Luslahng audepe kan

luslahng audepe kan

 IRELAUD 15

Diar Nsenamwahu nan Omw Doadoahk

Diar Nsenamwahu nan Omw Doadoahk

“Kitail koaros eri en kin . . . nsenamwahuki wahn atail doadoahk.”​—EKLESIASDES 3:13.

1-3. (a) Ia pepehm en aramas tohto duwen arail doadoahk? (b) Soangen madamadau dahieu ong doadoahk me Paipel kin kangoange kitail en ahneki? Peidek dah kan me kitail pahn tehkpene nan irelaud wet?

ONG aramas tohto rahnwet, doadoahk sohte kin wia mehkot kaperen. Pwehki re kin wia doadoahk ehu me re sohte perenki me doadoahngkihla ahnsou laud nan ehuehu rahn, re sohte kin men kohla doadoahk. Ia duwen arail kak wekidala arail madamadau oh diarada nsenamwahu nan arail doadoahk kan?

2 Paipel kin kangoangehki kitail en ahneki madamadau pwung ong atail doadoahk kan. E mahsanih me doadoahk oh wahn doadoahk kan kin wia kapai ehu. Solomon ntingihdi: “Kitail koaros eri en kin mwenge oh nim, oh nsenamwahuki wahn atail doadoahk, pwe met sang ni kalahngan en Koht.” (Eklesiasdes 3:13) Siohwa kin ketin poakohng kitail oh kupwurki dahme keieu mwahu ong kitail, oh e kupwurki kitail en kin nsenamwahuki atail doadoahk oh perenki wahn atail doadoahk. Pwehn dadaurete ni sapwellime limpoak, kitail anahne mourki mour me pahrekiong sapwellime madamadau oh kaweid kan me pid duwen doadoahk.​—Wadek Eklesiasdes 2:24; 5:18.

3 Nan irelaud wet, kitail pahn tehkpene peidek pahieu pwukat: Ia duwen atail kak nsenamwahuki atail doadoahk laud? Soangen doadoahk dah kan me sohte  konehng Kristian mehlel kan en wia? Ia duwen atail kak toupahrek me pid duwen atail doadoahk en mwohni oh atail kaudok? Doadoahk dahieu me keieu kesempwal kitail en wia? Ahpw kitail pahn tehkpene mahs mehn kahlemeng en Siohwa Koht oh Sises Krais me kin ketin keieu doadoahk laud.

IH ME KIN KEIEU DOADOAHK LAUD OH SAPWELLIME SOUNSAWAS

4, 5. Ia duwen Paipel eh kin kasalehda me Siohwa kin ketin doadoahk laud?

4 Siohwa me kin ketin keieu doadoahk laud. Senesis 1:1 mahsanih: “Koht tepin kapikada sampah oh mehkoaros me mi pahnlahng.” Ni ahnsou me Koht ketin kaimwisekala sapwellime doadoahk en kapikada audepen sampah, e “inenen kupwurperenkihda wiepen nin lime pwukat koaros.” (Senesis 1:31) Ei, e inenen kupwurperenkihda sapwellime doadoahk koaros ong sampah. Siohwa iei “Koht en peren” oh e kupwurperenkihda eh kin ketin wia sapwellime doadoahk.​—1 Timoty 1:11, NW.

5 Koht pwerisek menet sohte ketin uhdihsang sapwellime doadoahk. Ahnsou reirei mwurin Siohwa ketin kaimwisekala sapwellime doadoahk en kapikada audepen sampah koaros, Sises mahsanih: “Semei kin ketin doadoahk ahnsou koaros.” (Sohn 5:17) Dahme Semeo kin ketin wiewia? Sang nanleng, e kin ketin kaukaweid oh apwahpwalih aramas akan. Siohwa ketin doadoahngki sapwellime manaman pwehn kasapwilada ekei aramas en wiahla “aramas kapw,” iei Kristian me keidi kan me pahn iang Sises kaunda sang nanleng. (2 Korint 5:17) E kin ketin doadoahk pwe kupwure ong aramas akan en kak pweida pwe irail akan me kin poakohng ih en kak paiekihda mour soutuk nan sampah kapw. (Rom 6:23) Siohwa kin kupwurperenkihda mehlel pweidahn sapwellime  doadoahk wet. Aramas rar kei mwekidkier rongamwahu en Wehio. Koht kin ketin kahreiraildohng reh oh irail kin wekidala arail mour pwe ren kak dadaurete ni sapwellime limpoak.​—Sohn 6:44.

