Luslahng audepe kan

luslahng audepe kan

Papidais—Kahk Ehu me Kristian kan Anahne Wia

Papidais—Kahk Ehu me Kristian kan Anahne Wia

“Papidais . . . pil kin komourkumwailla ahnsou wet.”​—1 PIT. 3:21, NW.

KOUL KAN: 52, 41

1, 2. (a) Ia pepehm en ekei pahpa nohno ni ahnsou me neirail serio men papidaisla? (b) Dahme kahrehda brother me wia padahk en papidaiso kin idek rehn irail kan me men papidaisla ma re inoukihongehr Siohwa arail mour? (Menlau kilang tepin kilel.)

SEREPEIN pwulopwul men, me kitail pahn kahdaneki Maria, kesihnen nanpwungen irail teikan me pahn papidaisla. Eh pahpa oh nohno kilikilang ih. Ni ngihl laud oh sansal, e sapengala peidek riauo me brother me wia padahko idek. Mwurinte mwo, e papidaisla.

2 Ahn Maria pahpa oh nohno uhdahn perenki neira serepeino eh pilada en inoukihong Siohwa eh mour oh papidaisla. Ahpw mwohn ahnsowo, miehte peidek kei me eh nohno kin medemedewe. E pein idek reh: ‘Maria seu nohn pwulopwul en papidaisla? E uhdahn wehwehki kesempwalpen dahme e wiewia? E seu pahn mwahu ma e awih ekis mwohn eh papidaisla?’ Peidek pwukat iei me pahpa nohno tohto kin pein idek rehrail ni ahnsou me neirail seri men nda me e men papidaisla. (Ekl. 5:5) Met pwehki pilipil me keieu kesempwal me emen kak wiahda iei en inoukihong Siohwa eh mour oh papidaisla.​—Menlau kilang koakon me oaralape “ Ke Inoukihongehr Siohwa Omw Mour?

3, 4. (a) Ia duwen wahnpoaron Piter eh padahkihong kitail me papidais uhdahn kesempwal? (b) Dahme kahrehda Piter kapahrekihong papidais kokoudahn warihmwo ni mwehin Nohao?

 3 Wahnpoaron Piter kapahrekihong papidais en Noha eh wiahda warihmwo. E nda: “Papidais, me pahrekiong met, pil kin komourkumwailla ahnsou wet.” (Wadek 1 Piter 3:20, 21, NW.) * Warihmwo wia mehn kadehde sansal ehu ong meteikan me Noha kin men wia kupwuren Koht sang ni eh mohngiong unsek. Ni lelepek, Noha kapwaiada pwukoa me Siohwa ketikihong ih. Pwehki en Noha pwoson, Siohwa ketin doarehla ih oh eh peneineio sang Nohliko. Dahme Piter songosong en padahkihong kitail?

4 Ni aramas akan ar kilang warihmwo, irail ese me Noha kin pwoson Koht. Ni aramas akan ar kilang emen papidaisla, irail ese me e inoukihongehr Koht eh mour pwehki eh pwoson Krais me ketin iasadahr. Duwehte Noha, irail kan me papidaislahr kin peikiong Koht oh kapwaiada doadoahk me e ketikihong irail en wia. Pil duwehte Siohwa eh ketin doarehla Noha erein Nohliko, e pil pahn ketin doarehla sapwellime ladu loalopwoat kan me papidaisla ni ahnsou me e pahn ketin kasohrehla sampah suwed wet. (Mark 13:10; Kaud. 7:9, 10) Eri e uhdahn kesempwal en inoukihong Siohwa atail mour oh papidaisla. Ni mehlel, ma emen kin kapwakapwande eh pahn papidaisla, e kakete katihasang eh pahn mour kohkohlahte.

5. Dahme kitail pahn sukuhlki nan iren onop wet?

5 Pwehki met kitail eseier uwen kesempwal en papidaisla, kitail pahn sapengala peidek siluh pwukat: Dahme Paipel mahsanihki duwen papidais? Dahme emen anahne wia mwohn eh kak papidaisla? Dahme kahrehda kitail en ahnsou  koaros tamataman uwen kesempwal en papidais ahnsou me kitail kin padahki neitail seri kan de neitail tohnsukuhl kan en Paipel?

KOASOIPEN PAPIDAIS NAN PAIPEL

6, 7. (a) Menlau kawehwehda wehwehn papidais me Sohn kin wia. (b) Papidais tohrohr dahieu me Sohn wiahda?

