Luslahng audepe kan

luslahng audepe kan

 IREN MEHN KASUKUHL 57

Siohwa Ketin Kadarala Seremaia Pwehn Kalohk

Siohwa Ketin Kadarala Seremaia Pwehn Kalohk

Siohwa ketin pilada Seremaia en wia soukohp ong mehn Suda kan. E mahsanihong ih en kalohk ong aramas ako oh padahkihong irail me re anahne uhdihsang wia soahng suwed kan. Seremaia ahpw nda: ‘Ia duwe, pwe ngehi kisin pwutak kis. I sehse dahme I pahn ndaiong aramas ako.’ Siohwa eri mahsanihong ih: ‘Ke dehr masepwehk. I pahn ndaiong uhk dahme ke pahn nda. I pahn seweseiuk.’

Siohwa mahsanihong Seremaia en kapokonepene ohl mah kan, oh kauwehla sah ehu me wiawihkihda pwehl mwohrail, oh nda: ‘Serusalem pahn ohla duwehte met.’ Ohl mah ko uhdahn lingeringerkihda Seremaia eh wia met. Samworo men me adaneki Pasuhr keme Seremaia oh salihedi nanpwungen tuhke kei. Pwohng ehu pwon, Seremaia sohte kak mwekid. Pasuhr eri sapwadada Seremaia manda sang rahno. Seremaia eri nda: ‘I solahr kakohng met. I solahr pahn kalohk.’ Ahpw ia duwe, e uhdihsang kalohk? Soh. Ni Seremaia eh medemedewe duwen met, e nda: ‘Sapwellimen Siohwa rohng duwehte kisiniei ehu me mihmi loalei. I sohte kak uhdihsang kalohk.’ Seremaia eri pousehlahte padahkihong aramas akan dahme pahn wiawi.

Mwurin sounpar kei, nanmwarki kapw men miehda nan Suda. Samworo kan oh soukohp likamw akan sohte pwungki rohng me Seremaia kin padahngkio. Irail eri ndaiong lapalap ako: ‘Ohl menet konehng en kamakamala.’ Seremaia eri nda: ‘Ma kumwail pahn kemeiehla, kumwail pahn kemehla aramas emen me sohte dipe. I kin koasokoasoia sapwellimen Siohwa mahsen kan, kaidehn pein ahi.’ Ni lapalap ako ar rongada met, irail nda: ‘Ohl menet sohte konehng en kamakamala.’

 Seremaia pousehlahte kalokalohk, lapalap ako eri lingeringerkihda. Irail eri peki rehn nanmwarkio ren kemehla Seremaia. Nanmwarkio eri ndaiong irail me re kak wia soahng koaros me re men wiahiong Seremaia. Irail eri wahla Seremaia oh kesehdiong nan pwarer loal pwelmatak ehu, oh koapworopworki me e pahn mehla wasao. Seremaia eri tepida kikihrla nan pwelmatako.

Emen me kin doadoahk nan tehnpas en nanmwarkio me adaneki Epedmelek, ahpw ndaiong nanmwarkio: ‘Lapalap akan kesehdilahr Seremaia nan pwarero! Ma e pahn mihmihte mwo, e pahn mehla.’ Nanmwarkio eri ndaiong Epedmelek en kahrehda ohl 30 oh kohla kihdahsang Seremaia nan pwarero. Ia duwe, kitail sou anahne duwehte Seremaia me sohte mweidohng mehkot sohte lipilipil en kauhdi ih sang kalohk?

“Aramas koaros pahn kailongkinkumwailla pwehki ngehi. A me pahn dadaurete lel ni imwi, ih me pahn mourla.”​—Madiu 10:22