Rongamwahu en Madiu 26:1-75

  • Samworo kan koasoakoasoane ren kemehla Sises (1-5)

  • Leh pwohmwahu wudekdiong pohn Sises (6-13)

  • Kaimwiseklahn Pahsohpa oh pengpengla (14-25)

  • Sak en Soutik en Kauno (26-30)

  • En Piter eh kahmahm kokohpda (31-35)

  • Sises loulou nan Kedsemeni (36-46)

  • Sises selidi (47-56)

  • Kopwung mwohn Sanedrin (57-68)

  • Piter kahmahmkihla Sises (69-75)

26  Ni Sises eh ketin kaimwisekala mahsanih mepwukat koaros, e ahpw mahsanihong sapwellime tohnpadahk ko: 2  “Kumwail ese me rahn riau sang met, Pahsohpa pahn wiawi+ oh Nein-aramas pahn pengpengla pwe en kamakamala nin tuhke pwoat.”+ 3  Kaunen samworo kan oh ohl mah kan en tohnwehio ahpw pokonpene nan wasa kelpeneo ni imwen samworo lapalap me adaneki Kaiapas,+ 4  oh re kapwungada oh pwungkipene+ pwe ren koledi* Sises ni ar pahn widingehdi* oh kemehla. 5  Ahpw re kin nda: “Ieremen ni ahnsoun kasarawio pwe aramas akan en dehr mwoarongkihda.” 6  Ni Sises eh ketiket ni imwen Saimon me tokutoko nan Pedani,+ 7  lih emen ahpw patohdo reh wa pwoatol alapaster en leh pwohmwahu me pweilaud oh tepida wudekihdiong leho pohn tapwio ni eh konokonot.* 8  Ni tohnpadahk ko ar kilangada met, re ahpw lingeringerkihda oh nda: “Dahme met wiakaukilahr? 9  Pwe met kak netila ni mwohni laud oh kohieng me semwehmwe kan.” 10  Ni Sises eh mwahngihada met, e ahpw mahsanihong irail: “Dahme kumwail songosong kedirapwahki lih menet? E wiahiong ie mehkot mwahu. 11  Pwe me semwehmwe kan kin mihmi rehmwail ahnsou koaros,+ a I sohte pahn mi rehmwail ahnsou koaros.+ 12  Pwe ni eh wudekihdiong leh pwohmwahu wet ni paliwereiet, e wia met pwe en kaunopiehda ong ei pahn seridi.+ 13  I ndaiong kumwail ni mehlel, wasa koaros me rongamwahu wet pahn lohkseli ie nin sampah, dahme lih menet wia pahn pil lohkseli pwe en wia katamanpe.”+ 14  Emen meh Ehk Riemeno, me adaneki Sudas Iskariot,+ ahpw kohla rehn kaunen samworo ko+ 15  oh nda: “Dahme kumwail pahn kihong ie pwe I en pangohng kumwail ih?”+ Re ahpw pwungkipene ren kihong ih silper 30.+ 16  Eri sang ahnsowo kohla, e kin raparapahki ahnsou mwahu pwe en pangala ih. 17  Ni keieun rahn en Pilawa me Sohte Doal Ihs,+ tohnpadahk ko ahpw patohdo rehn Sises, patohwan: “Ia wasa me komw kupwurki sen kaunopadahng komwi en konote Pahsohpao ie?”+ 18  E mahsanih: “Kohla nan kahnimwo rehn ohl emen oh ndaiong, ‘Sounpadahko mahsanih: “Ei ahnsou leledohr; I pahn kasarawi Pahsohpa nan imwomw rehn nei tohnpadahk kan.”’” 19  Tohnpadahk ko eri wiahda dahme Sises ketin padahkihong irail oh kaunopada Pahsohpao. 20  Nin soutikpene,+ e ahpw ketidiong* ni tehpelo rehn tohnpadahk 12 ko.+ 21  Ni ar konokonot, e ahpw mahsanihong irail: “I ndaiong kumwail ni mehlel, emen kumwail pahn pangiehla.”+ 22  Irail eri nsensuwedkihla kowahlap duwen met, irail ahpw wademen, tepida patohwanohng: “Maing Kaun, ia duwe, kaidehn ngehi men?” 23  A e ketin sapeng mahsanih: “Mehmeno me iang ie kaduh kene pilawa nan pwohl wet iei me pahn pangiehla.+ 24  Mehlel, Nein-aramas pahn kohkohla duwehte me ntingdier duwen ih, ahpw meid suwediong+ aramaso me pahn pangala Nein-aramas!+ E pahn mwahu ong aramaso ma e sohte ipwidi.”+ 25  Sudas me pahn pangala ih, ahpw sapeng: “Rapai, kaidehn ngehi met?” A Sises mahsanihong: “Pein kowe me ndahda.” 26  Nindoken ar konokonot, Sises ahpw ketikihda lopwon en pilawa ehu oh mwurin eh ketin kapingkalahnganki, e pilitikihpeseng+ oh ketikihong tohnpadahk ko, mahsanih: “Kumwail ale oh tungoale. Met wehwehki paliwereiet.”