Luslahng audepe kan

luslahng audepe kan

 IREN MEHN KASUKUHL 83

Sises Ketin Kamwenge Aramas Kid kei

Sises Ketin Kamwenge Aramas Kid kei

Mwohnte Pahsohpa nan pahr 32, wahnpoaron ko pwurodohsang arail seiloak en kalohk. Irail pwangada, eri Sises ketikiniraillda pohn pwoht ehu kohla Pedsaida, wasa me irail kak kommoal ie. Ahpw ni ahnsou me pwohto leledo ni oaroahro, Sises mahsanihada aramas kid kei me pwakihala irail wasao. Mendahki Sises kupwurki kelekelehpw rehn sapwellime wahnpoaron ko, e ketin kasamwohdo aramas ako ni kadek. E ketin kamwahwihala neirail aramas soumwahu kan oh tepida padahk ong irail. Rahn ehu pwon, Sises ketin padapadahkihong irail duwen Wehin Koht. Ni ahnsou me soutikpenehr, sapwellime wahnpoaron ko kohdo reh oh ndaiong: ‘Aramas pwukat mwein men mwengedahr. Komw kadarirailla pwe ren kak kohla alehda kenerail mwenge.’

Sises eri mahsanih: ‘Re sohte anahne kohkohla. Kumwail kihong irail mehkot me re kak kang wasaht.’ Wahnpoaron ako eri idek: ‘Komw kupwurki sen kohla pwainda kanarail pilawa?’ Pilip, emen wahnpoaron ko eri nda: ‘Mehnda ma dir neitail mwohni, kitail sohte kak pwainda pilawa me pahn itarohng pokonet.’

Sises eri ketin idek rehrail: ‘Ia uwen laud en mwenge me mi rehtail?’ Andru eri nda: ‘Lopwon en pilawa limau oh kisin mwahmw riakis. Met uhdahn sohte itar.’ Sises eri mahsanih: ‘Wahdohng ie pilawa ko oh mwahmw ko.’ Ih eri mahsanihong aramas ako ren mwohndiong pohn dihpw ko ni pwihn 50 oh 100. Sises eri ketin ale pilawa ko oh mwahmw ko, kilengdalahng nanleng, oh kapakap. Ih eri ketikihong wahnpoaron ko mwenge  ko, oh irail nehkpeseng rehn aramas ako. Ohl 5,000 oh pil lih oh seri koaros mwenge lao irail medla. Mwurin mwo, wahnpoaron ko kihpene luhwen mwenge ko, pwe en dehr ohla mwahl. Re audehda kopwou 12 lao dir! Met manaman kapwuriamwei ehu, kaidehn?

Aramas ako uhdahn pwuriamweikihla, kahrehda re men wiahkihla Sises arail nanmwarki. Ahpw Sises mwahngih me e saikinte lel ahnsou me Siohwa kupwurki en wiahla nanmwarki. Ih eri ketin kadarala pokono oh ndaiong sapwellime wahnpoaron ko ren kohla palio Sehden Kalili. Irail eri douda pohn pwohto, oh Sises ketidahla pohn nahnao kelehpw. Dahme kahrehda? Pwehki e anahne ahnsou en kapakap ong Semeo. Sohte lipilipil ia uwen eh kedirepw, Sises kin ketin wiahda ahnsou ong kapakap.

“Kumwail dehr doadoahk ong mwenge me kin kiteila, a kumwail doadoahk ong mwenge me kin mihmihte ong mour soutuk, me Nein-Aramas pahn kihong kumwail.”​—Sohn 6:27