6, 7. Ia duwen Sises eh kin ketin doadoahk laud sangete mahs?

6 Sangete mahs, Sises kin ketin doadoahk laud. Mwohn eh ketidihdo sampah oh wia aramasala, e kin ketin papah Koht nin duwen sapwellime “sounsawas emen” ni kepikipikdahn soahng koaros me “mi nanleng oh sampah.” (Lepin Padahk 8:22-31; Kolose 1:15-17) Ni ahnsou me e ketiket sampah, Sises pil kin ketin doadoahk laud. Sang ni eh pwulopwul, e ketin sukuhlki doadoahk en kauwada ihmw, oh aramas kin esehkin ih nin duwen “kapinteo.” * (Mark 6:3) Doadoahk wet kin anahne doadoahk laud oh soangsoangen koahiek kan, ahpw mehlel nan soangen ahnsou ehu me sohte wasahn wiahda peniaida, sidohwa kan me kin netikihla soangen dipwisou en wiahda ihmw kan, oh dipwisoun doadoahk kan me kin doadoahngki lioal. Ia duwe, ke kak medewehla ni Sises eh pahn ketila rapahki tuhkehn wiahda ihmw kan, oh ketin pelehdi oh kapaikada tuhke pwukat oh ketikihla wasa me e pahn ketin doadoahk ie? Ke kak medewehla ni Sises eh kin ketin kauwada ihmw akan, wiahda rehu oh lohlo en ihmw kan, wenihmw kan, oh kepwehn nan ihmw kan? Sises uhdahn mwahngih nsenamwahu me kin kohsang doadoahngki eh koahiek oh doadoahk laud.

7 Sises uhdahn kin ketin pwerisek en wia doadoahk en kalohk. Erein sounpar siluh elep, e kin ketin pwerisek oh soupisengki doadoahk kesempwal wet. Pwehki e kupwurki  kalohk ong uwen tohtohn aramas me e kak, e kin ketin sangkenei en pirida ni menseng oh doadoahk laud lao lel nipwong. (Luk 21:37, 38; Sohn 3:2) E kin ketin seiloakseli “nan kahnimw oh nan kousapw akan, ketin kapakapahrengki Rongamwahu duwen Wehin Koht.” (Luk 8:1) Sises kin ketin sapalki mwail epwiki kei pohn ahl pwelpar kan pwehn kalohki rongamwahu ong aramas akan.

8, 9. Ia duwen Sises eh kin ketin nsenamwahuki eh doadoahk laud?

8 Ia duwe, Sises kin kupwurperenki doadoahk laud me e kin ketin wia nan kalohk? Ei, uhdahn! Ni karasaras, e kin ketin kamwerehdi weren padahk mehlel en Wehio oh kahrehda mwetuwelo en onopada ong dondol. Pwehki en wia sapwellimen Koht doadoahk kin kakehlaka Sises, e kin kupwurkihte en pousehla sapwellime doadoahk mendahki ma e saikinte konot. (Sohn 4:31-38) Nna medewehla ia uwen eh nsenamwahu ni ahnsou me e kak patohwanohng Semeo ni kaimwiseklahn sapwellime doadoahk nin sampah: “I kasaledahr sapwellimomwi lingan nin sampah; oh I kaimwisekalahr doadoahk kan me komw ketin kilelehiong ie.”​—Sohn 17:4.

9 Eri, e sansal me Siohwa oh Sises kin ketin wia mehn kahlemeng me keieu mwahu ong irail kan me men nsenamwahuki arail doadoahk laud. Atail limpoak ong Siohwa kin kamwakid kitail en “kahlemengih ih.” (Episos 5:1) Atail limpoak ong Sises kin kamwakid kitail en “idawehn oh kahlemengih” ih. (1 Piter 2:21) Eri, met kitail pahn tehkpene ia duwen atail kak nsenamwahuki atail doadoahk laud.