6 Atail tepin wadek duwen papidais nan Paipel iei me Sohn Sounpapidais kin wia. (Mad. 3:1-6) Irail kan me papidaisla rehn Sohn kin wia met pwehn kadehdehda arail koluhkihla diparail pwehki arail kauwehla Kosonned en Moseso. E kesempwal en tehk me papidais me keieu kesempwal me Sohn wia sohte mwahn pidada koluhla. Sohn ahneki pwais kaselel tohrohr en papidaisihala Sises, sapwellimen Koht Ohl me wia aramas unsek men. (Mad. 3:13-17) Sohte dihp ehu rehn Sises, eri e sohte anahne ketin koluhla. (1 Pit. 2:22) Sapwellime papidais kin kadehdehda me e patohwandahr eh mour pwehn wia kupwuren Koht.​—Ipru 10:7.

7 Erein sapwellimen Sises doadoahk en kalohk nin sampah, sapwellime tohnpadahk kan pil kin wia papidais kan. (Sohn 3:22; 4:1, 2) Duwehte papidais me Sohn kin wia, papidais pwukat kin kadehdehda duwen ahn me papidaislahro eh koluhkihla eh kauwehla Kosonned en Moseso. Ahpw, mwurin pwoula oh iasadahn Sises, wehwehn papidais wekila ong sapwellime tohnpadahk kan.

8. (a) Mwurin Sises ketin iasada, kehkehlik dahieu me e ketikihong sapwellime tohnpadahk kan? (b) Menlau kawehwehda wehwehn papidais ong Kristian men.

8 Nan pahr 33 mwohn Krais, Sises me iasadahr ketin pwarowohng pokon laud ehu me tohtohki aramas daulih 500, ohl, lih oh pil kakete seri kan. Ele ih ahnsowo me e ketin mahsanih: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh [“sapwellimen Koht manaman,” NW], oh kehkehlingkihong irail re en peikiong mehkoaros me I koasoanediong kumwail.” (Mad. 28:19, 20; 1 Kor. 15:6) Ei, e mwomwen me sapwellime tohnpadahk meh epwiki kei me mi wasao ahnsou me Sises ketikihda kehkehlik wet me irail en katohnpadahk. Eri, Sises ketin kasalehda me papidais pahn wia kahk ehu me irail kan me ale pwukoa en katohnpadahk anahne wia. (Mad. 11:29, 30) Emen me men papah Koht ni ahl me konehng anahne pohnese oh pil pwungki duwen pwukoa me Sises sapwellimanki ong pweidahn kupwuren Siohwa. Mwurin eh wia met, e kakehr papidaisla. Ihte soangen papidais wet me kin wiawi nan pihl me Koht ketin kupwurki. Paipel kihda mehn kadehde tohto me ni mwehin tepin Kristian kan, sapwellimen Krais tohnpadahk kapw kan kin wehwehki wehwehn papidais. Oh re sohte kin kapwande arail en papidaisla.​—Wiewia 2:41; 9:18; 16:14, 15, 32, 33.

DEHR AWIAWIH

9, 10. Dahme kitail kak sukuhlki sang ohlen Idiopiao oh pil wahnpoaron Pohl me pid papidais?

9 Wadek Wiewia 8:35, 36. Medewehla karasaras en ohlen Idiopiao me pwurepwurelahng imweo sang eh wia eh kaudok nan Serusalem. Pilip, me sapwellimen Siohwa tohnlengo kamwakid, kohla rehn ohlen Idiopiao oh “koasoia ong ohlo duwen Rongamwahu en Sises.” Ia duwen ohlen Idiopiao eh mwekidki met? Dahme e wia mwuhr kasalehda ni sansal duwen eh kalahnganki padahk mehlel me e sukuhlki. E men wia dahme pahrekiong sapwellimen Siohwa koasoandi, eri e mwadangete papidaisla.

10 Pil ehu karasaras iei me pid ohlen Suhs me kin kalokaloke Kristian ko. E ipwidi nan wehi ehu me inouda ong Koht. Ahpw mehn Suhs ko sohla ahneki nanpwungmwahu tohrohr rehn Siohwa. Ohl menet kin uhdahn ngoangki tiahk en mehn Suhs kan, ahpw e sukuhlki ahl ehu me mwahusang met. Sises Krais, me ketin iasada,  me ketin kalohk ong ih. Ia duwen ohlo eh mwekidki met? E kalahnganki sawas sang rehn tohnpadahko Ananaias me wia Kristian men. Paipel padahkihong kitail duwen ohl menet: “E ahpw uhda oh papidaisla.” (Wiewia 9:17, 18; Kal. 1:14) Ele ke ese duwen ohlen Suhs menet me mwuhr wiahla wahnpoaron Pohl. Tehk me ni ahnsowohte me Pohl wehwehkihla mehlelpen pwukoa me Sises sapwellimanki ong ni pweidahn kupwuren Koht, e mwadangete papidaisla.​—Wadek Wiewia 22:12-16.

