Luslahng audepe kan

luslahng audepe kan

 IRELAUD 10

Pwopwoud—Kisakis Ehu Sang Rehn Koht

Pwopwoud—Kisakis Ehu Sang Rehn Koht

“Sahl silipwoat me patpene pahn apwal en mweipeseng.”​—EKLESIASDES 4:12.

1, 2. (a) Ekei pak, dahme kitail ele kin medewe duwen pwopwoud kapw kan, oh dahme kahrehda? (b) Peidek dah kan kitail pahn tehkpene nan irelaud wet?

KE KIN perenki iang towehda kapwopwoud? Me tohto kin perenki pwehki kapwopwoud iei ahnsou kaperen ehu. Ke kin kilang meh riemeno kapwatkihda likou kaselel kan. Ke kak kilang uwen ara peren! Nan soangen rahno, ira uhdahn peren, oh ira kasikasik me ara mour pahn pweida.

2 Ahpw rahnwet, koasoandi en kapwopwoud kin luhluwetala. Mendahki kitail kin men pwopwoud kapw kan en pweida mwahu, ekei ahnsou ele kitail kin medewe: ‘Pwopwoud wet pahn nsenamwahu? Ara limpoak pahn kak werei?’ Pasapengpen peidek wet pahn poahsoankihda ma ohl oh lih pwopwoud pahn likih oh kapwaiada sapwellimen Koht kaweid me pid pwopwoud. (Wadek Lepin Padahk 3:5, 6.) Ira anahne wia met pwehn kak dadaurete ni limpoak en Koht. Kitail pahn tehkpene ia duwen Paipel eh kin sapengala peidek pahieu pwukat: Ia kahrepe mwahu en pwopwoudida? Ma ke pahn pwopwoud, ihs me ke pahn pwoudiki? Ia duwen omw kak kaunopada ong pwopwoud? Dahme kak sewese pwopwoud ehu en kolokol nsenamwahu?

 IA KAHREPE MWAHU EN PWOPWOUDIDA?

3. Dahme kahrehda e sohte konehng en pwopwoudida pwehki kahrepe kan me sohte katepe?

3 Ekei kin kamehlele me ke sohte kak nsenamwahu oh peren ma ke sohte pwopwoud. Met sohte mehlel! Sises sohte ketin pwopwoud oh mahsanih me kiripw kisakis ehu oh e ketin kangoange irail kan me kak kiripw en kesempwalki kisakis wet. (Madiu 19:11, 12) Wahnpoaron Pohl pil kin koasoia kamwahupen en kin kiripw. (1 Korint 7:32-35) Sises oh Pohl sohte ketin wiahda koasoandi ehu me emen en dehr pwopwoud. Ni mehlel, “padahk dene pwopwoud me sapwung” iei kisehn “padahk en ngehn suwed kan.” (1 Timoty 4:1-3) Ahpw, en kin kiripw kin kihong kamwahu tohto ong irail kan me men doadoahngki ahnsou laud ong papah Siohwa. Kahrehda, e sohte konehng emen en pwopwoudida pwehki kahrepe kan me sohte katepe, me duwehte e men pwopwoud pwehki meteikan kangoange ih en pwopwoudida.

4. Ma pwopwoud pahn pweida mwahu, ia duwen met eh pahn wia kamwahu ong apwalih seri kan?

4 Ahpw, ia duwe, mie kahrepe mwahu kan en pwopwoudida? Ei, mie. Pwopwoud pil kisakis ehu sang rehn Koht limpoak. (Wadek Senesis 2:18.) Eri, mie kamwahu kan en pwopwoud me kak kalaudehla ahn emen peren. Karasepe, pwopwoud me pweida mwahu kak wiahda poahsoanpen mouren peneinei me keieu mwahu. Seri kan anahne peneinei nsenamwahu me pahpa oh nohno pahn apwalih irail, kasalehda limpoak ong irail, kaiahne irail oh kaweid irail. (Melkahka 127:3; Episos 6:1-4) Ahpw, apwalih seri kaidehn ihte kahrepen pwopwoud.