IA DUWEN ATAIL KAK DIAR NSENAMWAHU NAN ATAIL DOADOAHK

En kapwaiada kaweid kan oh ire mehlel kan en Paipel kak sewese iuk en diar nsenamwahu nan omw doadoahk laud

10, 11. Dahme kak sewese kitail en kakairada elen madamadau pwung ong atail doadoahk?

10 Doadoahk en mwohni kin wia kisehn mour en Kristian  mehlel kan. Kitail men ahneki nsenamwahu nan atail doadoahk, ahpw met kak inenen apwal ma kitail kin wia soangen doadoahk me kitail sohte perenki. Ia duwen atail kak diar nsenamwahu nan atail doadoahk nan soangen irair wet?

11 Kakairada elen madamadau pwung. Kitail sohte kak ahnsou koaros wekidala atail irair akan, ahpw kitail kak wekidala atail elen madamadau. En doudouloale duwen sapwellimen Koht madamadau kak sewese kitail en kakairada elen madamadau pwung duwen doadoahk. Karasepe, ma ke wia tapwin ehu peneinei, medemedewe me mendahki ma omw doadoahk sohte kin kaperen, doadoahko kin sewese iuk en kihong omw peneinei arail anahn akan. Omw kin apwalih omw peneinei kaidehn mehkot tikitik mwohn silangin Koht. Paipel mahsanih me emen me sohte kin apwalih eh peneinei kin “suwedsang irail kan me sohte arail pwoson.” (1 Timoty 5:8) Ma ke pahn tamataman me omw doadoahk kin sewese iuk en kapwaiada omw pwukoa me Koht ketikihong uhk, met pahn kak sewese iuk en diar nsenamwahu oh kahrepe mwahu ken wia doadoahk wet. Iengomw tohndoadoahk kan ele sohte kin ahneki met.

12. Dahme kahrehda en kin pwerisek oh mehlel nan atail doadoahk kin katapan?

12 En kin pwerisek oh mehlel. En doadoahk laud oh esehla ia duwen atail kak wia doadoahk mwahu kak wahdo kapai kan. Kaunen doadoahk kan kin kalapw kesempwalki tohndoadoahk kan me kin pwerisek oh koahiek. (Lepin Padahk 12:24; 22:29) Nin duwen Kristian mehlel kan, kitail anahne mehlel nan atail doadoahk. Kitail en dehr pirapahla mwohni, kepwe kan de ahnsoun doadoahk sang atail kaunen doadoahk. (Episos 4:28) Nan irelaud en mwowe, kitail sukuhlkier me en kin mehlel  me katapan. Kaun en doadoahk kin likih tohndoadoahk men me kin mehlel. Mehnda ma atail kaun kin tehk atail doadoahk laud de soh, kitail kak ahneki nsenamwahu pwehki ‘kapehditail me uhdahn mwakelekel’ oh kitail kin ese me kitail kin kaperenda Koht me kitail poakohng.​—Ipru 13:18; Kolose 3:22-24.

13. Atail wiewia mwahu kan nan atail wasahn doadoahk ele pahn kak imwikihla dah?

13 En kin tamataman me atail wiewia kan kin kak kalinganahda Koht. Ma kitail kin kolokol tiahk mwahu nin duwen Kristian nan atail wasahn doadoahk, meteikan pahn tehk met. Dahme met pahn imwikihla? Aramas akan me kin kilang atail wiewia kan pahn “kapingahki atail padahk duwen Koht, atail Sounkomour.” (Taitus 2:9, 10) Ei, atail wiewia mwahu kak kamwakid meteikan en kilang kamwahu kan en atail kaudok oh perenki duwen atail kaudok. Nna medewehla mwomwen omw pepehm ma emen iengomw tohndoadoahk pahn men esehla padahk mehlel pwehki omw wiewia mwahu kan nan wasahn doadoahk! Ahpw laudsang met, medemedewe duwen met: Mie mehkot mwahu sang omw kin ese me omw wiewia mwahu kan kin kalinganahda Siohwa oh kaperenda ih?​—Wadek Lepin Padahk 27:11; 1 Piter 2:12.

