Luslahng audepe kan

luslahng audepe kan

 IREN MEHN KASUKUHL 1

Koht Ketin Wiahda Nanleng oh Sampah

Koht Ketin Wiahda Nanleng oh Sampah

Siohwa Koht me wia Sounkapikpatail. E ketin kapikada soahng koaros, soahng kan me kitail kak kilang oh soahng kan me kitail sohte kak kilang. Mwohn eh ketin wiahda soahng kan me kitail kak kilang, e ketin wiahda tohnleng tohtohie. Ke ese ihs tohnleng kan? Irail sapwellimen Siohwa ladu kei. Mwomwarail kan duwehte Siohwa. Kitail sohte kak kilang irail, duwehte atail sohte kak kilang Koht. Tepin tohnleng me Siohwa ketin wiahda wiahla sapwellime sounsawas emen. Tohnleng menet sawas ni ahnsou me Siohwa ketin wiahda usu kan, soahng koaros pahnlahng oh soahng teikan koaros. Ehu iei sampah wet atail wasahn kousoan kaselel.

Mwuri, Siohwa ketin kaunopada sampah ong mahn akan oh aramas akan en kousoan loale. E ketin wiahda marain en ketipin pwehn kamarainih sampah. E ketin wiahda nahna kan, sehd kan, oh pillap akan.

Dahme wiawi mwurin mwo? Siohwa mahsanih: ‘I pahn wiahda dihpw kan oh tuhke tikitik kan oh tuhke laud kan.’ Tohto soangsoangen wahntuhke kan, wahnsahpw kan oh wahnrohs kan ahpw tepida wosada. Mwuri Siohwa ketin wiahda mahn koaros me kin pihr, pampap oh kerep. E ketin wiahda mahn tikitik kan me duwehte rapit kan, oh me laud kan me duwehte elipant. Mehnia mahn me ke kin keieu perenki?

Mwurin mwo, Siohwa mahsanihong tepin tohnlengo: ‘Nna, kita pahn wiahda aramas.’ Aramas akan pahn weksang mahn akan. Irail pahn  kak wiahda soahng kan. Irail pahn kak lokaia, kouruhr, oh kapakap. Irail me pahn apwalih sampah oh mahn akan. Ke ese ihs me wia tepin ohl? Kitail pahn kilang.

“Koht tepin kapikada sampah oh mehkoaros me mi pahnlahng.”​—Senesis 1:1