Rongamwahu en Sohn 1:1-51
1 Nin tapio Mahseno mie,+ oh Mahseno kin patopato rehn Koht,+ oh Mahseno iei koht emen.*+
2 Memenet kin patopato rehn Koht nin tapio.
3 Koht ketin doadoahngki ih en ketin wiahda soahng koaros,+ oh sohte mwahn mehkot miehla me Koht sohte ketin doadoahngki ih en ketin wiahda.
Dahme Koht ketin wiahda
4 ni eh ketin doadoahngki ih iei mour, oh mour iei marain ong aramas.+
5 Oh maraino kin lingaling nan rotorot,+ ahpw rotoroto sohte kin powehdi.
6 Mie ohl emen me pekederdo me wia wiliepen Koht; ede Sohn.+
7 Ohl menet kohdo nin duwen sounkadehde men, pwe en kadehdehda duwen maraino,+ pwe soangen aramas koaros en kak kamehlele pwehki ih.*
8 Kaidehn ih me maraino,+ ahpw ih me pahn kadehdehda duwen maraino.
9 Marain mehlelo me kin kamarainih soangsoangen aramas koaros pahn kereniongehr kohdo nin sampah.+
10 E ketier nin sampah+ oh sampah miehla pwehki ih,+ ahpw sampah sohte ese ih.
11 E ketidohng sapwellime wasa, sapwellime aramas akan ahpw sohte kasamwo ih.
12 Ahpw e ketikihong koaros me kin kasamwo ih pwuhng en wiahla sapwellimen Koht seri,+ pwehki arail kin kasalehda arail pwoson mware.+
13 Oh irail ipwidi, kaidehn sang ni nta, de sang ni ineng en pahpa nohno de ineng en aramas, ahpw sang kupwuren Koht.+
14 Mahseno eri wia aramasala*+ oh ketiket rehtail, oh kitail kilangehr sapwellime lingan, lingan ehu me duwehte ahn iehros men+ sang rehn sahm men; e ahpw ketin direkihla kupwuramwahu* en Koht oh mehlel.
15 (Sohn kadehdehda duwen ih, ei, e kin liklikwer nda: “Ih aramaso met me I kin koasoia, ‘Me ketiketido mwurio tienglahr mwohi, pwe e ketiketier mwohi.’”)+
16 Kitail koaros kin alehsang reh kadek sapan me mwuledek, pwehki e me ketin diren kadek sapan.
17 Koht ketikihda Kosonnedo rehn Moses,+ ahpw sang rehn Sises Krais+ kadek sapan+ oh mehlel.
18 Sohte aramas emen me kilangehr Koht;+ pwe iehroso me duwehte koht men+ me kin patopato mpen Sahmo*+ iei ih me patohwan kawehwehdahr duwen Ih.+
19 Iet kadehde me Sohn wia ni mehn Suhs akan ar kadarala samworo kei oh mehn Lipai kei sang Serusalem pwe ren idek reh: “Ihs kowe?”+
20 E sapeng ni sansal, oh wehkada nda: “Kaidehn ngehi Krais.”
21 Re ahpw idek reh: “Eri dah? Kowe Elaisa?”+ E ahpw sapeng nda: “Kaidehn.” “Kowe Soukohpo?”+ E ahpw sapeng, nda: “Soh!”
22 Irail eri ndaiong: “A ihs kowe? Ndaiong kiht pwe sen kak sapengki irail ko me kadarkitodo. Dahme ke pahn ndahki duwen pein kowe?”
23 E ahpw nda: “Ngehi iei ngilen aramas emen me kin liklikwer nan sapwtehn, ‘Kainenehla elen Siohwa,’*+ nin duwen me soukohp Aiseia nda.”+
