Luslahng audepe kan

luslahng audepe kan

 PEIDEK 4

Ia Mwomwen Ei Kak Kamwawihala Ei Sapwung kan nan Mour?

Ia Mwomwen Ei Kak Kamwawihala Ei Sapwung kan nan Mour?

DAHME KAHREHDA E KESEMPWAL

Wehkada ahmw sapwung kan pahn kahrehiong uhk en wia aramas men me uhdahn likilik.

DAHME KE PAHN WIA?

Medewehla me met wiawi: Tim koski mpwei ieu me kauwehla kilahs en weren mehn mparail sidohsa ahnsou me ih oh kompoakepaho mwadmwadong.

Ma kowe Tim, dahme ke pahn wia?

UHDI OH MEDEWE!

MIE PILIPIL SILUH ME KE KAK WIA:

  1. Tang.

  2. Kapwopwohnki emen tohrohr.

  3. Padahkihong mehn mpomw dahme wiawi, oh nda me ke pahn pwainla dahme ohla.

Ele ke pahn men pilada Pilipil A. Ahpw e kin ahnsou koaros mie kahrepe mwahu ken wehkada ahmw sapwung kan, mehnda ma ke kauwehla kilahs en sidohsa de ehu soahng sohte lipilipil.

 KAHREPE SILUH EN WEHKADA AHMW SAPWUNG KAN

  1. Met me pwung en wia.

    Paipel mahsanih: “Se pepehm me nan kapehdit me uhdahn mwakelekel, pwehki at kin men wia dahme pwung ahnsou koaros.”Ipru 13:18.

  2. Aramas kin mahkohng irail kan me kin wehkada arail sapwung kan.

    Paipel mahsanih: “Omw mour sohte pahn pweida ma ke song en ekihla dipomw kan. Sakarkihda oh wiliakapwala; eri, Koht ahpw pahn ketin mahkikihong uhk.”Lepin Padahk 28:13.

  3. Me keieu kesempwal iei en kaperenda Koht.

    Paipel mahsanih: “KAUN-O kin ketin kalahdeki aramas akan me kin wia me suwed, ahpw e kin ketin kompoakepahnki me pwung kan.”Lepin Padahk 3:32.

Karina me sounpar 20, song en ekihsang eh pahpao me e saideisin pwehki e nohn uk eh tangahki sidohsa. Ahpw e sohte kak ekihla ni ahnsou reirei. Karina koasoia: “Sounpar ehu mwuri, ei pahpao kilangada edei nan kisin doaropwehn saideisin ehu. Uhdahn I lelohng kahpwal laud!”

Dahme e sukuhlkihdi? Karina koasoia: “En ekihla sapwung kan kin ihte kahrehda soahng kan en suwedla. Mwuhr ke pahn ale kalokepe!”

IA DUWEN AHMW KAK SUKUHLKIHSANG AHMW SAPWUNG KAN

Paipel mahsanih: “Kitail koaros kin kalap sapwungala.” (Seims 3:2) Oh nin duwen me kitail kilangehr, e wia kilelepen aktikitik oh koahiek en wehkada ahmw sapwung kan oh wia met ni ahnsowohte.

Kahk en mwurin met iei en sukuhlkihsang ahmw sapwung kan. Serepein men me adaneki Vera koasoia: “I kin song en wiahki ehuehu sapwung kan mehn kasukuhl kan oh mehkot me pahn sewese ie en wia aramas mwahu men oh apwalihala mwahu irairo mwurin met.” Kitail pahn kilang ia duwen ahmw kak wia met.

Ke pekihda en doadoahngki weren ahmw pahpao pwaisikel oh kowe eri kauwehla. Dahme ke pahn wia mwurin mwo?

  • Sohte nda mehkot oh koapworopworki me ahmw pahpao sohte pahn esehda.

  • Padahkihong ahmw pahpao dahme uhdahn wiawi.

  • Padahkihong ahmw pahpao dahme wiawi oh kapwopwohnki emen tohrohr.

Ke sohte pweida nan ehu des pwehki ke sohte study. Dahme ke pahn wia mwurin mwo?

  • Kapwopwohnki des.

  • Pohnese me kowe me pwukoahki ahmw sohte pweida.

  • Kose me sounpadahko kin uhwong uhk.

Dwelling on past mistakes is like staring in the rearview mirror while driving a car

 Nna met medewehla dahme wiawio oh song medewe me kowe (1) ahmw pahpao oh (2) ahmw sounpadahko. Dahme ahmw pahpao oh sounpadahko pahn medewehiong uhk ma ke men wehkada ahmw sapwung kan? Dahme ira pahn medewehiong uhk ma ke ekihla ahmw sapwung kan?

Met medewehla sapwung ehu me ke wiahda pahr nekiero oh sapengala peidek pwukat.

Soangen sapwung dah me ke wiahda? Ia duwen ahmw apwalihala sapwungo?

  • I ekihla.

  • I kapwopwonki emen tohrohr.

  • I uhdahn wehkada.

Ma ke sohte wehkada ahmw sapwung, ia ahmw pepehm mwurin mwo?

  • Mwahu douluhl—I pitsang!

  • Ahneki pepehm me I wiahda mehkot suwed—I anahne kasalehda dahme mehlel.

Ia duwen ahmw pahn kak apwalihala mwahu kahpwalo?

Dahme ke sukuhlkihsang ahmw sapwungo?

IA AHMW MADAMADAU?

Dahme kahrehda ekei aramas sohte kin men wehkada arail sapwung kan?

Dahme aramas pahn medewehiong uhk ma ke kin ahnsou koaros song en ekihla ahmw sapwung kan, ahpw dahme irail pahn medewehiong uhk ma ke wehkada ahmw sapwung kan?Luk 16:10.