5, 6. (a) Nin duwen me Eklesiasdes 4:9-12 kin kasalehda, ia ekei kamwahupe kan en ahneki kompoakepatail me keren? (b) Ia duwen pwopwoud ehu eh kak duwehla sahl silipwoat me patpene?

 5 Tehk iren Paipelo me pwarada ni tepin irelaud wet: “Aramas riemen mwahusang emente, pwehki ma ira pahn patpene doadoahk, e pahn mie katepe. Ma emen ira pahn pwupwudi, meteio kak sewesehda. Ahpw ma aramas emen pahn kelekelehpw oh pwupwudi, meid suwed, pwehki sohte me pahn kak sewese. Ma aramas riemen pahn wendipene ni ahnsoun kopou, ira pahn karakarada, ia duwen omw pahn karakarada ma ke wendi kelehpw? Aramas riemen pahn kak doareirahla nan pei ehu me aramaste emen sohte pahn kakohng. Sahl silipwoat me patpene pahn apwal en mweipeseng.”​—Eklesiasdes 4:9-12.

6 Iren Paipel wet kin mahsanih duwen kamwahupen en ahneki kompoakepatail. Atail pwoud iei kompoakepatail me keieu keren. Duwen me iren Paipel wet kin kasalehda, patpene wet kak mweidohng pwopwoud en sawaspene, kamweit oh pere emenemen. Ahpw, pwopwoud ehu kak uhdahn kehlail ma emen tohrohr pahn iang ira. Duwen iren Paipelo eh kasalehda, sahl rioapwoat kak mweipeseng. Ahpw sahl silipwoat me patpene pahn apwal en mweipeseng. Ma ohl pwopwoud oh lih pwopwoud koaros pahn keieu kesempwalki en kaperenda Siohwa, ara pwopwoud pahn duwehla sahl silipwoat me patpene. Ara poadidi ong Siohwa kin kahrehda ara pwopwoud en inenen kehlail.

7, 8. (a) Kaweid dahieu Pohl ntingihdi ong Kristian me kiripw kan me kin apwalki kaunda arail ineng en wia nsenen pwopwoud? (b) Ire mehlel dahieu me pid duwen pwopwoud me Paipel kihda?

7 Oh pil nan koasoandi en pwopwoudte me emen kak kaitarala eh ineng ong wia nsenen pwopwoud. Nan  koasoandi wet, met kak wia utupen nsenamwahu. (Lepin Padahk 5:18) Mendahki ma emen me kiripw dauliher eh ahnsoun pwulopwul me ineng en wia nsenen pwopwoud kin tepin kehlailla, e kakete apwalki kaunda eh ineng wet. Ma e sohte kaunda eh ineng wet, met kak kahrehiong ih en lohdiong tiahk kan me samin de sohte konehng. Pohl ntingihdi kaweid wet ong me kiripw kan: “Ma re sohte kak kaunda ar ineng kan en nan pwopwoud, a re en pwopwoudida; pwe pwopwoudida mwahu sang mwasimwasingki engin ineng suwed kan.”​—1 Korint 7:9; Seims 1:15.

8 Sohte lipilipil ia kahrepen emen pahn pwopwoudida, e anahne wehwehki ire mehlel wet. Duwehte Pohl kasalehda, irail me pahn pwopwoud “pahn kin diar apwal tohto nan arail pwopwoud.” (1 Korint 7:28) Me pwopwoud kan kin lelohng kahpwal kan me irail me kiripw kan sohte kin lelohng. Eri, ma ke pahn pwopwoud, ia duwen omw kak katikala kahpwal kan oh kalaudehla omw nsenamwahu? Ehu ahl iei en pilada emen me konehng en wia omw pwoud.

IHS ME KONEHNG EN WIAHLA OMW PWOUD?

9, 10. (a) Ia duwen Pohl eh karasahda keperpen en patehng irail me sohte kin papah Siohwa? (b) Dahme kin kalapw wiawihong irail kan me pohnsehsehla sapwellimen Koht kaweid duwen pwoudiki emen me sohte kin papah Siohwa?