DOADOAHNGKI KOAHIEK EN KASAWIHADA IRAIR KAN MWOHN ATAIL PAHN PILADA EHU DOADOAHK

14-16. Ni ahnsou me kitail pahn pilada doadoahk ehu, mehnia peidek kan me kitail anahne medemedewe?

14 Paipel sohte kin kasalehda ni oaritik mehnia doadoahk me konehng en ale oh mehnia me sohte konehng. Ahpw met sohte wehwehki me kitail kak ale soangsoangen  doadoahk sohte lipilipil. Paipel kak sewese kitail en pilada doadoahk mwahu me pahn kaperenda Koht oh liksang soangen doadoahk me pahn kansensuwedihala ih. (Lepin Padahk 2:6) Ahnsou me kitail pahn anahne wiahda pilipil kan duwen doadoahk, kitail kak idek rehtail peidek kesempwal riau pwukat.

15 Ia duwe, en wia doadoahk wet pahn kahrehiong kitail en wia dahme Paipel mahsanih en dehr wia? Mahsen en Koht kin kasalehda me en pirap, likamw, oh wiahda dikedik en eni kan me sapwung. (Eksodus 20:4; Wiewia 15:29; Episos 4:28; Kaudiahl 21:8) Kitail pahn  liksang soangen doadoahk me pahn kahrehiong kitail en wia soahng pwukat. Atail limpoak ong Siohwa sohte pahn mweidohng kitail en ale doadoahk ehu me pahn kauwehla sapwellimen Koht kehkehlik kan.​—Wadek 1 Sohn 5:3.

16 Ia duwe, en wia doadoahk wet pahn kahrehiong kitail en iang pidada de utung wiewia suwed kan? Nna medewehla karasaras wet. En wia sounsawas men nan ohpis ehu sohte kin sapwung. Ahpw, ia duwen en wia sounsawas men nan ohpis ehu me kin alehda de kihda nta? Nan eh doadoahko, e sohte pahn uhdahn anahne wia doken nta. Ahpw ia duwe, eh kin kaukaule wia doadoahko wasao sou pahn utung doken nta, wiewia ehu me kin uhwong Mahsen en Koht? (Wiewia 15:29) Pwehki kitail kin poakohng Siohwa, kitail sohte men iang pidada wiewia kan me kin uhwong Paipel.

17. (a) Ire dah kan me kitail kak medewe ni ahnsou me kitail pahn wiahda pilipil kan me pid doadoahk? (Menlau kilang koakon “ Konehng Ien Ale Doadoahk Wet?”) (b) Ia duwen kadeikpen loalatail eh kak sewese kitail en wiahda pilipil kan me pahn kaperenda Koht?

17 Kitail kak diarada pasapengpen peidek tohto me pid doadoahk sang ni atail kin tehk kanahieng peidek riau pwukat me kohda nan parakrap 15 oh 16. Oh pil mie ire teikan me kitail anahne medemedewe mwahu ni ahnsou me kitail pahn wiahda pilipil kan duwen doadoahk. * Kitail sohte kak kasik me ladu lelepek oh loalokong pahn koasoanehdi koasoandi kan me pahn kak pid irair koaros me pahn kak pwarada. Ih ahnsou me kitail anahne doadoahngki atail koahiek en kasawihada oh dehdehki irair kan. Nan Irelaud 2, kitail sukuhlkier me kitail anahne  kasukuhlih oh kaiahne kadeikpen loalatail sang ni atail kin sukuhlki ia duwen atail pahn doadoahngki Mahsen en Koht nan atail mour ehuehu rahn. Ni atail pahn “ahnlahr oh eselahr wekpeseng en me mwahu oh me suwed,” kadeikpen loalatail pahn kak sewese kitail en wiahda pilipil kan me pahn kaperenda Koht oh pahn sewese kitail en dadaurete ni sapwellime limpoak.​—Ipru 5:14.

