Luslahng audepe kan

luslahng audepe kan

 IRELAUD EISEK SILUH

Wauneki Kisakis en Mour

Wauneki Kisakis en Mour

1. Ihs me ketikihong kitail mour?

SIOHWA iei me “Koht ieias.” (Seremaia 10:10) Ih me Sounkapikpatail, oh e ketikihong kitail mour. Paipel mahsanih: “Komwi me ketin wiadahr mehkoaros, oh pwehki kupwuromwien, me mehkoaros mihmiehki oh momourki.” (Kaudiahl 4:11) Ei, Siohwa kupwurki kitail en ahneki mour. Mour wia kisakis kesempwal ehu sang rehn Koht.​—Wadek Melkahka 36:9.

2. Ia duwen atail kak pweida nan atail mour?

2 Siohwa ketikihong kitail dahme kitail anahne pwehn wie momour, soahng kan me duwehte mwenge oh pihl. (Wiewia 17:28) Ahpw laudsang met, e kupwurki kitail en perenki mour. (Wiewia 14:15-17) Pwe kitail en pweida nan mour, kitail anahne peikihong sapwellimen Koht kosonned kan.​—Aiseia 48:17, 18.

IA SAPWELLIMEN KOHT PEPEHM ME PID MOUR

3. Dahme Siohwa ketin wia ni ahnsou me Kain kemehla Eipel?

3 Paipel padahkihong kitail me atail mour oh mour en aramas teikan kesempwal rehn Siohwa. Karasepe, ni ahnsou me nein Adam oh Ihp pwutak Kain, uhdahn lingeringer pahn rie pwutak tikitik Eipel, Siohwa ketin panawih Kain me e anahne kaunda eh lingeringer. Ahpw Kain sohte rong, oh uhdahn lingeringerda me kahrehiong ih en “sohpeiongete rieo kemehla.” (Senesis 4:3-8) Siohwa ketin kaloke Kain pwehki eh kemehla Eipel. (Senesis 4:9-11) Eri lingeringer oh kailok keper pwehki mepwukat  kak kahrehiong kitail en kin lemei. Emen me kin wia soahng pwukat sohte kak ahneki mour soutuk. (Wadek 1 Sohn 3:15.) Pwehn kaperenda Siohwa, kitail anahne sukuhlki en poakohng aramas koaros.​—1 Sohn 3:11, 12.

4. Dahme ehu kosonned nanpwungen sapwellimen Koht kosonned kan me kohieng mehn Israel ko padahkihong kitail duwen kisakis en mour?

4 Sounpar kid kei mwuri, Siohwa ketin kasalehda me e kin ketin kesempwalki mour ni ahnsou me e ketikihda Kosonned Eisek ko rehn Moses. Ehu kosonned ko iei: “Dehr kemehla aramas.” (Deuderonomi 5:17) Ma aramas emen kemehla emen pwehki e koasoanehdi en wia met, ohl menet de lih menet pahn pil kamakamala.

5. Ia sapwellimen Koht pepehm duwen kauwehla liseian?

5 Ia sapwellimen Koht pepehm duwen kauwehla liseian? Pil mour en seri me saikinte ipwidi kesempwal ong Siohwa. Nan Kosonnedo me Siohwa ketikihong mehn Israel ko, Siohwa mahsanih me ma emen kauwehla nohno men me liseian oh nah serio mehla pwehki met, aramaso pahn kamakamala. E mahsanih: “Ma ohl kan pahn peida oh re uhdahn kahrehiong lih liseian men en medekla oh nah seri ipwidi ahpw sohte mehla wiawi, ohlo pahn uhdahn ale kalokepe nin duwen me ahn liho pwoudo pahn kapwukoahkiong . . . Ahpw ma mehla wiawi, eri kumwail anahne dupungki mour ong mour.” (Eksodus 21:22, 23, NW; Melkahka 127:3.) Met padahkihong kitail me e sapwung en kauwehla liseian.​—Menlau kilang Ire kan 28.

6, 7. Ia duwen atail pahn kasalehiong Siohwa me kitail kesempwalki mour?

6 Ia duwen atail kak kasalehiong Siohwa me kitail kin  kesempwalki atail mour oh mour en meteikan? Sang ni atail sohte pahn wia mehkot me pahn kahrehda keper ong atail mour de mour en aramas teikan. Kahrehda kitail sohte pahn doadoahngki sika de pwuh de wini en kasahliel kan, pwehki mepwukat kin kauweikitailla oh kakete kemeikitailla.

7 Koht ketikihong kitail atail mour oh paliwaratail, oh kitail anahne doadoahngki ni ahl me e ketin kupwurki. Eri kitail anahne apwalih mwahu paliwaratail. Ma kitail sohte wia met, kitail pahn samin mwohn silangin Koht. (Rom 6:19; 12:1; 2 Korint 7:1) Kitail sohte kak kaudokiong Siohwa, me ketikihong kitail mour, ma kitail sohte kin kesempwalki mour. Mendahki ele e pahn uhdahn apwal en uhdihsang tiahk suwed kan me kitail ahnlahr, Siohwa pahn ketin sewese kitail ma kitail kin nantihong pwehki kitail kesempwalki mour.