9 Pohl ntingihdi kaweid kesempwal ehu me emen kak doadoahngki ni ahnsou me e pahn pilada eh pwoud: “Kumwail dehr mi pahn mehn wisik ehu rehn me seupwoson kan.” (2 Korint 6:14NW) Eh mehn karasaras wet kin kohsang doadoahk en soumwet kan. Ma mahn riemen me uhdahn wekpeseng ni kehl oh paliwar kin  mi pahn mehn wisik ehu oh doadoahkpene, ira koaros pahn ahneki kahpwal. Duwehte met, ma emen Kristian pahn pwoudiki emen me kaidehn Kristian, ira pahn lelohng kahpwal kan. Ma emen men dadaurete ni sapwellimen Siohwa limpoak ahpw meteio sohte kin nsenohki, met pahn kahrehda nsensuwed pwehki dahme ira kin kesempwalki nan ara mour wekpeseng. Ihme kahrehda Pohl kangoange Kristian akan en pwoudikihte iengerail Kristian akan.​—1 Korint 7:39.

10 Ekei Kristian kiripw kan kin medemedewe me en pwoudikihda emen me kaidehn iengerail Kristian pahn mwahusang ar kin sangat. Ekei pilada en pohnsehsehla kaweid en Paipel oh pwoudikihda emen me sohte kin papah Siohwa. Ahpw re kin kalapw lelohng imwila suwed kan. Re kin diarada me re sohte kak ehukihong arail pwoud dahme keieu kesempwal nan arail mour. Kahpwal wet pahn kak suwedsang kahpwal me re kin ahneki mwohn re pwopwoudida. Ahpw mie Kristian kiripw tohto me kin likih oh loalopwoat ong sapwellimen Koht kaweid me pid ire wet. (Wadek Melkahka 32:8.) Re kin koapworopworki me re pahn pwopwoud ehu rahn, ahpw re sohte pahn pwopwoud lao re diarada emen me kin kaudokiong Siohwa Koht.

11. Dahme kak seweseiuk en pilada ni pwung omw pwoud? (Pil menlau kilang koakon “ Soangen Aramas Dahmen me I Men Pwoudiki?”)

11 Mehlel, kaidehn sapwellimen Siohwa ladu koaros kak wia emen me konehng ken pwoudiki. Ma ke kin medemedewe duwen pwopwoud, rapahki emen me ahneki irair kan oh mehn akadei kan me duwehte ahmw oh me kin poakohng Koht duwehte omw kin poakohng Ih. Ladu lelepek oh loalokong kin kihda kaweid tohto duwen ire wet, oh e mwahu ken kapakapki oh  doudouloale duwen kaweid pwukat me kohsang nan Paipel oh kapwaiada ni omw wiahda pilipil kesempwal wet. *​—Wadek Melkahka 119:105.

12. Soangen tiahk dahieu mie me pid duwen pwopwoud nan sahpw tohto? Mehnia karasepe nan Paipel kak sawas?

12 Nan sahpw tohto, pahpa oh nohno kan kin pilada ihs me neirail seri kan pahn pwoudiki. Nan sahpw pwukat, me tohto kin pwungki me pahpa oh nohno kin ahneki erpit oh koahiek pwehn wiahda pilipil kesempwal wet. Duwehte ahnsoun Paipel kan, koasoandi wet kin kalapw pweida mwahu. Mehn kahlemeng en Eipraam ni ahnsou me e kadarala nah lidu pwehn diarada ahn Aisek pwoud kak sewese pahpa oh nohno kan nan sahpw pwukat. Eipraam sohte kesempwalki mwohni oh ndand. Ahpw e wia uwen eh kak en diarada ahn Aisek pwoud nanpwungen aramas akan me kin kaudokiong Siohwa. *​—Senesis 24:3, 67.

IA DUWEN OMW KAK KAUNOPADA PWE OMW PWOPWOUD EN PWEIDA?

13-15. (a) Ia duwen mouren kaweid en Lepin Padahk 24:27 eh kak sewese ohl pwulopwul men me kin medemedewe en pwopwoud? (b) Dahme lih pwulopwul men kak wia pwehn kaunopada ong pwopwoud?

