Luslahng audepe kan

luslahng audepe kan

 IREN MEHN KASUKUHL 51

Sounpei Men oh Kisin Serepein Men

Sounpei Men oh Kisin Serepein Men

Nan sapwen Siria, mie kisin serepein en Israel men me dohsang imweo. Sounpei en Siria kan wahsang ih rehn eh peneinei, oh met e kin wia lidu ong en Nahman me wia kaunen sounpeio, eh pwoudo. Kisin serepein menet kin kaudokiong Siohwa mendahki aramas akan me e kin mi reh sohte kin.

Nahman ahneki soumwahu laud ehu ni kilio, oh e kin medengki ahnsou koaros. Kisin serepein menet uhdahn men sewese ih. E ndaiong en Nahman pwoudo: ‘I ese emen me kak kamwahwihala omw pwoudo. Nan Israel, mie sapwellimen Siohwa soukohp men me adaneki Elisa. E kak kamwahwihala omw pwoudo.’

En Nahman pwoudo eri ndaiong Nahman dahme kisin serepeino ndaiong ih. Nahman men song wia mehkot sohte lipilipil, ih eri kohla ni imwen Elisa nan Israel. Nahman kasik me Elisa pahn kasamwo ih nin duwen aramas kesempwal men. Ahpw, Elisa sohte kohla oh koasoiong ih, e kadarala nah laduwo pwehn rahnmwahwih Nahman oh ndaiong ih  koasoi pwoatet: ‘Kohla oh kaduhdi paliweromwen pak isuh nan Pillap Sordan. Eri ke pahn mwahula.’

Nahman uhdahn nsensuwedla. E nda: ‘I medewe me soukohp menet pahn kamwahwihiehla ni eh pahn likweriong eh Kohto oh damwerki peh ko pohn kiliet. Ahpw, e ndaiong ie ien kohla ni pillap wet nan Israel. Mie at pillap nan Siria me mwahusang met. Dahme I seu kohkihlahte mwo?’ Nahman eri lingeringerda, oh kohkohlahsang ni imwen Elisao.

Nein Nahman ladu ko sewese ih en ahneki madamadau mwahu. Irail ndaiong ih: ‘Ke seu pahn wia mehkot sohte lipilipil pwehn mwahula? Dahme soukohp menet ndaiong uhk ken wia me mengei. Dahme ke seu wiahkihte?’ Nahman eri rong irail. E kohla ni Pillap Sordan oh duhdi nan pihlo pak isuh. Mwurin keisuhn eh duhdi nan pihlo, Nahman douda sang nan pihlo oh e mwahula douluhl. E uhdahn perenkihda met, oh e pwurala rehn Elisa pwehn kalahnganohng ih. Nahman eri ndaiong Elisa: ‘Met I esehier me Siohwa iei me Koht mehlel.’ Ia omw madamadau, ia en kisin serepein en Israelo eh pepehm ni ahnsou me Nahman pwurala e mwahulahr?

“Komw ketin aleier kaping unsek sang ni ewen seri kan oh sang rehn me kin wie dihdi kan.”​—Madiu 21:16