Luslahng audepe kan

luslahng audepe kan

 IRELAUD EISEK EHU

Dahme Kahrehda Lokolok Nohn Mwuledengki?

Dahme Kahrehda Lokolok Nohn Mwuledengki?

1, 2. Dahme aramas tohto kin peidengki?

ILOAK laud ehu kauwehla kisin kahnimw ehu. Ohl emen pedolong nan imwen sarawi ehu oh kasikih, kauwehla oh kemehla aramas tohto. Nohno men mehkihla kanser, mehsang nah seri limmen.

2 Ni ahnsou me soangen kahpwal pwukat kin wiawi, aramas tohto kin peidengki, “Dahme kahrehda?” Me tohto kin peidengki dahme kahrehda sampah wet eh nohn diren kailok oh lokolok. Mie pak me ke pein medemedewe duwen met?

3, 4. (a) Soangen peidek dah kan me Apakuk kalelapak? (b) Ia duwen Siohwa eh ketin sapeng?

3 Nan Paipel, kitail sukuhlki me ohl akan me kin ni mehlel pwoson Koht pil kin idek soangen peidekohte. Karasepe, soukohp Apakuk kalelapak rehn Siohwa: “Dahme komw ketin mweidkihong ie I en patopatohwan soangen sapwung oh suwed pwukat? Ia duwen omwi kak ketin kanengamahiong mahmahsanih soangen wiewia suwed wet? Apwal laud kin kapiliepene, akamai oh pei kin wiewiawi wasa koaros.”​—Apakuk 1:3.

4 Nan Apakuk 2:2, 3, kitail wadek duwen sapwellimen Koht pasapeng ong ahn Apakuk peidek ko oh sapwellime inou en kamwahwihala kahpwalo. Siohwa sapwellimanki limpoak laud ong aramas. Paipel mahsanih:  “Eh kin ketin apwahpwalih kumwail.” (1 Piter 5:7) Ni mehlel, Koht sohte kupwurki mahsanih lokolok laudsang atail sohte men kilang lokolok. (Aiseia 55:8, 9) Eri, kitail koasoiapene peidek wet, Dahme kahrehda lokolok nohn mwuledengki nin sampah?

DAHME KAHREHDA LOKOLOK NOHN MWULEDENGKI?

5. Dahme sounpadahk en pelien lamalam tohto kin ndahki duwen lokolok? Dahme Paipel kin padahngki?

5 Pastor kan oh sounpadahk en pelien lamalam kan kin kalapw nda me iei kupwuren Koht aramas en lokolok. Ele ekei pahn nda me soahng koaros me kin wiawihong aramas men, iangahki kahpwal kan, iei koasoandi sang Koht oh kitail sohte kak wehwehki dahme kahrehda. Ele ekei pahn pil nda me aramas, iangahki seri kan, kin mehla pwe ren kak iang Koht mi nanleng. Ahpw met sohte mehlel. Siohwa sohte kin ketin kahrehda soahng suwed kan en wiawi. Paipel mahsanih: “Koht Wasa Lapalahpie sohte kin ketin wia me suwed; e sohte kin ketin kupwur sapahrek ong emen.”​—Sohp 34:12.

6. Dahme kahrehda aramas tohto kin ikidiki Koht lokolok koaros nin sampah?

6 Aramas tohto kin ikidiki me Koht me ketin kahrehda lokolok nin sampah pwehki re leme me Koht me ketin kakaun sampah. Ahpw nin duwen atail sukuhlkier nan Irelaud 3, kaunen sampah wet iei Sehdan me Tepil.

7, 8. Dahme kahrehda lokolok nohn mwuledengki nin sampah?

7 Paipel padahkihong kitail me “sampah unsek mi  pahn manaman en Me Suwedo.” (1 Sohn 5:19) Kaun en sampah wet, Sehdan, me inenen suwed oh lemei. E “kin pitipitih sampah pwon.” (Kaudiahl 12:9) Aramas tohto kin alasang ih. Ihme met wia ehu kahrepe sampah wet en nohn diren likamw, kailok oh wiewia lemei.

8 Pil mie ekei kahrepe kan me kahrehda lokolok nohn mwuledengki nin sampah. Mwurin Adam oh Ihp uhwongada Koht, ira kadaur ong neira seri kan dihp. Oh pwehki dihp, aramas me kin kahrehda aramas teikan en lokolok. Aramas kin kalapw men irail en kesempwal mwohn aramas teikan. Irail kin pei, irail kin mahwen, oh irail kin kaloke meteikan. (Eklesiasdes 4:1; 8:9) Ekei pak aramas kin lokolok pwehki “paisuwed.” (Eklesiasdes 9:11) Ni arail mi wasa ehu ni ahnsou ehu me mehkot suwed wiawi, re kak lelohng nan aksident ehu de soahng suwed kan kak wiawiong irail.

