Luslahng audepe kan

luslahng audepe kan

 PEIDEK 3

Ia Duwen Ei Kak Koasoiong Ei Pahpa oh Nohno?

Ia Duwen Ei Kak Koasoiong Ei Pahpa oh Nohno?

DAHME KAHREHDA E KESEMPWAL

Ni ahmw kin miniminiong ahmw pahpa nohno, ahmw mour pahn kin soanamwahu.

DAHME KE PAHN WIA?

Medewehla me met wiawi: Ni soutik en Niesil. Geoff me sounpar 17, kanekelahr eh doadoahk kan, oh met e ahneki pwuhng ong ahnsoun kommoal! E padikada TV oh mwohndiong pohn sehr me e keieu perenki.

Eh pahpao pa kohdo ni ewen wenihmwo oh e sohte mwomwen peren.

“Geoffrey! Dah ke kaukauwehla mwahl ahmw ahnsou kilikilang TV nan ahmw pahn sewesehki riomw pwutak tikitiko eh homework? Ke sohte kin wia dahme I ndaiong uhk!”

Sansalda ngilen ahn Geoff mwengininginki “Ohtier, io, e pil tepidahr!”

Pahpao penglahng. “Dahme ke nda, e nahn?”

Geoff ahpw esingekda oh kepirek, ndahla: “Sohte, Ipa.”

Met Pahpao inenen lingeringerda oh lipwoare: “Ke dehpa kihkihdo soangen ngihlen!”

Ma kowe Geoff, ia duwen ahmw pahn irehdi soangen akamai wet?

UHDI OH MEDEWE!

Koasoakoasoiong ahmw pahpa oh nohno kin duwehte tangahki sidohsa pwoat. Ma mie mehkot pohn ahlo me kauhdi ahmw tangatang, ke kak diarada ehu ahl tohrohr.

 KARASEPE:

Serepein men me adaneki Leah koasoia: “I diarada me e apwal en koasoiong ei pahpao. Ekei pak I kin wie koasoakoasoiong ahpw e uhd kin nda, ‘Wei ke koasoakoasoido?’”

ELE MIE PILIPIL SILUH ME LEAH KAK WIA.

  1. Werlahng eh pahpao.

    Leah werkihong, “Dah, met kesempwal! Nna rong!”

  2. Uhdihsang koasoakoasoiong eh pahpao.

    Leah pwangahkihda songosong en koasoiaiong eh pahpao duwen eh kahpwalo.

  3. Awih ahnsou mwahu, oh pwurehng koasoiaiong eh pahpao eh kahpwalo.

    Leah oh eh pahpao koasoipene mwuhr, de ntingihdi eh kahpwalo nan kisinlikou ehu ong eh pahpao.

Mehnia pilipil me ke pwungki Leah en wia?

TEHK: Ahn Leah pahpao medemedewe ehu soahng tohrohr, oh ihme kahrehda e sehse me Leah pwunod. Eri ma Leah pilada en wia Pilipil A, eh pahpao sohte pahn wehwehki kahrepen eh werwering. Pilipil wet sohte pahn kahrehiong en Leah pahpao en men rong dahme e ndindao, oh sohte pahn kasalehda wahu oh kahkahki seme. (Episos 6:2) Eri, sohte me pahn paiekihda pilipil wet.

Duwehte ahmw sohte pahn mweidohng mehkot pohn ahlo en kauhdi ahmw tangatang, ke kak diarada elen ahmw pahn wehwehiong rehn ahmw pahpa nohno

E pahn mwomwen mengei en wia Pilipil B ahpw met sohte wia elen loalokong. Dahme kahrehda? Pwe en kak apwalihala mwahu eh kahpwal kan, Leah anahne kin koasoiong eh pahpao, oh ma eh pahpao pahn sewese ih, e pahn anahne ese dahme kin wiewiawi nan ahn Leah mour. Sohte mehkot kak pweida ma emen kin nennenweite sohte koasoi.

Ahpw ma Leah wia Pilipil C e sohte pahn kin mweidohng kahpwal wet en kauwehla eh pahn kin nantihong koasoiong eh pahpao. Ahpw, e kin song awih ahnsou mwahu en pwurehng koasoiahda eh kahpwalo. Oh ma e pilada en ntingihdi kisinlikou ehu ong eh pahpao, ele e pahn mwadangete nsenamwahula ni eh wia met.

Ntingihdi kisinlikou ele kak sewese ih en koasoanehdi dahme e uhdahn men nda. Ni ahnsou me eh pahpao pahn wadek kisinlikowo, e pahn esehda dahme Leah kin nannanti en padahkihong ih, oh met pahn sewese ih en wehwehkihla mwahu duwen ahn Leah kahpwalo. Pilipil C mwahuong Leah oh eh pahpao. Sohte lipilipil ma ira mwohdpene koasoi de kisinlikou ehu ntingda, pilipil wet kin idawehn kaweid en Paipel en kin “ngoangki ahnsou koaros mehkan me kin kahrehiong kitail popohl.”Rom 14:19.

Ia pil ekei pilipil kan me Leah ele kak wia?

Song ma ke kak medewehda ehu. Mwurin mwo, medewe ia pahn imwilahn pilipilo.

 SOIKALA KOASOIWEI NI SAWEHWE

Tamataman, dahme ke nda oh dahme ahmw pahpa nohno medewe me iei wehwehn ahmw koasoio sohte kin kalapw duwepenehte.

KARASEPE:

Ahmw pahpa nohno idek rehmw dahme ke mwomwen soansuwedki. Kowe sapengki, “I sohte men koasoia.”

Ahpw ahmw pahpa nohno rong wehwehn ahmw koasoio: “I sohte uhdahn likih koasoiaiong kumwa kahrepeo. I nek koasoiaiong kompoakepahi kan duwen ei kahpwalo ahpw kaidehn kumwa.”

Medewehla me ke lelohng kahpwal laud ehu oh ahmw pahpa nohno nda me ira pahn sawas. Ahpw ke nda: “Dehr pwunodki. I kak pein apwalihala.”

  • Dahme ahmw pahpa nohno rong?

  • Dahme mwahusang me ke kak nda?