11. (a) Dahme kin kamwakid tohnsukuhl en Paipel kan rahnwet en papidaisla? (b) Ia duwen atail kin mwekidki ni atail kilang me kapw kan me wiadahr inou ong Siohwa ar papidaisla?

11 Met pil duwehte tohnsukuhl en Paipel kan rahnwet, mehnda ma pwulopwul de mah. Irail kan me ahneki pwoson oh uhdahn kalahnganki padahk mehlel en Paipel kin men wiahda inou ong Siohwa oh papidaisla. Padahk en papidais me kin wiawi ong irail wia padahk kesempwal ehu nan mihting tohrohr koaros. Sounkadehdehn Siohwa kan kin perenkihda ni emen tohnsukuhl en Paipel eh pwungki padahk mehlel oh kekeirda lao e warohng papidaisla. Ia duwe, pahpa nohno kan seu kin perenki kilang neirail seri kan iang kesihnen nanpwungen irail tohnpadahk kapw teikan me pahn papidaisla? Nan pahr en kalohk 2017, irail me “ahneki mohngiong mwahu” tohtohsang meh rielopw walinen pahkid (284,000) kin kadehdehda arail inoukihong Siohwa arail mour sang ni arail papidaisla nan pihl. (Wiewia 13:48) E sansal me tohnpadahk kapw pwukat wehwehki me papidais iei kahk ehu me Kristian kan anahne wia. Ahpw kahk dah kan me irail anahne wia mwohn arail papidaisla?

12. Kahk dah kan me tohnsukuhl en Paipel men anahne wia mwohn eh papidais?

12 Mwohn tohnsukuhl men pahn kak papidaisla, e anahne kakairada pwoson me poahsoankihda eh esehla mwahu duwen Koht, kupwure, oh sapwellime koasoandi ong komourala. (1 Tim. 2:3-6) Soangen pwoson wet kin kamwakid tohnsukuhlo en soikala wiewia kan me kin kansensuwedihada kupwuren Koht oh wia soahng kan me pahrekiong sapwellimen Siohwa koasoandi pwung kan. (Wiewia 3:19) Eri, emen sohte kak inoukihong Koht eh mour ahpw ni ahnsowohte wiewia tiahk kan me pahn kahrehiong ih en sohte iang sohsohki Wehin Koht. (1 Kor. 6:9, 10) Ahpw pil mie soahng teikan e anahne wia likin en kapwaiada sapwellimen Siohwa koasoandi ileile me pid tiahk kan. Emen me kin nsenohki me pwung pahn pil iang towehda mihting en mwomwohdiso kan oh iang doadoahk en kalohk oh katohnpadahk me kin komourala aramas akan. Sises mahsanih me sapwellime tohnpadahk mehlel kan me pahn wia doadoahk wet. (Wiewia 1:8) Tohnpadahk kapw men anahne wia mahs soahng pwukat koaros. Mwuhr e kak inoukihong Siohwa eh mour ni kapakap oh papidaisla.

MEHN AKADEI EHU ONG TOHNSUKUHL KAN EN PAIPEL

Ke kin tamataman kesempwalpen papidais oh kawehwehiong noumw tohnsukuhl en Paipelo? (Menlau kilang parakrap 13)

13. Dahme kahrehda sounpadahk kan en Paipel anahne tamataman me papidais iei kahk ehu me Kristian kan anahne wia?

13 Ni atail sewese neitail seri kan oh tohnsukuhl en Paipel teikan en wiahda kahk kesempwal kan, kitail anahne tamataman me emen me men wiahla tohnpadahk mehlel men anahne papidaisla. Ma kitail tamataman met, kitail pahn koasoiong neitail tohnsukuhl kan ni ahl me pahn kamwakid irail. Kitail sohte pahn pweiek en koasoia ni ahnsou me konehng duwen kesempwalpen en wiahda inou ong Siohwa oh papidaisla. Ei, kitail men neitail seri kan oh pil tohnsukuhl en Paipel kan en kekeirda oh papidaisla!