9. Dahme kahrehda kitail kak kamehlele me Siohwa sapwellimanki kahrepe mwahu ehu ong mweidohng lokolok en wiewiawihte?

9 Siohwa sohte kin ketin kahrehda lokolok kan. Kaidehn ih me kitail en ikidiki mahwen, wiewiahn kauwehla kosonned oh wiewiahn wiakau. Koht sohte kin ketin kahrehda kahpwal akan me duwehte rerrer en sahpw, melimel laud kan, oh lapake laud kan. Ahpw ele ke medewe, ‘Ma Siohwa iei ih me keieu manaman nanleng oh sampah, a dahme kahrehda e sohte ketin irehdi soahng suwed pwukat?’ Kitail ese me Koht uhdahn ketin nsenohkin kitail, eri uhdahn pahn mie kahrepe mwahu ehu me kahrehda e ketin mweidohng lokolok en wiewiawihte.​—1 Sohn 4:8.

 DAHME KAHREHDA KOHT KETIN MWEIDALA LOKOLOK EN MIE

10. Ia duwen Sehdan eh uhwong Siohwa?

10 Nan mwetuwel en Ihden, Tepilo pitiehdi Adam oh Ihp. Sehdan karaunieki Koht me e wia Kaun suwed emen. Dene me Koht ketin ekihsang Adam oh Ihp mehkot mwahu. Sehdan men ira en kamehlele me e pahn wia kaun men me mwahusang Siohwa oh dene me ira sohte anahne Koht.​—Senesis 3:2-5; menlau kilang Ire kan 27.

11. Peidek dahieu me kitail anahne sapeng?

11 Adam oh Ihp sapeikiong Siohwa oh uhwongada ih. Ira medewe me ira ahneki pwuhng en pilada ong pein ira dahme pwung oh dahme sapwung. Ia duwen Siohwa eh kak ketin kasalehda me irail me uhwong ko sapwung oh ih me ketin mwahngih dahme keieu mwahu ong kitail?

12, 13. (a) Dahme kahrehda Siohwa sohte ketin mwadangete kasohrehla irail me uhwongada ih ni ahnsowohte? (b) Dahme kahrehda Siohwa ketin mweidohng Sehdan en wia kaunen sampah wet oh aramas akan en pein kaunda irail?

12 Siohwa sohte ketin mwadangete kasohrehla Adam oh Ihp ni ahnsowohte. Ahpw, e ketin mweidohng ira en naineki seri kan. Eri Siohwa ketin mweidohng nein Adam oh Ihp seri kan en pilada ihs me irail men en wia arail kaun. Kupwuren Siohwa iei en kadirehkihla sampah aramas unsek kan oh met uhdahn pahn wiawi mendahki dahme Tepilo nannanti en wia.​—Senesis 1:28; Aiseia 55:10, 11.

13 Sehdan uhwongada Siohwa mwohn pokon en tohnleng rar kei. (Sohp 38:7; Kaudiahl 5:11) Eri Siohwa ketikihong Sehdan ahnsou en kasansalehda ma eh  pakaraun mehlel. E pil ketikihong aramas akan ahnsou en pein kauwada arail koperment kan pahn kaweid en Sehdan en kasalehda ma re kak pweida ma Koht sohte ketin sewese irail.

14. Dahme ahnsou kadehdedahr?

14 Erein sounpar kid kei, aramas akan kin song en pein kaunda irail, ahpw re sohte pweida. Sansalehr me Sehdan sounlikamw men. Aramas akan uhdahn anahne sapwellimen Koht sawas. Soukohp Seremaia pwung ni eh koasoia: “Maing KAUN, I ese me sohte mehmen me kaunda pein imwilahn eh mour; sohte aramas emen me kaunda pein eh mour.”​—Seremaia 10:23.

DAHME KAHREHDA SIOHWA KETIN AWIAWIHKI AHNSOU REIREI?

15, 16. (a) Dahme kahrehda Siohwa ketin mweidohng lokolok en mihmihte ahnsou reirei? (b) Dahme kahrehda Siohwa sohte ketin kamwahwihala kahpwal akan me Sehdan wiahda?