8. Dahme kitail pahn wia pwehn tehk kanahieng kitail de kihong atail mour de mour en meteikan nan keper?

8 Kitail sukuhlkier me mour wia kisakis kesempwal ehu. Siohwa ketin likih me kitail pahn wia uwen atail kak en dehr kin kihong atail mour de mour en meteikan nan keper. Kitail kin kapwaiada met sang ni mwomwen atail kin tangahki waratail sidohsa, skuhder, de mehn peidaid teikan. Kitail kin liksang soangen mwadong me keper oh lemei. (Madiu 4:5-7) Kitail pil kin wia uwen atail kak en wiahda imwatail en dehr keper. Siohwa ketin kehkehlikihong mehn Israel kan: “Ni amwail pahn kin kauwada ihmw kapw ehu, kumwail pahn kanahieng kihong kehl ehu me kapil keilen pwelengen ihmwo. Eri, kumwail sohte pahn pwukoahki ma emen pwupwudi sang powe oh mehla.”​—Deuderonomi 22:8.

9. Ia pahn mwomwen atail mwekid ong mahn akan?

 9 Pil mwomwen atail mwekid ong mahn akan kesempwal rehn Siohwa. E kin ketin mweidohng kitail en kemehla mahn akan ong mwenge oh likou, oh e kin ketin mweidohng kitail en kemehla mahn emen ma mahno keper ong atail mour. (Senesis 3:21; 9:3; Eksodus 21:28) Ahpw kitail sohte kak wiakauwe mahn de kemehla pwehn wiahki mehn mwadong.—Lepin Padahk 12:10.

WAUNEKI MOUR SARAWI

10. Ia duwen atail ese me nta kin wiliandi mour?

10 Nta me sarawi ong Siohwa pwehki nta kin wiliandi mour. Mwurin Kain eh kemehla Eipel, Siohwa mahsanihong Kain: “Ntahn riomwo liklikwerih ie sang nanpwel.” (Senesis 4:10) Ntahn Eipel kin wiliandi eh mour, oh Siohwa ketin kaloke Kain pwehki eh kemehla Eipel. Mwurin Nohlik en ni mwehin Nohao, Siohwa ketin pwurehng kasalehda me nta kin wiliandi mour. Siohwa ketin mweidohng Noha oh eh peneinei en tungoale uduken mahn akan. E mahsanih: “Kumwail kak tungoale soahng me momour koaros oh pil tuhke koaros. I kihong kumwail koaros pwe kumwail en wiahki amwail mehn tungoal.” Ahpw, mie mehkot me Siohwa ketin kehkehlingkihong irail en dehr tungoale: “Ihte me kumwail sohte pahn tungoalehn: uduk me mie nta, I sohte mweidada pwehki mour mi nan nta.”​—Senesis 1:29; 9:3, 4.

11. Kehkehlik dah me pid nta me Koht ketikihong wehin Israel?

11 Mpen sounpar 800 mwurin Siohwa eh ketin padahkihong Noha en dehr tungoale nta, e ketin pwurehng kehkehlikihong sapwellime aramas akan: “Kumwail sohte pahn tungoale nta ahnsou me kumwail pahn tungoale  uduk, pwe mour kin mihmi ni nta; eri, kumwail sohte pahn tungoale mour iangahki uduk. Dehr tungoale nta, a kumwail kakerehiong nanpwel duwehte pihl.” (Deuderonomi 12:23, 24) Siohwa pil ketin kupwurkihte sapwellime aramas akan en kin kilangwohng nta nin duwen mehkot sarawi. Irail kak kang uduk ahpw kaidehn ntao. Ni ahnsou me irail pahn kemehla mahn emen ong mwenge, irail anahne kakerehiong ntao nan pwehl.

12. Ia duwen Kristian akan ar kin kilangwohng nta?

12 Sounpar kei mwurin pwoulahn Sises, wahnpoaron ko oh ohl mah kan nan mwomwohdisohn Kristian nan Serusalem tuhpene pwehn pilada mehnia rehn Kosonned ko me kohieng mehn Israel ko kin wie kadoadoahkte ong Kristian kan. (Wadek Wiewia 15:28, 29; 21:25.) Siohwa ketin sewese irail en wehwehki me nta kin kesempwal ong ih oh me irail anahnehte kilangwohng nta nin duwen mehkot sarawi. Tepin Kristian kan sohte kak kang de nim nta de tungoale uduk me sohte kakerehsang mwahu nta. Ma irail wia met, e pahn suwed duwehte arail kin kaudokiong dikedik kan de kin wia tiahk samin me pid wia nsenen pwopwoud. Sang ahnsowo kohdo, Kristian mehlel kan kin soikala kang de nim nta. A ia duwen rahnwet? Siohwa pil ketin kupwurkihte kitail en kin kilangwohng nta nin duwen mehkot sarawi.