13 Ma ke kin medemedewe en pwopwoud, e mwahu ken idek rehmw peidek wet, ‘I kakehr pwopwoud?’ Met  sohte kin pidadahte omw pepehm kan duwen limpoak, nsenen pwopwoud, ahneki kompoakpahmw de apwalih seri. Mie mehn akadei kan me ke anahne medewe nin duwen emen me pahn wiahla ohl pwopwoud de lih pwopwoud men.

14 Ohl pwulopwul men me men pwopwoud anahne medemedewe kanahieng mouren kaweid wet: “Ke dehr kauwada imwomw oh koasoanehdi loale, ke lao kaunopada omw mwaht akan nan sapwomw, oh ke wehwehkihier me ke kakehr mour sang loale.” (Lepin Padahk 24:27) Dahme ire wet kasalehda? Nan mwehin Paipel, ma ohl emen men pwopwoudida oh ahneki peneinei, e anahne pein idek reh, ‘I kakehr apwalih ei pwoud oh seri kan?’ E anahne doadoahk mahs oh apwalih sapwe oh wahn sahpw kan. Mouren kaweid wet pil kin kadoadoahk rahnwet. Ohl emen me men pwopwoud anahne kaunopada pwehn apwalih eh pwukoa kan. Ma paliwere kak mweidohng, e anahne doadoahk. Mahsen en Koht kin kasalehda me ohl emen me sohte kin apwalih eh peneinei ong arail anahn en paliwar oh pepehm oh sohte kin sewese irail en ahneki nanpwungmwahu rehn Koht kin suwedsang emen me sohte eh pwoson!​—Wadek 1 Timoty 5:8.

15 Pil duwehte, ma lih emen pilada en pwopwoud, met wehwehki me e pwungki ale oh kapwaiada soangsoangen pwukoa kesempwal kan. Paipel kin kapingahki koahiek kan oh irair kan me lih pwopwoud men anahne pwehn sewese eh pwoud oh apwalih eh peneinei. (Lepin Padahk 31:10-31) Ohl oh lih akan me sohte kaunopada mwahu en ale oh apwalih arail pwukoa kan oh mwadang pwopwoudida kin roporop ong pein irail oh sohte kin medewe dahme re pahn kak wia ong arail pwoud. Ahpw me keieu kesempwal, iei, irail kan me kin  medemedewe en pwopwoud anahne ese ia duwen arail kak doadoahngki kaweid kan oh ire mehlel kan sang rehn Koht nan arail mouren pwopwoud.

16, 17. Mehnia kaweid kan oh ire mehlel kan en Paipel me irail kan me kin kaukaunop ong pwopwoud anahne medemedewe?

16 En kaunopada ong pwopwoud kin pidada en medemedewe duwen pwukoa kan me Koht ketikihong ohl pwopwoud men oh lih pwopwoud men. Ohl men anahne ese ia wehwehn en wia tapwin peneineien Kristian ehu. Pwukoa wet sohte kin mweidohng ih en wia kaun lemei men. Ahpw e anahne kahlemengih ia duwen Sises eh kin ketin wia tapwi men. (Episos 5:23) Kristian lih emen pil anahne wehwehki pwukoa kesempwal en lih pwopwoud men. Ia duwe, e pahn perenki uhpahiong “kosonned” en eh pwoud? (Rom 7:2) Liho kin miher pahn kosonned en Siohwa oh Krais. (Kalesia 6:2) Manaman en eh pwoud nan peneinei pil kin wia ehu kosonned ong liho. Ia duwe, liho kak utung oh uhpah manaman en ohl soh unsek men? Ma liho pahn apwalki met, eri e mwahu en dehr pwopwoudida.

17 Patehng met, emenemen anahne kaunopada en apwalih soangen anahn tohrohr kan en eh pwoud. (Wadek Pilipai 2:4.) Pohl ntingihdi: “Emenemen ohl pwopwoud en poakohng eh werek duwehte eh kin poakohng pein ih, oh emenemen lih pwopwoud en wauneki eh pwoud.” Koht ketin kamwakid Pohl en wehwehki me ohl emen anahne pehm me eh pwoud kin uhdahn wauneki ih. Oh lih emen anahne pehm me eh pwoud kin uhdahn poakohng ih.​—Episos 5:21-33.

