Delfinesqa, tukuy imaymanasmanta waqayta chayri silbayta yachanku. Chay waqasqanku chayri chay silbasqankoj sonaynin paykunaman kutirimojtintaj yachayta atinku imaschus qayllankupi kasqanta, ajinamanta maynintachus rinankuta yachanku. Cientificosqa delfín mular chayri nariz de botella (Tursiops truncatus) nisqaj waqayninta uyarispa uj aparatota yaku ukhupaj ruwayta munanku, delfinpaj waqasqanman chayri silbasqanman richʼakoj aparatota. Ajinamanta kanña chay aparatos wakin problemasta mana allinchayta atisqankuta allinchanankupaj.

 Kaypi piensariy: Delfinpaj waqasqan chayri silbasqan yanapan ukhu mar qochapi tʼiyuwan pakasqa challwasta tarinanpaj, chantá challwasta rumismanta reparayta atinanpaj ima. Heriot Watt Edimburgo (Escocia) universidadmanta profesor Keith Brown nerqa: “Delfinqa uj lata ukhupi miskʼi yakuta, millu kʼara yakuta, frutasmanta miskʼi yakuta, petroleotapis karumanta reparayta atin, 10 metrosman jinapuni”. Cientificosqa ajinata reparaj aparatosta ruwayta munanku.

 Wakin cientificosqa delfinpaj waqasqanta chayri silbasqanta, chay sonaynin paykunaman kutimusqantataj astawan estudiarqanku, chayman rijchʼakoj aparatostataj ruwayta munarqanku. Ruwarqankutaj tʼukunapaj jina uj silbaj aparatota, chaytataj largonman uj metro jinalla midej tuboman churaykorqanku. Chay aparatotaqa yaku ukhuman churaykorqanku, uj misilman rijchʼakoj purej robotman. Chayta ruwarqanku mar qochapi pʼampasqa imasta tarinapaj, kanman cablesta chayri tuberiasta. Chantapis mana llujchirispalla chay tarisqanku imayna estadopichus kashasqanta qhawaykurinankupaj. Pikunachus chay aparatota ruwajkunaqa yuyanku gasta, petroleotawan orqhonapaj sumajta yanapakunanta. Delfinpaj waqasqanman chayri silbasqanman rijchʼakoj aparatota ruwasqankoqa, yanapanqa kanña chay aparatosta aswan sumajta funcionanankupaj. Ingenierostapis yanapallanqataj llankʼayninkupi equiposninkuta maychus kananpi yaku ukhupi churanankupaj. Chantapis chay equiposninkojta imallanpis mana allin kajtin reparanankupaj, ichá kanman petroleota orqhonapaj equiposninku pʼakikunayajtin chayri imapis chay tuberiasta tapaykojtin.

 ¿Ima niwajtaj? Delfín mular waqasqan, silbasqan ima, ¿jinallamantachu rikhurinman karqa? Chayri, ¿Diospunichu ruwanman karqa?