Luslahng audepe kan

luslahng audepe kan

 IREN MEHN KASUKUHL 12

Ia Duwen Omw Kak Karanihala Koht?

Ia Duwen Omw Kak Karanihala Koht?

1. Koht kin ketin karonge kapakap kan koaros?

Koht kin ketin luke soangen aramas koaros ren karanihala ih ni arail kin kapakap. (Melkahka 65:2) Ahpw, e sohte kin ketin karonge kapakap kan koaros. Karasepe, ele Koht sohte kin ketin karonge kapakap kan en ohl emen me kin wiakauwe eh pwoud. (1 Piter 3:7) Ni mehn Israel ko arail pousehlahte wiewia suwed kan, Koht sohte ketin karonge arail kapakap kan. Eri, kapakap iei uhdahn pwais kaselel ehu. Ahpw, Koht pahn ketin karonge kapakap kan en irail me wiahda dihp laud kan ma re koluhla.​—Wadek Aiseia 1:15; 55:7.

Kilang kisin kasdo Koht Kin Ketin Karonge Kapakap Koaros?

2. Ia duwen atail pahn kapakap?

Pwehki kapakap iei kisehn atail kaudok, kitail anahne kapakap ongete Sounkapikpatail, Siohwa. (Madiu 4:10; 6:9) Oh pil, kitail aramas soh unsek, kahrehda kitail anahne kapakap ni mwaren Sises pwehki e pwoukihla dipatail kan. (Sohn 14:6) Siohwa sohte kin ketin kupwurki kitail en kapwukapwurehiong kapakap kan me kitail wadlikihla de ntingihdi. E kin ketin kupwurki kitail en kapakap sang mohngiongitail.​—Wadek Madiu 6:7; Pilipai 4:6, 7.

Sounkapikpatail kak ketin karonge kapakap kan me sohte ngile de ngihl tikitik. (1 Samuel 1:12, 13) E kin ketin luke kitail en kapakap ni ahnsou sohte lipilipil, duwehte mwohn atail pahn tapiada atail doadoahk en rahn oh mwurin atail kanekehla atail wiewia kan en rahno, ahnsoun mwenge, oh ni atail kin lelohng kahpwal kan.​—Wadek Melkahka 55:22; Madiu 15:36.

3. Dahme kahrehda Kristian kan kin tuhpene?

En karanihala Koht sohte kin mengei pwehki kitail kin mour nanpwungen aramas akan me sohte kin pwoson Koht oh re  kin kauwe sapwellime inou me pid popohl nin sampah. (2 Timoty 3:1, 4; 2 Piter 3:3, 13) Kahrehda kitail anahne werekiong iengetail me pwoson akan pwehn ale kangoang oh re pil anahne kitail.​—Wadek Ipru 10:24, 25.

Atail kin werekiong aramas akan me kin poakohng Koht kin sewese kitail en karanihala Koht. Mihting en Sounkadehdehn Siohwa kan kin kihong kitail ahnsou mwahu en ale kangoang sang pwoson en meteikan.​—Wadek Rom 1:11, 12.

4. Ia duwen omw kak karanihala Koht?

Ke kak karanihala Siohwa sang ni omw kin medemedewe dahme ke sukuhlki sang sapwellime Mahsen. Medewehla dahme ke kak sukuhlki sang sapwellime wiewia kan, kaweid kan oh inou kan. Kapakap oh doudouloale kin sewese kitail en wehwehki uwen laud en sapwellimen Koht limpoak oh erpit.​—Wadek Sosua 1:8; Melkahka 1:1-3.

Ke kak karanihala Koht ihte ma ke kin likih oh pwoson ih. Karasepe, pwoson kin duwehte mehkot me momour me anahne mwenge. Ke anahne ni karasaras kaukaule kamwenge omw pwoson sang ni omw kin doudouloale kahrepen mehkan me ke kin kamehlele.​—Wadek Madiu 4:4; Ipru 11:1, 6.

5. Ia duwen omw karanihala Koht eh pahn wia kamwahupomw?

Siohwa kin ketin apwalih irail kan me kin poakohng. E kak pere irail sang soahng kan me kak kauwehla arail pwoson oh arail koapworopwor en mour soutuk. (Melkahka 91:1, 2, 7-10) E kin ketin padahkihong kitail soangen mour me kak kauwehla atail roson oh nsenamwahu. Siohwa kin ketin padahkihong kitail mour me keieu mwahu.​—Wadek Melkahka 73:27, 28; Seims 4:4, 8.