoj, payqa Leymanta yachachej karqa, tukuy runastaj allinpaj qhawaj kanku. Gamalielqa sayariytawan kamacherqa uj rato jawaman apostolesta orqhonankuta. 35  Chay Jatun Juntapi kajkunamantaj nerqa: “Israelitas, imatachus kay runaswan ruwayta yuyashasqaykichejta allinta qhawarikuychej. 36  Niraj unaychu Teudas oqharikorqa, profeta kasqantataj nerqa. Tawa pachaj jina runastaj payman ujchaykukorqanku. Teudasta wañuchejtinkutaj, tukuy payta qhatejkunaqa chʼeqerarqanku, chinkaporqankutaj. 37  Paymanta qhepatataj censo ruwakorqa chay pʼunchaykunapeqa Galileamanta Judasñataj oqharikorqa. Judasqa ashkha runasta inkitarqa payta qhatinankupaj. Paypis wañullarqataj, tukuy payta qhatejkunataj chʼeqerarqanku. 38  Chayrayku kayta niykichej: Ama kay runasta imanaychejchu, kacharipuychej. Sichus chay yachachisqanku chayri chay ruwasqanku runasllamanta kashan chayqa, chinkaponqa, 39  Diosmanta kashan chayrí mana chinkachiyta atiwajchejchu. Pajtataj qankuna Diospa contranpi maqanakushaj rikhuriwajchej”. 40  Gamalielpa yuyaychasqanta japʼikuspataj, apostolesta wajyachimorqanku. Paykunata jasutʼichispataj, amaña Jesuspa sutinpi parlanankuta kamacherqanku, chantá kachariporqanku. 41  Apostolestajrí Jatun Juntaj ñaupaqenmanta kusisqa riporqanku, Jesuspa sutinrayku ñakʼarisqankumanta. 42  Sapa diataj mana saykʼuspa templopi, jinallataj wasimanta wasi rispa Cristo Jesusmanta sumaj willaykunata yachachisharqanku, willasharqankutaj.

Sutʼinchaykunasnin

Chayri “tanqasunanta espíritu santota”. Glosariopi “Espíritu santo” nisqata leeriy.
Glosariopi “Jehová” nisqata leeriy.
Glosariopi “Espíritu” nisqata leeriy.
Glosariopi “Congregación” nisqata leeriy.
Chayri “winkusqata”.
Glosariopi “Kuraj kaj sacerdote” nisqata leeriy.
Glosariopi “Jehová” nisqata leeriy.
Chayri “Diospa wasinman”.
Glosariopi “Jatun Junta” nisqata leeriy.
Chayri “sachʼaman”.
Chayri “jinallataj espíritu santopis”. Glosariopi “Espíritu santo” nisqata leeriy.
Glosariopi “Fariseos” nisqata leeriy.