15 Dahme kahrehda Siohwa ketin mweidohng lokolok en mihmihte ahnsou reirei? Dahme kahrehda e sohte ketin katokehdi soahng suwed kan? Ahnsou laud anahn pwehn kadehde me ahn Sehdan kaunda sohte pweida. Aramas akan songehr wiepen mwomwen koperment koaros ahpw sohte pweida. Mendahki arail doadoahk kin deila nan pelien sains oh kepwe kan, suwedlahn kopwung sapahrek, semwehmwe, wiewiahn kauwehla kosonned oh mahwen kan kin tohtohsang mahs. Kitail sohte kak pein kaunkitailda ma sohte sawas sang Koht.

16 Ahpw, Siohwa sohte ketin kamwahwihala kahpwal kan me Sehdan wiahda. Ma e pahn ketin wia  met, met pahn wehwehki me Koht ketin utung ahn Sehdan kaunda, oh E sohte douluhl pahn ketin wia met. Pil aramas akan ele kakete kamehlele me re pweida ni arail pein kaunda irail. Met likamw pwoat oh Siohwa sohte pahn ketin utungada likamw pwoatet. E sohte kin ketin likamw.​—Ipru 6:18.

17, 18. Dahme Siohwa pahn ketin wiahiong soahng suwed koaros me Sehdan wiahdahr?

17 Ia duwe, Siohwa kak ketin kamwahwihala soahng koaros me Sehdan oh aramas akan kauwehla pwehki arail uhwong ih? Ei. Ong Koht, soahng koaros kak pweida. Siohwa ketin mwahngih ahnsou me ahn Sehdan uhwong kan koaros pahn pasapengla. Mwurin mwo e pahn ketin kaparadaisihala sampah nin duwen kupwure nin tapio. Irail koaros me “mihmi nan sousou kan” pahn iasada. (Sohn 5:28, 29) Aramas akan solahr pahn pwurehng soumwahuda de mehla. Sises pahn ketin kamwahwihala soahng suwed koaros me Sehdan kahrehda. Siohwa pahn ketin doadoahngki Sises “en kauwehla doadoahk en Tepilo.” (1 Sohn 3:8) Kitail kalahnganki me erein ahnsou wet Siohwa kin ketin kanengamahiong kitail pwe kitail en kak esehla ih oh pilada me kitail men en ketin wia atail Kaun. (Wadek 2 Piter 3:9, 10.) Pil ni ahnsou me kitail kin lelohng lokolok, e kin ketin sewese kitail en dadaur.​—Sohn 4:23; wadek 1 Korint 10:13.

18 Siohwa sohte kin ketin idingkihong kitail en pilada ih en wia atail Kaun. E ketikihong aramas akan kisakis en saledek en pilipil. Kitail pahn tehkpene ia wehwehn kisakis kesempwal wet ong kitail.

 IA DUWEN OMW PAHN DOADOAHNGKI KISAKIS EN SALEDEK EN PILIPIL?

19. Kisakis kaselel dah me Siohwa ketikihong kitail? Dahme kahrehda kitail en kalahnganki kisakis wet?

19 Kisakis kaselel en saledek en pilipil me Siohwa ketikihong kitail kahrehiong kitail en weksang douluhl mahn akan. Eri mahn akan kin mwekidkihte koasoandien loalokong me mi loalarail, ahpw kitail kak pilada ia mwomwen mour me kitail mwahuki oh pilada ma kitail men kaperenda Siohwa. (Lepin Padahk 30:24) Oh pil, kitail sohte duwehte misihn kan me kin wiahte dahme re wiawidahng wia. Kitail ahneki saledek en wiahda pilipil kan me pid ihs me kitail men wia, ihs me pahn wia kompoakepatail, oh dahme kitail men wiahiong atail mour. Siohwa kupwurki kitail en perenki mour.

20, 21. Pilipil dah me keieu mwahu me ke kak wiahda met?

20 Siohwa kupwurki kitail en poakohng ih. (Madiu 22:37, 38) E ketin duwehte sahm emen me kin perenkihda rong nah serio ndahsang nan eh mohngiong “I poakepoake iuk” a kaidehn pwehki mie me idingohng en nda met. Siohwa ketikihong kitail saledek en pilada ma kitail men papah ih de soh. Sehdan, Adam, oh Ihp pilada en soikala Siohwa. Ia duwen omw pahn doadoahngki omw kisakis en saledek en pilipil?

21 Doadoahngki omw saledek en pilipil pwehn papah Siohwa. Mie aramas rar kei me piladahr en kaperenda Siohwa oh soikala Sehdan. (Lepin Padahk 27:11) Dahme ke kak wiahda ahnsouwet me pahn kahrehiong uhk en kak mi nan sapwellimen Koht sampah kapw ni ahnsou me e pahn ketikihsang lokolok koaros? Irelaud en mwurin met pahn sapengala peidek wet.