Me tohto kin koasoanehdi en dehr kelehpwla ni arail kin kapehseiong emen me re men pwoudiki

18. Dahme kahrehda ohl emen oh lih emen anahne kanahieng ara tiahk ni ahnsou me ira kin pehsepene?

18 Eri, ahnsou me ohl emen oh lih emen kin pehsepene,  met kaidehn ahnsoun kaperente. E wia ahnsou ehu me ira pahn esehla emenemen oh kilang ma konehng ira en pwopwoudida. E pil wia ahnsou ehu en kanahieng ara wiewia kan! Ineng en wendipene kak inenen kehlail pwehki e kin wia ahnepen aramas. Ma ira kin uhdahn limpoakpene, ira pahn liksang wiewia kan me kak kauwehla ahn emenemen nanpwungmwahu rehn Koht. (1 Deselonika 4:6) Eri, ma ke kin kapehseiong emen me ke men pwoudiki, kaunda omw  ineng kan. Sohte lipilipil ma ke pahn pwopwoudida de soh, irair wet pahn wia kamwahupomw erein omw mour.

DAHME KE KAK WIA PWE OMW MOUREN PWOPWOUD EN KAK DADAURETE?

19, 20. Ia duwen en Kristian eh madamadau duwen pwopwoud eh kin weksang madamadau en aramas tohto rahnwet? Menlau kihda ehu karasaras.

19 Pwe pwopwoud ehu en kak dadaurete, ira anahne ahneki madamadau pwung duwen inoun pwopwoud. Pwuhk kan oh kasdo kan kin kasalehda kapwopwoud nin duwen imwila mwahu me koaros kin perenki. Ahpw ni mehlel, kapwopwoud kaidehn imwilahn mehkot, ahpw e wia tepin mouren peneinei me Siohwa ketin koasoanehdi pwehn kak dadaurete. (Senesis 2:24) Aramas tohto sohte ahneki soangen madamadau wet. Nan ekei sahpw, aramas akan kin koasoia me pwopwoud kin duwehte soangen wiepen pirapir ehu ong sahl rioapwoat. Mwein re sohte kin medewe me karasaras wet kin kasalehda mwahu dahme aramas tohto kin medewe duwen pwopwoud. Ia duwen? Wiepen pirapir wet kin kak teng erein anahnepe mie, ahpw wiepe wet pil anahne en mengei en pirapirepene oh sapwadekpeseng.

20 Aramas tohto rahnwet wiahki pwopwoud koasoandi ehu ong ahnsou mwotomwotte. Re kin mwadangete pwopwoudida pwehn kaitarala arail anahn kan, ahpw re kin lemeleme me re kak mwadang tangasang mouren pwopwoud ma kahpwal kan pahn pwarada. Ahpw tamataman karasaras en Paipel me pid duwen sahl silipwoat me patpene. Sahl kan me sohp kan kin doadoahngki kin wiawihda pwehn werei oh sohte pahn  kak mweipeseng de sapwedekpeseng ni ahnsou me melimel laud pahn wiawi. Duwehte met, Koht ketin koasoanehdi pwopwoud ehu en kak dadaurete. Tamataman me Sises mahsanih: “Kaleke aramas de kamweidpeseng me Koht ketin kapatapenehr.” (Madiu 19:6) Ma ke pahn pwopwoudida, ke anahne ahneki soangen madamadau wet. Ia duwe, soangen inou wet pahn kahrehiong mouren pwopwoud en wiahla mehn katoutou ehu? Soh.

21. Soangen madamadau dahieu me ohl pwopwoud men oh lih pwopwoud men anahne ahneki ong emenemen? Dahme kak sewese ira en wia met?