 KOLOKOL MADAMADAU TOUPAHREK ONG DOADOAHK

18. Dahme kahrehda e sohte mengei en kolokol atail toupahrek?

18 E sohte mengei en kolokol atail toupahrek nan “ahnsou apwal ekei ni imwin rahn akan.” (2 Timoty 3:1) En diarada oh kolokol doadoahk ehu kak wia mehkot apwal. Nin duwen Kristian mehlel kan, kitail wehwehki kesempwalpen en doadoahk laud pwehn apwalih atail peneinei. Ahpw ma kitail sohte kin kanahieng, kasongosong kan nan atail wasahn doadoahk de madamadau en noahrok kepwe nan sampah wet kak kedirepwa atail wiewia kan me kin pid atail kaudok ong Koht. (1 Timoty 6:9, 10) Kitail pahn tehkpene ia duwen atail kak kolokol madamadau toupahrek oh pilada “dahme keieu mwahu [kesempwal, NW].”​—Pilipai 1:10.

19. Dahme kahrehda Siohwa ketin warohng kitail en likih ih ni unsek? Dahme atail kin likih Siohwa kak sewese kitail en liksang?

 19 Likih Siohwa ni unsek. (Wadek Lepin Padahk 3:5, 6.) E sou warohng kitail en likih ih ni unsek? Uhdahn, pwehki ih me kin ketin apwahpwalih kitail. (1 Piter 5:7) E mwahngih atail anahn akan laudsang kitail, oh e kin ketin ahnsou koaros sewese kitail. (Melkahka 37:25) Kahrehda, e konehng kitail en rong sapwellime Mahsen ni eh katamankin kitail: “Kumwail dehr noahroke mwohni, ahpw kumwail nsenamwahukihte dahme kumwail ahneki. Pwe Koht mahsanih: ‘I sohte pahn mweisang uhk; I sohte pahn keseiukala.’” (Ipru 13:5) Me tohto me kin doadoahngki pali laud en ar ahnsou ong papah Koht kak kadehde me E kak ketin apwalih atail anahn akan. Ma kitail uhdahn likih me Siohwa pahn ketin apwalih kitail, kitail pahn liksang en nohn pwunodki ma kitail kak apwalih atail peneinei. (Madiu 6:25-32) Kitail sohte pahn mweidohng doadoahk en mwohni en kahrehiong kitail en soukautihla nan atail doadoahk kan me pid atail kaudok, me duwehte en kalohki rongamwahu oh en iang towehda mihting kan.​—Madiu 24:14; Ipru 10:24, 25.

20. Ia wehwehn kolokol pwoaren masatail en kin “mwakelekel”? Ia duwen omw kak kolokol soangen madamadau wet?

20 Medemedewehte en kapwaiada kupwuren Koht. (Wadek Madiu 6:22, 23.) Sises mahsanih me pwoaren masatail anahne en kin “mwakelekel.” Met wehwehki me kitail en dehr kedirepwkihla mehkan me sohte nohn kesempwal. Kristian emen anahne medemedewehte en kapwaiada kupwuren Koht. Ma kitail pahn wia met, kitail sohte pahn raparapahki soangen doadoahk me pweimwahu oh nannanti en kepwehpwehla. Kitail sohte pahn song en ale dipwisou kan me keieu kapw de keieu mwahu mendahki sounetinet kan kin song en kamehlelehiong kitail me kitail anahne soahng  pwukat pwehn ahneki nsenamwahu. Ia duwen omw kak medemedewehte en kapwaiada kupwuren Koht? Dehr wiahda pweipwand kan me ke sohte uhdahn anahne. Dehr ahneki dipwisou tohto me pahn kihsang omw ahnsou laud. Kapwaiada kaweid en Paipel me padahkihong kitail en itarki “kisin tungoal akan oh likou.” (1 Timoty 6:8) Wia uwen omw kak en kihsang soahng kan me sohte kesempwal nan omw mour.