24 Eri irail ako me pekederdo kohsang rehn Parisi* ko.
25 Irail eri idek reh oh ndaiong: “Dahme kahrehda ke kin wia papidais ma kaidehn kowe Krais de Elaisa de Soukohpo?”
26 Sohn eri sapengkin irail: “I kin papidaiski pihl. Mie emen me mi nanpwungamwail me kumwail sehse,
27 me pahn ketido mwuri, oh I sohte warohng sapwadada selin sapwellime suht.”+
28 Mepwukat wiawiher nan Pedani palio Sordan, wasa me Sohn kin wiewia papidais ie.+
29 Mandahn rahno, e ahpw kilangada Sises eh ketiket kohdo reh, e ahpw patohwan: “Kilang, Sihmpwul+ en Kohto me kin ketikihsang dipen+ sampah!+
30 Ih aramaso met me I kin koasoia duwe: ‘Me ketiketido mwuri tienglahr mwohi, pwe e ketiketier mwohi.’+
31 Pein ngehi pil sohte ese ih, ahpw kahrepen ei kin papidaiski pihl iei pwehn kasalehda ih ni sansal ong Israel.”+
32 Sohn pil kadehdehda oh nda: “I kilangada ngehn sarawi* eh kohkohdi sang nanleng ni mwomwen mwuroi men oh e mihmi powe.+
33 Pein ngehi pil sohte ese ih, ahpw Mehmeno me ketin poaroneiehdo pwe I en papidaiski pihl, ketin mahsanihong ie: ‘Mehmen me ke pahn kilang ngehn sarawi* eh kohdi oh mihmi powe,+ iei ih me pahn kin papidaiski ngehn sarawi.’*+
34 Oh I kilangehr oh kadehdehier me iei ih sapwellimen Koht.”+
35 Pil mandahn rahno, Sohn kesikesihnen rehn nah tohnpadahk riemen,
36 oh ni eh kilenglahng Sises eh ketin alialu, e ahpw nda: “Kilang, Sihmpwul+ en Kohto!”
37 Ni tohnpadahk riemeno ara rong eh nda met, ira ahpw idawehnla Sises.
38 Sises eri ketin sohpeila oh mahsanihada ara ideidawehn, e ahpw mahsanihong ira: “Dahme kumwa raparapahki?” Ira eri patohwanohng: “Rapai (me wehwehki, “Sounpadahk”), ia wasa komw kin ketiket ie?”
39 E ahpw mahsanihong ira: “Kohdo, kumwa pahn kilang.” Ira eri kohla oh kilang wasa me e kin ketiket ieo, ira eri patopato reh rahno; ahnsowo mpen awa kaeisek.*
40 Emen ira iei Andru,+ rien Saimon Piter, me rong dahme Sohn nda oh idawehnla Sises.
41 Keieu, e tuhwong pein rieo Saimon, oh ndaiong: “Se diaradahr Mesaiao”+ (me wehwehki, “Krais”),
42 ih eri kahrelahng ih rehn Sises. Ni Sises eh mahsanihada ih, e mahsanih: “Kowe Saimon,+ nein Sohn; ke pahn adaneki Kepas” (ni lokaiahn Krihs, “Piter”).*+
43 Mandahn rahno, e ahpw kupwurehda en ketila Kalili. Sises eri ketin tuhwong Pilip+ oh mahsanihong: “Idawehniehdo.”
44 Eri, Pilip kohsang Pedsaida, kahnimw me Andru oh Piter kohsang ie.
45 Pilip eri tuhwong Nadaniel+ oh ndaiong: “Se diaradahr mehmeno me Moses ntingihedier duwe nan Kosonnedo oh pil me Soukohp ako ntingihedier: Sises, nein Sosep,+ sang Nasaret.”
46 Nadaniel ahpw ndaiong: “Ia duwe, kakete mehkot mwahu en kohsang Nasaret?” Pilip eri ndaiong: “Kohdo oh kilang.”
47 Sises eri mahsanihada Nadaniel eh kohkohdo oh mahsanih duwen ih: “Kilang, uhdahn mehn Israel men ih, me sohte kin widing.”+
48 Nadaniel ahpw patohwanohng: “Komw mwahngih ie sang ia?” Sises ketin sapeng mahsanihong: “Mwohn Pilip eh ekeruhkodo, I kilanguhkada ni omw mihmi pahn tuhke piko.”
49 Nadaniel ahpw sapeng patohwan: “Rapai, komwi me Sapwellimen Kohto, komwi me Nanmwarkien Israel.”+
50 Sises ahpw ketin sapeng ih mahsanih: “Ke kamehlele pwehki ei ndaiong uhk me I kilanguhkada pahn tuhke piko? Ke pahn kilang soahng kan me lapasang mepwukat.”
51 Ih eri mahsanihong: “I ndaiong kumwail ni mehlel, kumwail pahn kilang nanleng eh ritpeseng oh sapwellimen Koht tohnleng kan kin doudouda oh doudoudi rehn Nein-aramas.”+
