Nein Piter Keieun Kisinlikou 5:1-14

  • Apwalih sapwellimen Koht pelin sihpw (1-4)

  • Karakarahkala oh mwasamwasahn (5-11)

    • Patohwanohng Koht pwunod koaros (7)

    • Tepil duwehte laion emen me kin weriwer (8)

  • Kaimwiseklahn koasoi kan (12-14)

5  Eri, pwehki I wia sounapwalih* men duwehte irail oh I wiahier sounkadehdehn lokolok kan en Krais oh pil pahn iang ale lingan me pahn sansalda,+ I wia pekipek* wet ong sounapwalih kan nanpwungamwail: 2  Kumwail apwalih sapwellimen Koht pelin sihpw+ me mi pahn epwelpamwail, kumwail papah nin duwen sounapwalih kan,* kaidehn pwehki idihd, ahpw pwehki kumwail kin nsenki papah mwohn silangin Koht;+ kaidehn pwehki amwail mwahuki rapahki pein kamwahupamwail,+ ahpw pwehki ngoang; 3  kumwail dehr kin kaunda irail kan me Koht ketin sapwellimanki,+ ahpw wiahla mehn kahlemeng ong pelin sihpwo.+ 4  Oh ni ahnsou me silepen sihpw lapalapo+ pahn pwarada, kumwail pahn ale nihn lingan me sohte kin sohrala.+ 5  Pil duwehte kumwail mwahnakapw kan, kumwail uhpahiong ohl mah kan.*+ Ahpw kumwail koaros en kasalehda aktikitik* nanpwungamwail pwehki Koht kin ketin uhwong me aklapalap kan, ahpw e kin ketikihong me aktikitik kan kadek sapan.+ 6  Eri, kumwail pein karakarahkala pahn nin limen Koht manaman, pwe en ketin kasapwilkumwailda ni ahnsou me konehng,+ 7  nindoken amwail patohwanohng ih amwail pwunod akan koaros,+ pwehki eh kin ketin nsenohkin kumwail.+ 8  Kumwail loalokongla oh mwasamwasahn!+ Amwail imwintihtio Tepil kin kohkohseli duwehte laion emen me kin weriwer, raparapahki en kadallehla emen.*+ 9  Ahpw kumwail pelianda ih+ ni pwoson kehlail, pwe kumwail ese me riamwail kan koaros nin sampah pil kin lelohng soangen lokolok me kumwail kin lelohng.+ 10  Ahpw mwurin amwail pahn lokolok ahnsou kis, Koht en kadek sapan koaros, me ketin malipeikumwaildohng nan sapwellime lingan poatopoat+ ni amwail miniminiong Krais, pein ih pahn ketin kanekehla amwail kaiahn. E pahn ketin katengeikumwaildi,+ e pahn ketin kakehlaikumwailda+ oh e pahn ketkinkumwaildiong pohn poahsoan teng. 11  Ih me ketin sapwellimanki manaman kohkohlahte. Amen. 12  I ntingwohng kumwail ni mwotomwot sang ni sawasepen Silpanus*+ me I kin wiahki riatail me lelepek men, pwe I en kangoange kumwail oh kihong kumwail mehn kadehde mehlel ehu, me sapwellimen Koht kadek sapan ong kumwail me mehlel. Kumwail tengediong met. 13  Lih* me mihmi nan Papilon, me pilipildahr duwehte kumwail, kadarewei eh rahnmwahu oh pil Mark,+ nei pwutak. 14  Kumwail rahnmwahukipene metik en pirien.* Popohl en kin ieiang kumwail koaros me kin miniminiong Krais.

ntp

^ De “mehn kangoang.”
^ LK, “ohl mah.”
^ De “tetehk mwahu.”
^ De “sounapwalih kan.”
^ De “pwuhriong aktikitik likamwete e wia likou ehu.”
^ De “raparapahki emen me e pahn kadallehla.”
^ Pil adaneki Sailas.
^ E kak dokedoke mwomwohdiso ehu.
^ LK, “metik en limpoak.”

Copyrights for this publication