Ir al contenido

¿Pikunataj cieloman renqanku?

¿Pikunataj cieloman renqanku?

Biblia nin

Diosqa, cheqa sonqo cristianosmanta pisi runasllata ajllan kausarimuspa cieloman ripunankupaj (1 Pedro 1:​3, 4). Paykunaqa ajllasqa kaspañapis, sinchʼi creeynillayojpuni kananku tiyan. Mana chayta ruwanqanku chayqa, mana cielopi kausayta tʼinkata jina japʼenqankuchu (Efesios 5:5; Filipenses 3:​12-​14).

¿Imamantaj cieloman renqanku?

Paykunaqa cielopi reyestaj sacerdotestaj kanqanku. Jesuswan khuskataj 1.000 watasta kamachimonqanku (Apocalipsis 5:​9, 10; 20:6). Paykunaqa mosoj gobiernomanta chayri ‘mosoj cielomanta’ kanqanku. Kamachimonqankutaj kay jallpʼapi Diosta kasukoj runasta chayri ‘mosoj jallpʼata’. Paykunaqa reyes jina yanapawasunchej mosoj yuyayniyoj, mosoj cuerpoyoj kananchejpaj. Chantapis Diosta yupaychaspa kusisqa kausakunanchej yanapawasunchej. Diosqa runata ruwashaspa ajinata kausakunanchejta munarqa (Isaías 65:17; 2 Pedro 3:​13).

¿Mashkha runastaj cieloman renqanku?

Biblia niwanchej 144.000 runas kausarimuspa cieloman ripunankuta (Apocalipsis 7:4). Apóstol Juanqa mosqoypi jina rikorqa “Sión orqo patapi Corderota [Jesucristota] sayashajta, paywantaj 144.000” kashajta (Apocalipsis 14:​1-3; Juan 1:​29; 1 Pedro 1:​19). “Sión orqo” nispaqa, parlashan Jesustawan, 144.000 kamachimojkunatawan aswan pataman Dios churasqanmanta (Salmo 2:6; Hebreos 12:22).

Diospa Gobiernonpi Cristowan khuska kamachimunankupaj “wajyasqa, ajllasqa” kajkunataqa, ‘juchʼuy tropa ovejas’ nikullantaj (Apocalipsis 17:14; Lucas 12:32). Rikunchej jina, Cristoj tukuy ovejitasninmanta nisqa, ajllasqa kajkunaqa pisilla kanku (Juan 10:16).

¿Imatataj wakin ninku cieloman rinamanta?

Wakin runas ninku: “Tukuy buenos kajkuna cieloman rinku”, nispa.

Biblia nin: Bibliapi Dios niwanchej bueno runasqa kay jallpʼapi kausakunankuta (Salmo 37:11, 29, 34).

  • Jesús nerqa: “Mana pi runapis cieloman wicharerqachu”, nispa (Juan 3:13). ¿Imatá Jesús chaywan nisharqa? Pikunachus paymanta astawan ñaupajta wañupojkuna mana cielomanchu risqankuta. Paykunamanta wakin kanku: Abrahán, Moisés, Job, David ima (Hechos 2:​29, 34). Paykunaqa kausarimuspa kay jallpʼapi kausakuyta suyakusharqanku (Job 14:13-​15).

  • “Ñaupaj kaj kausarimuypi kausarimojkunaqa”, cieloman riponqanku (Apocalipsis 20:6). Jinapis waj kausarimuy kallantaj, chay kausarimojkunataj kay jallpʼapi tiyakonqanku.

  • Bibliapi nin, Diospa Gobiernon kamachimonqa chaypacha ‘manaña wañuy kananta’ (Apocalipsis 21:​3, 4). Wañuytaj tiyan jallpʼallapi. Imaraykuchus cielopeqa mana ni pi wañunchu.

Wakin runas ninku: “Sapa uj ajllayta atin cielopichus chayri jallpʼapichus kausakunanta”, nispa.

Biblia nin: Dioslla niyta atin pichus cielopi kausayta japʼinanta, nisunman pichus cielopi kausakunanta (Filipenses 3:​14). Cieloman rinapaj ajllasqa kananchejqa, mana noqanchej imatachus munasqanchejmantachu chayri maypichus tiyakuyta munasqanchejmantachu kashan (Mateo 20:20-​23).

Wakin runas ninku: “Kay jallpʼapeqa tiyakonqanku pikunachus mana cieloman rinankupaj jinachu kanku chaykunalla”, nispa.

Biblia nin: Kay jallpʼapi wiñaypaj tiyakojkunamanta Dios nin, ‘ayllusnin’ ‘ajllasqasnin’ paypa ‘ajllakusqasnin’ kasqankuta (Isaías 65:21-​23). Paykunaqa Diospa munayninta juntʼanqanku. ¿Imataj Diospa munaynin karqa? Pay munarqa runas uj k’acha paraisopi mana wañuspa, mana onqospa wiñaypaj tiyakunankuta (Génesis 1:​28; Salmo 115:16; Isaías 45:18).

Wakin runas ninku: “Apocalipsis libropi 144.000 nisqanqa uj kikinchaylla”, nispa.

Biblia nin: Apocalipsis libropi wakin números kikinchanallapaj kajtinpis, wakin numerosqa mana kikinchanallpajchu, manaqa nisqan jinapuni. Chaymanta uj kashan “Corderoj 12 apostolesninpa sutisninku” (Apocalipsis 21:14). Imaraykuchus 144.000 número mana uj kikinchayllachu kasqanta qhawarina.

Apocalipsis 7:4 versiculopi nin: “Sellasqa [cieloman rinankupaj ajllasqas] kajkunaqa 144.000 karqanku”, nispa. Qhepan versiculospitaj nin: ‘May chhika runas mana yupay atina’, nispa. Chay ‘may chhika runasqaʼ savakullanqankutaj (Apocalipsis 7:​9, 10). Rikunchej jina Apocalipsis libroqa parlan iskay gruposmanta. Kay 144.000 número uj kikinchaylla kanman chayqa, manaña ninmanchu karqa ‘may chhika runas mana yupay atina’, nispa. *

Chantapis 144.000 runasmanta Biblia nillantaj: “Paykunaqa runas ukhumanta rantisqa karqanku ñaupaj poqoy jina”, nispa (Apocalipsis 14:4). “Ñaupaj poqoy” nispaqa, parlashan tukuyninkumanta uj chhikalla ajllasqa kasqankuta. Chayrayku Biblia nin chay pisi runas Cristowan khuska mana yupay atina may chhika runasta cielomantapacha kamachimunankuta. Imaraykuchus chay may chhika runasqa, kay jallpʼapi tiyakonqanku (Apocalipsis 5:​10).

^ párr. 16 Uj profesor Robert Thomas sutiyoj Apocalipsis 7:4 versiculopi rikhurej 144.000 numeromanta parlaspa nin: “Chay numeroqa mana uj kikinchayllachu, manaqa chay chhika runasmantapuni parlashan. Apocalipsis 7:9 versiculopitaj ‘may chhika runas mana yupay atina’ nispaqa waj grupomanta parlashan. 144.000 número kikinchanallapaj kasqanta nisun chayqa, chay libropi rikhurej tukuy numerosta kikinchanapaj jinallapuni qhawasun (Revelation 1-7: An Exegetical Commentary [Comentario exegético de Revelación 1-7], página 474).