Luslahng audepe kan

luslahng audepe kan

 OARITIK KAN

Koaduhpwel​—Iahd oh Ia Kahrepe?

Koaduhpwel​—Iahd oh Ia Kahrepe?

Iahd me lih Kristian men anahne doadoahngki mehn koaduhpwel ni ahnsoun kaudok oh ia kahrepe? Kitail pahn tehkpene dahme wahnpoaron Pohl ntingihdi duwen ire wet. E kin kasalehda kaweid kan me kitail anahne pwehn wiahda pilipil mwahu kan me pahn kawauwih Koht. (1 Korint 11:3-16) Pohl kin kasalehda ire kesempwal siluh pwukat: (1) soangen wiewia kan me lih emen anahne doadoahngki mehn koaduhpwel, (2) soangen ahnsou kan me e anahne  koaduhpwel, oh (3) kahrepe kan me kin kamwakid ih en kapwaiada koasoandi wet.

Wiewia kan. Pohl kin koasoia soangen wiewia riau, iei kapakap oh kapahrengki rongamwahu. (Iretikitik 4, 5) Kapakap kin wia kisehn kaudok en patohong Siohwa. Rahnwet, en kapahrengki rongamwahu kin pidada padahngki padahk mehlel en Paipel me Kristian emen kin wia. Eri ia duwe, Pohl kin koasoia me lih emen anahne ahnsou koaros doadoahngki mehn koaduhpwel ni eh kin kapakap de padahngki padahk mehlel en Paipel? Soh. Soangen ahnsou kan me e kin kapakap de padahk pahn koasoanehdi ma e anahne doadoahngki mehn koaduhpwel de soh.

Ahnsou kan. Dahme Pohl koasoia kin kasalehda ahnsou riau me lih emen anahne koaduhpwel, iei nan peneinei oh nan mwomwohdiso. E koasoia: “Ohl pwopwoud eh moangen eh pwoud . . . A lih emen me kin kapakap nan pokon oh kapahrengki rongamwahu en Koht, e ahpw sohte koaduhpwel, e kin kihsang wahun eh pwoud.” (Iretikitik 3, 5) Nan koasoandi en peneinei ehu, Siohwa kin ketin koasoanehdi ohl pwopwoud men en wia tapwin eh pwoud. Ma liho sohte pahn kasalehda eh pohnese manaman en eh pwoud ni ahnsou me liho pahn wia pwukoa me Siohwa ketikihong ohlo, e pahn kihsang wahu en eh pwoud. Karasepe, ma liho anahne wia onop en Paipel ni ahnsou me eh pwoud kin mihmi wasao, e pahn kasalehda me e kin pohnese manaman en eh pwoud sang ni eh pahn doadoahngki mehn koaduhpwel. E pahn wia met sohte lipilipil ma eh pwoud papidaislahr de soh pwehki ih me tapwin peneinei. * Ma liho pahn kapakap de padahk mwohn nah pwutak pwulopwul men me papidaislahr, e pahn pil anahne koaduhpwel kaidehn pwehki pwutako me tapwin peneinei ahpw pwehki liho kin wauneki manaman me kohwong ohl akan me papidaislahr nan mwomwohdisohn Kristian.

 Pohl kin koasoia duwen wiewia kan nan mwomwohdiso: “Ma mehmen rehmwail men uhwong koasoandi wet, a en ese, pwe ih koasoandi wet me kiht oh mwomwohdiso kan en Koht kin dadaur ni ahnsoun kaudok.” (Iretikitik 16) Nan mwomwohdiso en Kristian, pwukoa en tapwi kin kohwong ohl akan me papidaislahr. (1 Timoty 2:11-14; Ipru 13:17) Ohl kante me kin wiahla elder kan oh sounsawas kan oh Koht kin ketikihong irail pwukoa kan pwehn apwalih sapwellime pelin sihpw. (Wiewia 20:28) Ahpw ekei pak, ele mie ahnsou kan me lih Kristian men kin anahne wia pwukoa ehu me ohl koahiek papidaislahr men kin pwukoahki. Karasepe, ele e pahn anahne wia tuhpenehn kalohk pwehki ohl koahiek papidaislahr men sohte mie. De mwein e pahn wia ehu onop en Paipel rehn emen oh ohl papidaislahr men pahn iang onopo. * Pwehki wiewia pwukat kin wia kisehn doadoahk en mwomwohdiso en Kristian, e pahn koaduhpwel pwehn kasalehda me e kin wia pwukoa ehu me kin kohwong ohl men.