21 Ohl pwopwoud men oh lih pwopwoud men anahne ahneki madamadau pwung ong emenemen. Ma emenemen kin nantihong en kilang irair mwahu en meteio oh dahme e kin nantihong wia, mouren pwopwoud pahn kaperen oh nsenamwahu. Ia duwe, e pahn uhdahn apwal en kilang irair mwahu en emen me sohte unsek? Siohwa sohte kin ketin kasik dahme emen sohte kak wia. Ahpw kitail kak koapworopworki me e kin ketin tehk atail irair mwahu kan. Sounmelkahka men patohwanohng Siohwa: “Ma komw pahn ketin kilelehdi dipat akan, ihs me kak pitsang sapwellimomwi kadeik?” (Melkahka 130:3) Ohl pwopwoud kan oh lih pwopwoud kan anahne ahneki soangen madamadauohte oh en kin mahkpene nanpwungarail.​—Wadek Kolose 3:13.

22, 23. Ia duwen Eipraam oh Sara ara wia mehn kahlemeng mwahu ong pwopwoud kan en rahnpwukat?

22 Pwopwoud kak wahdo nsenamwahu laud ni eh pahn dadaur sounpar tohto. Paipel kasalehda ahn Eipraam oh Sara mouren pwopwoud ni ahnsou me ira mahla. Ara mour sohte mengei pwe ira pil kin lelohng kahpwal kan. Nna medewehla mwomwen Sara me mahkier  sounpar 60 samwa me kohkohlahsang imwe ihmw kaselel nan kahnimw kepwehpwe Ur oh tepida kousoan nan impwal lao lel eh mehla. Ahpw e kin uhpahiongete eh tapwi. E wia en Eipraam eh sounsawas mehlel men. E kin wauneki oh sewese en Eipraam eh koasoandi kan pwehn kak pweida. Sara sohte kin mwomwehdahte en uhpahiong eh pwoud. Mendahki e kin “mengimengloalki” duwen eh pwoud, ahpw e kin ekerki ih eh kaun. (Senesis 18:12; 1 Piter 3:6) Eh wauneki Eipraam kin kohsang nan eh mohngiong.

23 Met sohte wehwehki me Eipraam oh Sara kin pwungkipene soahng koaros. Mie pak me Sara kasalehda eh madamadau me “kapwunodehda kowahlap” Eipraam. Ahpw pwehki Siohwa ketin kaweid Eipraam, ih eri rong ni aktikitik dahme Sara nda oh met kahrehda imwila mwahu ong ara peneinei. (Senesis 21:9-13) Ohl pwopwoud oh lih pwopwoud kan koaros en rahnpwukat iangahki irail me kin wereila pwopwoud kak alasang pwopwoud wet me kin lemmwiki Koht.

24. Soangen mouren pwopwoud dah kak kawauwih Siohwa Koht, oh dahme kahrehda?

24 Nan mwomwohdisohn Kristian, mie pwopwoud tohto me kin nsenamwahu. Liho kin wauneki eh pwoud oh ohlo kin poakohng oh wauneki eh pwoud. Ira koaros kin ehupene pwehn mwohneki kapwaiada kupwuren Siohwa nan ara mour. Ma ke pilada en pwopwoud, ken pilada emen me konehng ken pwoudiki, kaunopada mwahu ong mouren pwopwoud, oh nantihong en wiahda mouren pwopwoud me meleilei oh limpoak pwe met pahn kawauwih Siohwa Koht. Ma ke pahn wia mepwukat, omw mouren pwopwoud pahn sewese iuk en dadaurete ni limpoak en Koht.

^ par. 11 Menlau kilang irelaud 2 en Pwuhken Sawas ong Nsenamwahu en Peneinei, me Sounkadehdehn Siohwa kan wiahda.

^ par. 12 Ekei pahpa kahlap en mehn Israel kan kin pwoudiki lih tohto sang emen. Siohwa Koht ketin mweidohng ohl pwukat oh mehn Israel kan en wia tiahk wet. Siohwa sohte ketikihda tiahk wet, ahpw e ketikihda kosonned pwehn apwalih tiahk wet me re tapihadahr. Ahpw, Kristian akan anahne tamataman me Siohwa solahr kin ketin mweidohng sapwellime tohnkaudok kan en wia tiahk wet.​—Madiu 19:9; 1 Timoty 3:2.