Misisqa sumaj rejsisqa kanku tukuy tiempo qallunkuwan llimphuchakusqankurayku. Chayrayku diantinpeqa ashkha kutistapuni qallitunkuwan bañakunku llimphitus kanankupaj. Misisitosqa bañakuyta atinku qallitunku chaypaj jina sumaj ruwasqa kasqanrayku.

 Kaypi piensariy: Misej qallitunpeqa 290 papilas nisqa tiyan, chaytaj misej qallunpi qhepa ladoman puntasniyoj uña khishkitas jina kanku, chaytaj sillunchej jina duropuni. Qallunpeqa juchʼuy surkʼitos jina tiyan, chaywantaj thoqayninta orqhomun qallitunta simin ukhuman apaykojtin. Misej qallunpi khishkitas jina kasqanrayku thoqaynenqa pelon ukhukama yaykun, chaypitaj thoqayninta saqen.

 Sapa día misiqa, qallunwan 48 mililitrosta jina thoqayninta pelonpi, qaranpi ima saqeyta atin. Chay thoqayninpitaj kan juchʼuy khuritus jina, chaykunataj pelonpi kaj chʼichi imasta chinkachin. Thoqaynintaj pisimanta pisi wausipullan, chaytaj yanapan misisitoj cuerpon mana ancha qʼoñi kananpaj nitaj jumpʼinanpajpis, chaytaj misispaj may allinpuni.

 Misej pelon wataykukojtin, qallunpi kaj khishkitasqa yanapan kallpawan aysananpaj, ajinamanta pelitosnin phashkarakunanpaj. Misej qallunpi kaj khishkitasqa yanapallantaj bañakushajtin cuerpon allillan kananpaj. Cientificosqa uj peineta chayri ñajchʼata pelomanta ruwarqanku, misej qallunmanta copiakuspa. Chay ruwasqanku peinetaj mana waj peines jinachu chujchata aysan, chujcha wataykukojtinpis calmallawan phashkarayta atin, chantapis llimphuchanapaj facillla. Cientificosqa ninku pelosniyoj imasta pichanapaj, misej qallunmanta copiakuspa wakin imasta ruwáy atikusqanta. Chantapis yanapallanmantaj jampista, cremasta maypichus cuerponchejpi ashkha pelo kashan chayman churakunapaj.

 ¿Ima niwajtaj? Misej qallunpi juchʼuy khishkitas kasqan, ¿jinallamantachu rikhurinman karqa? Chayri, ¿Diospunichu ruwanman karqa?