13. Dahme kahrehda Kristian akan sohte kin ale doken nta?

13 Ia duwe, met wehwehki me Kristian akan pil anahne soikala ale doken nta? Ei. Siohwa ketin kehkehlingkihong kitail en dehr kang de nim nta. Ma toahkte men padahkihong uhk ken dehr nim sakau en wai, ke pahn doakoahlong nan paliweromw? Uhdahn soh! Ni mwohmwohte, kehkehlik en dehr kang de nim nta  wehwehki me kitail en dehr ale doken nta.​—Menlau kilang Ire kan 29.

14, 15. Ia uwen kesempwal ong Kristian emen en kin wauneki mour oh peikiong Siohwa?

14 A ia duwen ma toahkte men padahkihong kitail me kitail pahn mehla ma kitail sohte ale doken nta? Emenemen anahne pein pilada ma e pahn peikiong sapwellimen Koht kosonned me pid nta. Kristian akan kin uhdahn wauneki sapwellimen Koht kisakis en mour, oh kitail pahn rapahki soangen wiepe teikan pwehn kak momour; ahpw kitail sohte pahn ale doken nta.

15 Kitail kin nantihong en kolokol roson mwahu, ahpw pwehki mour kesempwal ong Koht, kitail sohte pahn ale doken nta. E kesempwal en peikiong Siohwa sang en song en kareireila atail mour ni atail sapeikiong ih. Sises mahsanih: “Aramas emen me men doarehla eh mour, e pahn pwupwusang; a mehmen me men tounmeteikihla eh mour, pwehki ngehi, e pahn diar.” (Madiu 16:25) Kitail men peikiong Siohwa pwehki kitail poakohng ih. E mwahngih dahme keieu mwahu ong kitail, oh duwehte Siohwa kitail kin kilangwohng mour nin duwen mehkot me kesempwal oh sarawi.​—Ipru 11:6.

16. Dahme kahrehda sapwellimen Koht ladu kan kin peikiong ih?

16 Sapwellimen Koht ladu lelepek kan koasoanehdi teng en peikiong sapwellime kosonned me pid nta. Irail sohte pahn kang de nim nta, oh irail sohte pahn ale doken nta mehn apwalihala soumwahu. * Ahpw, irail pahn ale wiepe teikan pwehn kamourirailla. Irail  kamehlele me Sounkapikpen mour oh nta kin ketin mwahngih dahme keieu mwahu ong irail. Ke kamehlele me e kin ketin mwahngih dahme keieu mwahu ong uhk?

IHTE ELEN DOADOAHNGKI NTA ME SIOHWA KUPWURKI

17. Nan Israel, ia ehute elen doadoahngki nta me Siohwa Koht ketin mweidada?

17 Nan Kosonned me Koht ketikihong Moses, Siohwa mahsanihong mehn Israel ko: “Mour en mehkoaros me momour kin mihmi ni nta, ihme KAUN-O ketin koasoanehkihdi pwe nta koaros en kin wudekiong pohn pei sarawio pwehn kin kihsang dipen aramas akan. Nta, me iei mour, iei me kin kihsang dihp.” (Lipai 17:11) Ni ahnsou me mehn Israel kan dipada, irail kak peki sapwellimen Siohwa mahk ni arail pahn meirongkihla mahn emen oh peki rehn samworo en wudekihdiong ekei ntahn mahno pohn pei sarawi en tehnpaso. Ihte ahl wet me Siohwa ketin mweidohng mehn Israel kan en doadoahngki nta.

18. Dahme sapwellimen Sises meirong ketikihda ong kitail?

18 Ni ahnsou me Sises ketidihdo sampah, e ketin wiliankihdi kosonned en meirong en mahn sang ni eh ketikihda sapwellime mour, de nta, ong mahkpen dipatail kan. (Madiu 20:28; Ipru 10:1) Sapwellimen Sises mour uhdahn kesempwal me kahrehda mwurin Siohwa eh ketin kaiasada Sises ong nanleng, Siohwa kak ketikihong aramas koaros koapworopwor en mour kohkohlahte.​—Sohn 3:16; Ipru 9:11, 12; 1 Piter 1:18, 19.

Ia duwen omw kak kasalehda me ke kin wauneki mour oh nta?

19. Dahme kitail anahne wia pwe kitail “sohte pahn pwukoahki” ntahn aramas koaros?

19 Kitail uhdahn kalahngankihong Siohwa sapwellime  kisakis en mour! Oh kitail men padahkihong aramas akan ma irail pwoson Sises, irail kak mour kohkohlahte. Kitail poakohng aramas akan, oh kitail pahn wia uwen atail kak en padahkihong irail ia duwen arail pahn kak komourala. (Esekiel 3:17-21) Eri, duwehte wahnpoaron Pohl, kitail pahn kak nda: “I sohte pahn pwukoahki, pwehki I sohte ekihsang kumwail ei kasalehiong kumwail unsek en kupwur en Koht.” (Wiewia 20:26, 27) Ei, kitail kasalehda atail uhdahn wauneki mour oh nta ni atail kin padahkihong meteikan duwen Siohwa oh ia uwen eh ketin kesempwalki mour.

^ par. 16 Me pid duwen doken nta, menlau kilang pali 87-89 en pwuhken “Dadaurete ni Limpoak en Koht,” me Sounkadehdehn Siohwa kan wiahda.