+ 27  E ahpw ketin ale kep ehu, ketin kalahngankihong Koht oh ketikihong irail, mahsanih: “Kumwail koaros iang nim,+ 28  pwe met wehwehki ntahi+ me iei ‘ntahn inou lapo,’+ me pahn kepwilipwildi ong mahkpen dipen+ me tohto.+ 29  Ahpw I pahn ndaiong kumwail: I solahr pahn pwurehng nim wain wet lao lel rahn me I pahn iang kumwail nim wain kapw nan Wehin Semei.”+ 30  Eri, mwurin arail melkahkahki melkahkahn kaping kei,* re ahpw ketilahng ni Nahnahn Olip.+ 31  Sises ahpw mahsanihong irail: “Kumwail koaros pahn dipekelekel pwehki dahme pahn wiawihong ie pwongpwong wet, pwe e ntingdier: ‘I pahn peiong silepen sihpwo, a pelin sihpwo pahn tangpeseng.’+ 32  Ahpw mwurin ei pahn iasada, I pahn tiengla mwohmwail kohla Kalili.”+ 33  Ahpw Piter sapeng oh patohwanohng: “Mehnda ma meteikan koaros dipekelekel pwehki dahme wiawihong komwi, a I sohte mwahn pahn dipekelekel!”+ 34  Sises ahpw mahsanihong ih: “I ndaiong uhk ni mehlel, pwongpwong wet, mwohn malek eh pahn kakorot, ke pahn kahmahmkin ie pahn pak silipak.”+ 35  Piter ahpw patohwanohng: “Mehnda ma I pil anahne iang komwi pwoula, I soh mwahn pahn kahmahmkin komwi.”+ Tohnpadahk teiko koaros pil nda soahngohte. 36  Sises ahpw iang irail ketila wasa me adaneki Kedsemeni,+ oh e mahsanihong tohnpadahk ko: “Kumwail mwohndi wasaht erein ei pahn kolahng mwo oh kapakap.”+ 37  Oh e ketin kahrehda Piter oh nein Sepedi pwutak riemeno. E ahpw ketin pahtoula oh kupwure uhdahn ohla.+ 38  Ih eri mahsanihong irail: “I uhdahn pahtoula mehlel, I kakete mehkihla. Kumwail mihmi met oh iang ie mwasamwasahn.”+ 39  E ahpw ekis ketilahsang wasao oh poaridiong nanpwel, loulou patohwan,+ “Ipa, ma kak, mweidohng kep wet+ en douluhlweisang ie. Ahpw kaidehn nsenei pwe kupwuromwihte.”+ 40  Ih eri sapahlla rehn tohnpadahk ko oh mahsanihada ar memeir, e ahpw mahsanihong Piter: “Kumwail sohte kak iang ie mwasamwasahnki awateieu?+ 41  Kumwail pousehlahte mwasamwasahn+ oh poadidiong kapakap+ pwe kumwail en dehr lohdiong nan songosong.+ Mehlel, mohngiong* me ngoang,* ahpw paliwar me luwet.”+ 42  E pil ketila keriapak oh loulou, patohwan: “Ipa, ma e kak, mweidohng kep wet en douluhlwei ni ei sohte nim. Ahpw ma soh, eri kupwuromwihte en pweida.”+ 43  A e pil sapahlla oh mahsanihada ar memeir pwe masarail ko toutoukilahr ar men meir. 44  E ahpw ketilahsang irail, pwurehng ketila oh loulou kesilipak, oh pwurehng patohwan soahngohte. 45  Mwuri, e ahpw sapahlla rehn tohnpadahk ko oh mahsanihong irail: “Ni ahnsou duwehte met, a kumwail memeir oh komkommoal! Kilang! Awao kerendohr ong Nein-aramas eh pahn pengpengla rehn me dipan akan. 46  Kumwail uhda, kitail kohkohla. Kilang! Me pahn pangiehlao kerendohr.” 47  Ni eh mahmahsente, a kilang! Sudas, emen meh Ehk Riemeno iangahki pokon laud ehu me wa kedlahs oh tuhkehn wowoki pa leledo. Re kohdo sang rehn kaunen samworo ko oh me mah kan en tohnwehio.+ 48  Eri me pangala iho kihongehr irail kilel ehu ni eh nda: “Mehmen me I pahn metik, iei ih; kumwail ale oh salihedi.” 49  E inenlahngete Sises oh patohwan: “Kaselehlie Maing Rapai!” e ahpw metik. 50  Sises ahpw mahsanihong: “Nahn, ia kahrepen omw mi me?”+ Irail ahpw kohdo oh poarehng Sises oh salihedi. 51  A kilang! emen iengen Sises ko usadahte nah kedlahso oh pelehki nein samworo lapalapo ladu oh pelehsang salengeo.+ 52  Sises eri mahsanihong: “Kapwurehiong noumw kedlahsen nan dewe,+ pwe koaros me kin doadoahngki kedlahs pahn mehkihla kedlahs.