14. Dahme kahrehda kitail en dehr idingkihong emen en papidaisla?

14 Sohte emen pahn idingkihong seri men de tohnsukuhl en Paipel men en papidaisla. Kaidehn ih ahl wet me Siohwa ketin kupwurki.  (1 Sohn 4:8) Ni atail kin kasukuhlih irail pwukat, kitail anahne kasalehda ni sansal kesempwalpen en kakairada nanpwungmwahu rehn Koht. En tohnsukuhlo eh kalahnganki padahk mehlel oh pil eh inengieng wia dahme Kristian men anahne wia iei me pahn kamwakid ih en papidaisla.​—2 Kor. 5:14, 15.

15, 16. (a) Mie koasoandi ehu ong sounpar depe me emen anahne papidaisla? Menlau kawehwehda. (b) Dahme kahrehda tohnsukuhl en Paipel men anahne papidaisla nin duwen Sounkadehdehn Siohwa men mehnda ma mwoweo e papidaislahr nan ehu pelien lamalam tohrohr?

15 Sohte koasoandi ehu ong sounpar depe me emen anahne papidaisla. Mwomwen emenemen eh kekeirda oh koahiekla kin wekpeseng. Me tohto papidaisla ni arail pwulopwul, oh re kin pousehlahte lelepek ong Siohwa. Ekei tohnsukuhl kin wehwehkihla kesempwalpen papidais mwurin arail sukuhlki padahk mehlel ni ahnsou me re mahlahr, ekei irail dauliher sounpar 100!

16 Emen tohnsukuhl en Paipel me mahlahr idek rehn eh sounpadahko ma e uhdahn anahne pwurehng papidaisla, pwehki nan pahr kan mwowe, e papidaislahr nan pelien lamalam teikan me e kin iang. Tohnsukuhlo oh eh sounpadahko pwurehng kousapahlih iren Paipel kan me konehng ireo. Met tohnsukuhlo wehwehkihla dahme Paipel padahngki duwen met oh mwadang papidaisla. Mendahki tohnsukuhlo kereniong sounpar 80, e sohte pehm me sohte anahnepen papidais. Ei, papidais ni ahl me pwung kin poahsoankihda loalokong pwung duwen kupwuren Siohwa. Eri, tohnpadahk kapw kan anahne papidaisla mehnda ma mwoweo re papidaislahr nan ehu pelien lamalam tohrohr.​—Wadek Wiewia 19:3-5.

17. Dahme emen anahne doudouloale ni rahn en eh papidaiso?

17 Ahn emen rahn en papidais kin wia rahn ehu me inenen kaperen. E pil wia ahnsou ehu en doudouloale soahng kan. En kapwaiada inou me emen wiahda ong Siohwa kin pidada doadoahk laud. Ihme kahrehda Sises ketin kapahrekiong doadoahk en katohnpadahk mehn wisik ehu. Sapwellimen Sises tohnpadahk kan anahne “dehr kin mourki pein ihr, ahpw re en kin mourkihte ih me pwoukinirailla oh ketin iasada pwe en ketikihong irail mour.”​—2 Kor. 5:15; Mad. 16:24.

18. Peidek dah kan me kitail pahn koasoiapene nan iren onop en mwuhr?

18 Ahn Maria nohno kin medemedewe soahng pwukat ni eh pein idek reh peidek kan me kileldi ni tepin iren onop wet. Ma kowe emen pahpa de nohno, ele ke kin pein idek: ‘Nei serio uhdahn onopadahngehr en papidaisla? E ahneki loalokong pwung me itar pwe en kak wiahda eh inou ong Siohwa? Ia duwen mehn akadei kan me pid iang sukuhl de ahneki doadoahk? Ia duwen ma nei serio papidaisla ahpw mwuhr wiahda dihp laud ehu?’ Nan iren onop en mwuhr, kitail pahn koasoiapene ire pwukat oh pil ia duwen Kristian pahpa nohno kan ar kak kolokol arail toupahrek me pid papidais.

^ par. 3 1 Piter 3:20, 21 (NW): “Me sapeik ni mwehin Noha ni ahnsou me Koht ketin awiawih ni kanengamah, nindoken warihmwo eh wie kokou, me aramas malaulau kei mi loale, iei aramas welimen me pitsang pihlo. Papidais, me pahrekiong met, pil kin komourkumwailla ahnsou wet (kaidehk sang ni kihsang samin en paliwar, ahpw sang ni peki nsenmwakelekel rehn Koht), pwehki iasadahn Sises Krais.”