Luslahng audepe kan

luslahng audepe kan

 IREN MEHN KASUKUHL 50

Siohwa Ketin Doarehla Seosopat

Siohwa Ketin Doarehla Seosopat

Seosopat, nanmwarki en Suda, kauwehla pei sarawi en Paal kan oh dikedik kan nan sahpwo. E men aramas ako ren esehla sapwellimen Siohwa kosonned kan. Ih eri kadarpeseng lapalap kan oh mehn Lipai kan nan sapwen Suda pwon pwehn padahkihong aramas akan sapwellimen Siohwa kosonned kan.

Wehi kan me karanih irail kin masak mahweniong Suda pwehki irail ese me Siohwa kin ketin ieiang sapwellime aramas akan. Irail pil kin wahdo kisakis kan ong Nanmwarki Seosopat. Ahpw mehn Mohap kan, mehn Ammon kan, oh irail kan me mi nan sapwen Seir kohdohng peiong mehn Suda kan. Seosopat ese me e anahne sapwellimen Siohwa sawas. Ih eri kapokonepene ohl, lih, oh seri koaros nan Serusalem. Mwohrail koaros, e kapakapki: ‘Siohwa, ma sohte komwi, se sohte kak kana. Komw menlau mahsanihong kiht dahme sen wia.’

Siohwa ketin sapengala kapakapo, mahsanih: ‘Kumwail dehr masepwehk. I pahn sewese kumwail. Kumwail pahn koasoaneikumwaildi oh kesikesihnen, oh kumwail pahn kilang ia duwen ei pahn doareikumwailla.’ Eri, ia duwen Siohwa eh ketin doareirailla?

Mandahn rahno nimensehngie, Seosopat ahpw pilada sounkoul kei oh ndaiong irail ren tiengla mwohn karis en sounpei ko. Irail ahpw kaparieisang Serusalem kolahng wasahn mahweno nan wasa me adaneki Tekoa.

Ni sounkoul ko ar wie kapikapinga Siohwa ni peren oh ngihl laud, Siohwa ketin peiki sapwellime aramas akan. E ketin kapingada mehn Ammon ko oh mehn Mohap ko kahrehda irail tepida peipene nanpwungarail, oh sohte emen irail me pitila. Ahpw Siohwa ketin pere aramas en Suda ko, sounpei ko, oh neirail samworo kan. Aramas koaros me karanih wasao rong duwen dahme Siohwa ketin wiahdahr, oh irail ese me Siohwa kin ketin doandoarehte sapwellime aramas akan. Ia duwen Siohwa eh kin ketin kapitala sapwellime aramas akan? E kin ketin wia met ni ahl tohto. E sohte anahne sawas sang aramas akan pwe en wia met.

“Kumwail sohte pahn pei nan mahwen wet. Kumwail pahn koasoaneikumwaildi oh awih; kumwail ahpw pahn patohwan duwen KAUN-O eh pahn ketikihong kumwail en powehdi.”​—2 Kronikel 20:17