+ 53  Ia duwe, ke medewe me I sohte kak peki rehn Semei en ketikihong ie ahnsou wet, karis en tohnleng kan me tohtohsang karis* 12?+ 54  Ahpw ma I wia met, a ia duwen Nting Sarawi kan eh kak pweida me mahsanih me met anahne wiawi?” 55  Sises ahpw mahsanihong pokono: “Ia duwe, kumwail wisik kedlahs oh tuhkehn wowoki kodohng salihiehdi duwehte amwail kin uhwong lipirap men? Rahn koaros I kin mwomwohd nan tehnpas sarawio padapadahk,+ kumwail ahpw sohte salihiehdi.+ 56  Ahpw mepwukat koaros wiawiher pwe nting kan* en soukohp ako en pweida.”+ Tohnpadahk ko koaros ahpw kesehla ih oh tangdoaui.+ 57  Irail ko me salihedi Sises kahrehla ih rehn samworo lapalapo Kaiapas,+ wasa me sounkawehwehn Kosonnedo kan oh ohl mah ko pokopokon ie.+ 58  Ahpw Piter ideidawehnte ih, ahpw ekis dohlahsang, lao e lel nan wasa kelpeneo ni imwen samworo lapalapo. Mwurin eh pedolong, e mwohndi rehn sounpapah kan en ihmwo pwe e men kilang imwilahn met.+ 59  Ni ahnsowo, kaunen samworo ko oh tohn Sanedrin* pwon raparapahki kadehde likamw kei ong Sises pwe re en kak kemehla.+ 60  Ahpw re sohte diarada mendahki sounkadehde likamw tohto kohdo.+ Mwuri, meh riemen ahpw kohdo 61  oh nda: “Ohl menet nda, ‘I kak kamwerehdi tehnpas sarawi en Koht oh uhd kauwada erein rahn siluh.’”+ 62  Samworo lapalapo eri kesihnenda oh ndaiong ih: “Sohte omw pasapeng? Dahme ke pahn sapengki ar kedikedipaiuk?”+ 63  Ahpw Sises ketin nennenlahte.+ Samworo lapalapo eri ndaiong: “Kahukihong kiht ni manaman en Koht ieias, ma iei kowe me Krais, Sapwellimen Kohto!”+ 64  Sises mahsanihong ih: “Kowe me nda men. Ahpw I pahn ndaiong kumwail: Sang met kohla, kumwail pahn kilang Nein-aramas+ eh pahn ketidiong ni palimaun en Me Manamano*+ oh ketiket kohdo pohn depwek kan en nanleng.”+ 65  Samworo lapalapo ahpw tehrpeseng eh likou puhpo oh nda: “E lahlahwe! Mehnda rehtail pil ekei sounkadehde? Kilang! Kumwail rongehr eh lahlahwe. 66  Dahme kumwail lemeleme?” Irail sapeng, nda: “E warohng kamakamala.”+ 67  Irail ahpw kendipiong ni silangi+ oh pakereseli.+ A ekei pohr silangi,+ 68  ndinda: “Kowe, Krais, kohpadahng kiht. Ihs me poakihiuk?” 69  A Piter wie mwomwohd likio nan wasa kelpeneo, a lidu serepein men ahpw keiong mpe oh nda: “Kowe me pil iang Sises mehn Kalilio!”+ 70  Ahpw e kahmahmki mwohrail koaros oh nda: “I sehse dahme ke ndindahn.” 71  Ni eh kohieila wasa me karanih ewen kehlo, pil emen serepein kilangada ih oh ndaiong irail me mi wasao: “Ohl menet kin iang Sises mehn Nasareto.”+ 72  E pil pwurehng kahmahmkihla met oh kahula nda: “I sehse ihs ohlen!” 73  Mwurin ahnsou kis, irail me kesikesihnen wasao ahpw keilahng mpen Piter oh ndaiong: “Uhdahn kowe pil emen irail, pwe ni mehlel, ngoromwen kasalehda.” 74  E ahpw tepida keria pein ih oh kahula, nda: “I sehse ihs ohlen!” Ni ahnsowohte malek men pa kakorot. 75  Oh Piter tamanda dahme Sises mahsaniho: “Mwohn malek eh pahn kakorot, ke pahn kahmahmkin ie pahn pak silipak.”+ E ahpw kohieila likio oh sengiseng kowahlap.

ntp

^ De “salihedi.”
^ De “doadoahngki wiepe mwersuwed.”
^ De “mwohd oh irekek ni tehpel.”
^ De “mwohd oh irekek.”
^ De “koulen sarawi kan; melkahka kan.”
^ LK, pneuʹma. Kilang KLL.
^ De “men wia.”
^ Ehu karis kin tohtohki mpen sounpei 4,000 lella 6,000. Met kadoadoahk wasaht pwehn kasalehda nempe laud ehu me sohte nohn sansal.
^ De “iren nting sarawi kan.”
^ Kilang KLL.
^ LK, “palimaun en manaman.”

Copyrights for this publication