Ahpw mie wiewia tohto nan kaudok me lih Kristian men sohte anahne koaduhpwel. Karasepe, e sohte anahne koaduhpwel ni ahnsou me e kin wia pasapeng nan mihting en Kristian akan, iang eh pwoud de ohl papidaislahr men nan kalohk en ihmw lel ihmw, de onop oh kapakap rehn nah seri kan me saikinte papidais ma eh pwoud sohte kin mihmi wasao. Ma mie ekei peidek kan pahn pwarada oh ma sister men sohte wehwehki ire pwukat, e kak wia roporop pwehn rapahki  pasapeng kan. * Ma sistero saikinte wehwehki dahme konehng en wia oh kadeikpen loale kin kamwakid ih en doadoahngki mehn koaduhpwel, met sohte sapwung, duwehte me sansalda nan kilelo.

Kahrepe kan. Iretikitik 10 kin kasalehda kahrepe riau me lih Kristian men en kapwaiada koasoandi wet: “Pwehki tohnleng kan, lih akan uhdahn pahn koaduhpwelki kilel en manaman ehu.” Keieu, tehk mahsen pwukat, “kilel en manaman ehu.” En doadoahngki mehn koaduhpwel iei ehu ahl me lih emen kin kak kasalehda eh kin pohnese manaman me Siohwa kin ketikihong ohl papidaislahr kan nan mwomwohdiso. Ni ahl wet, e kin kasalehda eh limpoak oh lelepek ong Siohwa Koht. Kahrepe keriau kin dierek nan mahsen pwukat, “pwehki tohnleng kan.” Ia duwen lih emen eh kin kamwakid ngehn kehlail pwukat sang ni eh kin doadoahngki mehn koaduhpwel?

Tohnleng kan kin perenki kilang me koaros nan sapwellimen Siohwa pwihn nanleng oh sampah kin wauneki sapwellime manaman en kaunda. Irail pil kin paiekihda mehn kahlemeng mwahu en aramas soh unsek kan pwehki irail tohnleng kan pil anahne uhpah sapwellimen Siohwa koasoandi kan. Mahs mie tohnleng tohto me sohte kasalehda met. (Sud 6) Ele lih Kristian men kin koahiek, esehla padahk mehlel oh loalokong sang ohl papidaislahr men nan mwomwohdiso, ahpw liho kin kasalehda eh kin uhpah en ohlo eh manaman, oh tohnleng kan kin kilikilang met. Liho kakete wia Kristian keidi men me pahn iang Krais ehu rahn. E pahn ahneki pwukoa ehu me ileilehsang en tohnleng kan ar pwukoa kan, oh e pahn iang Krais kakaun nanleng. Ia uwen met eh wia mehn kahlemeng kaselel ong tohnleng kan! Mehlel, lih Kristian koaros kin ahneki pwais kaselel ehu en kasalehda arail aktikitik oh peik sang ni arail lelepek oh uhpah mwohn tohnleng lelepek rar kei!

^ par. 3 Lih Kristian men sohte kin kapakap ni ngihl laud mwohn eh pwoud Kristian. Ahpw ele e pahn wia met ma ohlo ahneki kahpwal kan me duwehte e sohte kak lokaia pwehki soumwahu.

^ par. 1 Sister men sohte anahne doadoahngki mehn koaduhpwel ni ahnsou me e wia onop en Paipel me koasoandier ma emen sounkalohk ohl men me saikinte papidais oh kaidehn eh pwoud me iang ih nan onopo.

^ par. 2 Pwehn kalaudehla omw wehwehki duwen ire wet, menlau kilang Kahn Iroir en February 1, 2015, pali 31; Kahn Iroir (lokaiahn wai) en July 15, 2002, pali 26-27; oh February 15, 1977, pali 125-128.