¿PITAJ RUWANMAN KARQA?
Californiamanta pejerreyqa tiemponpi runtuta churan
Californiamanta pejerreyqa uj juchʼuy pescadito. Chay pescaditoqa runtitusninta churan Estados Unidosmanta Californiaj mar kantunpi, Mexicomanta Baja Californiaj mar kantunpiwan. Chay martaj océano Pacífico kashan. Pejerrey pescaditosqa sumajta yachanku ima diachus, ima ratochus runtusta churanankuta, ajinamanta uña pescaditosninku mana wañunankupaj.
Kaypi tʼukuriy: Kay pejerrey pescaditosqa runtusta churanku killa rikhurimusqanmanta chayri killa juntʼa kasqanmanta kinsa diasninman chayri tawa diasninman. Chaytataj tutallan churanku mar yakus aswan kantusninman wicharimojtin. Yakutaj kutiykapuspa chay pescaditospa runtusninta arenawan astawan tapaykun. Niraj killa juntʼa kashajtin chayri niraj killa rikhurimushajtin runtusta churanman chayqa, mar yakoqa chay runtusta apaykakapunman arenatawan khuska.
Wally Skalij/Los Angeles Times via Getty Images
Chay pejerrey pescaditosqa marzomanta septiembre killakama runtusta churanku. Chay killaspitaj mar yakusqa tutasnin astawan kantusninman wichariyta yachan. Ajinamanta chay pescaditosqa aswan kantusninman llojsiyta atinku runtusninkuta churanankupaj. Chay jinapi yaku watej wicharimojtin mana runtusta apaykakapunanpaj.
Chay pescaditosqa yaku aswan altota oqharikunanta suyanku allin kantukama chayarpachinanpaj. Yaku kutiykapojtintaj chay pescaditosqa joqʼo arenallapiña qhepakunku, chaypitaj 5 chayri 8 centimetrosta jina juskʼuytawan runtusta churanku. Chay runtusmantaj uj chayri iskay orqo pescados rinku uña pescaditosta rikhurichinankupaj. Chaymantataj chay pescaditosqa yaku ladoman qhatatakunku yakoj qhollchoqeyasqanwan tarichikunankukama. Ajinamanta mar qochaman kutiykapunku.
Chay runtusqa uj tiempota chay arenapi kananku tiyan, jinapis tʼojyanankupajqa yakoj qhollchoqeyasqanta necesitanku. Yakutaj qhollchoqeyaspa chay runtitusman chayan iskay semanasninman jina, wakin kutistaj tawa semanasninman jina. Ajinapi chay runtusqa tʼojyanku, uña pescaditostaj llojsiramunku.
¿Ima niwajtaj? Californiamanta pejerrey pescaditos, ¿jinallamantachu tiemponpi runtusta churayta yachankuman karqa? Chayri, ¿Dioschu ajina kanankupaj ruwanman karqa?
Kaykunatapis qhawaykurillawajtaj
VIDEOS: BIBLIAJ SUMAJ YACHACHIYKUNASNIN
¿Dioschu cielotawan jallpʼatawan ruwarqa?
Jallpʼapis cielopis imaynatachus ruwakusqanta Biblia nisqantaqa, wakin runas mana allintachu entiendenku, wakintaj cuentolla kasqanta ninku. Jinapis, ¿Bibliaj nisqan cheqapunichu?