21. Dahme kahrehda kitail anahne koasoanehdi dahme keieu kesempwal nan atail mour? Dahme kitail en keieu kesempwalki?

21 Koasoanehdi dahme keieu kesempwal nan omw mour oh kapwaiada. Pwehki kitail sohte kak wia soahng koaros me kitail men wia, kitail anahne koasoanehdi dahme keieu kesempwal nan atail mour. Ma kitail sohte pahn wia met, mehkan me sohte kesempwal pahn kauwehla atail ahnsou me kitail anahne doadoahngki ong mehkan me kesempwal. Eri, dahme pahn keieu kesempwal nan atail mour? Aramas tohto nan sampah wet kin inenen kesempwalki en ale sukuhl laud pwehn ale doadoahk me pweimwahu. Ahpw, Sises ketin padahkihong sapwellime tohnpadahk kan en “rapahki mahs Wehin Koht.” (Madiu 6:33) Ei, nin duwen Kristian mehlel kan, kitail kin mwohneki Wehin Koht nan atail mour. Mwomwen atail mour, me wehwehki atail pilipil kan, mehn akadei kan, oh wiewia kan me kitail kin kalapw wia, en kin kasalehda me kitail kin kesempwalki Wehio oh kupwuren Koht laudsang kepwe kan oh soahng teikan.

DOADOAHK LAUD NAN KALOHK

Kitail kak kasalehda atail limpoak ong Siohwa sang ni atail kin keieu kesempwalki doadoahk en kalohk

22, 23. (a) Mehnia doadoahk me keieu kesempwal ong Kristian mehlel kan? Ia duwen atail kak kasalehda me kitail kin kesempwalki doadoahk wet? (Menlau kilang koakon “ Ei Pilipil Wahdo Peren oh Nsenamwahu nan Ei Mour.”) (b) Dahme ke koasoanehdi teng en wia me pid duwen doadoahk en mwohni?

22 Pwehki kitail ese me imwin koasoandi en sampah  wet inenen kerendohr, kitail kin keieu kesempwalki doadoahk en Kristian mehlel akan, me iei doadoahk en kalohk oh katohnpadahk. (Madiu 24:14; 28:19, 20) Duwehte me kitail kin men kahlemengiho, Sises, kitail men soupisengki doadoahk wet me kak doarehla mour. Ia duwen atail kak kasalehda me kitail kin kesempwalki doadoahk wet? Pali laud en sapwellimen Koht aramas akan kin wia uwen arail kak koaros pwehn wia doadoahk en kalohk nin duwen sounkalohk kan nan mwomwohdiso. Ekei kin koasoanehdi arail koasoandi kan pwehn iang doadoahk en pioneer de misineri. Pwehki re kin ese kesempwalpen en wiahda mehn akadei kan me pid doadoahk ong Siohwa, pahpa oh nohno tohto kin kangoange neirail seri kan en akadei ong en kihong pali laud en ar ahnsou ong papah ih duwehte doadoahk en pioneer de doadoahk teikan. Ia duwe, sounkalohk kan me kin ngoangki kalohki Wehio kin diar nsenamwahu nan arail doadoahk laud? Ei, uhdahn! En papah Siohwa ni mour unsek iei elen mour me kin wahdo peren, nsenamwahu oh kapai tohto kan.​—Wadek Lepin Padahk 10:22.

23 Pali laud en kitail kin anahne doadoahngki ahnsou laud ehuehu rahn ong doadoahk en mwohni pwehn apwalih atail peneinei. Ahpw tamataman me Siohwa kupwurki kitail en diar nsenamwahu nan atail doadoahk. Ma atail elen madamadau oh wiewia kan kin pahrekiong sapwellime madamadau oh kaweid kan, kitail kak diar nsenamwahu nan atail doadoahk. Ahpw kitail en koasoanehdi teng en dehr mweidohng doadoahk en mwohni en kauwehla atail doadoahk me keieu kesempwal, iei doadoahk en kalohki rongamwahu en Wehin Koht. Sang ni atail kin keieu kesempwalki doadoahk wet nan atail mour, kitail kak kasalehda atail limpoak ong Siohwa oh kitail kak dadaurete ni sapwellime limpoak.

^ par. 6 Lepin lokaiahn Krihk me kawehwehdiong “kapinte” kin kalapw wehwehki “tohndoadoahk men me kin doadoahngki tuhke pwehn wiahda ihmw, kepwehn nan ihmw de soahng teikan me wiawihkihda tuhke.”

^ par. 17 Ong oaritik kan me pid duwen doadoahk, menlau kilang Kahn Iroir en June 1, 2006, pali 25-26, parakrap 11-13, Kahn Iroir (lokaiahn wai) en April 15, 1999, pali 28-30, oh July 15, 1982, pali 26.