Rongamwahu en Madiu 20:1-34
20 “Pwe Wehin nanleng rasehng soumas en ihmw men me kin sangkeneiong rapahki tohndoadoahk kan en nan eh mwetin kreip.+
2 Mwurin ih oh tohndoadoahk ko ar pwungkipenehr denari* ehu ong rahn ehu, e ahpw kadarirailla nan eh mwetin kreip.
3 Ni eh pil kohieila mpen awa kesiluh,* e kilangada ekei aramas ar kesikesihnen ni wasahn netinet, sohte arail doadoahk;
4 e ahpw ndaiong irail, ‘Kumwail pil kohwei nan mwetin kreipo oh I pahn kihong kumwail dahme konehng.’
5 Irail eri kohla. A e pil pwurehng kohieila mpen awa keweneu* oh keduwau* oh wia soahngohte.
6 A mpen awa kaeisek ehu,* e kohieila oh diarada ekei ar wie kesikesihnen, e ahpw ndaiong irail, ‘Dahme kumwail kesikesihnenki wasaht rahn ehu pwon sohte doadoahk?’
7 Re sapengki nda, ‘Pwehki sohte me koadoadoahkih kiht.’ E ndaiong irail, ‘Kumwail pil kohla nan mwetin kreipo.’
8 “Ni eh soutikpene, soumas en mwetin kreipo ahpw ndaiong nah sounapwalih doadoahko, ‘Ekerpene tohndoadoahk kan oh pwainohng pweinarail kan,+ tepikihda me keieu mwuhr oh imwikihla me keieu mwowe.’
9 Ni ahnsou me tohndoadoahk kan me doadoahk sang awa kaeisek ehu kohdo, emenemen irail alehdi denari* ehu.
10 Eri ni ahnsou me irail me tepin doadoahk ko kohdo, re kihkihong me re pahn ale laudsang, ahpw re pil ale uwen denari* ehu.
11 Ni ar ale met, re ahpw tepida kaulimehki soumas en ihmwo
12 oh nda, ‘Irail me kohdo keieu mwuhr doadoahk awateieu; ahpw ke pil wiahiong irail duwehte kiht me doadoahk laud rahn ehu pwon pahn karakar en ketipin!’
13 E ahpw sapeng emen irail, nda, ‘Nahn, sohte sapwung ehu I wiahiong uhk. Kita sou pwungkipene denari* ehu?+
14 Ale dahme noumw oh kohkohla. I men kihong me kohdo keieu mwuhro uwen me I kihong uhk.
15 E sou mie ei pwuhng en doadoahngki ei kepwe kan ni pein nsenei? De ke peirinki* ei mwahu?’*+
16 Ih pil pahn duwen, irail me kin mwuri pahn mwowehla, a me kin mwowe pahn mwurihla.”+
17 Ni arail kohkohdalahng Serusalem, Sises ahpw ketin kelehpwkihla tohnpadahk 12 ko oh mahsanihong irail nanialo:+
18 “Kilang! Kitail kohkohdalahng Serusalem oh Nein-aramas pahn pengpengla rehn kaunen samworo kan oh sounkawehwehn Kosonnedo kan. Re pahn kadeikada pwe en kamakamala+
19 oh pahn pangala ih rehn mehn liki kan pwe en wia mehn kapailok, wowoki oh kamakamala nin tuhke pwoat;+ oh ni kesiluhwen rahn e pahn iasada.”+
20 Eri, inen nein Sepedi ko+ patohdo reh iangahki nah pwutak ko, poaridi mwowe oh peki reh mehkot.+
21 E ahpw mahsanihong ih: “Dahme ke mwahuki?” Liho sapeng patohwan: “Komw ketin mweidohng ei tungoal pwutak riemenet en iang mwohndi nan sapwellimomwi Wehi, emen ni palimaunomwi, a emen ni palimeing.”+
22 Sises ketin sapeng: “Kumwa sehse dahme kumwa pekipekien. Kumwa kak nim kep me I nektehn pahn nim?”+ Ira eri patohwan: “Se kak.”
23 E ahpw mahsanihong ira: “Kumwa uhdahn pahn nim nimei kep,+ ahpw en mwohndi ni palimaun oh palimeingi kaidehn ngehi me pahn koasoanehdi, pwehki Semei me kin ketin pilada irail kan me mweimweida ren mwohd wasao.”+
24 Ni ahnsou me irail meh ehk ko rongada duwen met, irail ahpw lingeringerda pahn pirieno.+
25 Sises ahpw malipeiraildohng reh oh mahsanih: “Kumwail ese me kaunen wehi kan kin men kaunda neirail aramas oh me lapalap kan kin doadoahngki arail manaman pohrail.+
26 Met en dehr wiawi rehmwail;+ ahpw mehmen me men lapalapala nanpwungamwail anahne wia amwail sounpapah,+
27 oh mehmen me men keieu nanpwungamwail anahne wia amwail ladu.+
28 Duwehte Nein-aramas me ketido, kaidehn pwe aramas en papah, ahpw pwe en papah+ oh toukihda moure* nin duwen pweinen pweipwei sapahl ehu ong aramas tohto.”+
29 Ni arail mweselsang Seriko, lapalahn pokon ehu ahpw idawehnla ih.
30 A kilang! ohl maskun riemen me mwomwohd ni keilen ahlo rongada me Sises ketiket kohla wasao, ira ahpw ngihl laudida patohwan: “Maing Kaun, Nein Depit, komw kupwurei kiht!”+
31 Pokono ahpw lipwoareirahda oh ndaiong ira en nennenla; a ira ahpwte kalaudehla ngilara ko, patopatohwan: “Maing Kaun, Nein Depit, komw kupwurei kiht!”
32 Sises eri ketin uhdi oh malipeiradohng reh, mahsanih: “Dahme kumwa men I en wiahiong kumwa?”
33 Ira ahpw patohwanohng: “Maing Kaun, mweidohng pwoaren masat kat en pehdpeseng.”
34 Sises ahpw ketin poakeirahla oh ketin doahke masara ko+ oh ni ahnsowohte ira pwurehng kilangada wasa, oh ira idawehnla ih.
